Pelantoa Langa
11
Tempo haitu pura-pura manusia ri dunia aga nosangu basa,
bo nipakera tesa nasimbayu.
2 Tempo ira nanjayo ri bagia mpandake,
ira nakava ri lemba Babilonia,
bo naroo hamai.
3 Ira nosiulika,
“Anumo!
Kita motepe tana bo ratunuta pakakaa.”
Jadi ivesiamo ira notepe tana rapoviara banua bo naria muni aspal mompoposikantaka tana nitepe haitu.
4 Niuliramo,
“Kita mombangu ngata mbaso ante pelantoa sampe ri langi kalangana,
ala kita rapakaoge ntona bo ledo makamburaka ri njumangu dunia.”
5 Jadi nanaumo TUPU nompeinta ngata mbaso bo pelantoa nipovia nu manusia haitu.
6 NiuliNa,
“Ira hitu sangu ngata bo sangu basa,
bo hitu da niara pamulana.
[Ane majadi niara haitu,]
ledo masae rapakuleramo movia nuapa-nuapa rapokonora!
7 Aginamo Kita manau bo mompakagado basara ala domo mosipaha ira motesa.”
8 Ivesiamo TUPU nompakakamburaka ira ri njumangu dunia,
bo netaamo ira nompopeangga ngata mbaso haitu.
9 Sabana haitu,
ngata mbaso haitu nipoposanga Babela sabana ri sia Tupu nompakagado basa nu manusia,
bo lako rahaitu ira nikamburaka nTUPU hau ri njumangu dunia.
Muli i Sem
10 Hitumo muli i Sem.
Rompae kaliuna uve oge,
tempo i Sem noumuru saatu mpae,
nomulika saito ngana langgai nosanga i Arpakhsad.
11 Naliu haitu ia da natuvu (500) limaatu mpaepa,
bo nomulika ngana ntanina vai.
12 Tempo i Arpakhsad noumuru 35 mpae,
ia nomulika ngana langgai nosanga i Selah.
13 Naliu haitu i Arpakhsad da natuvu (403) pataatu talu mpaepa,
bo nomulika ngana ntanina vai.
14 Tempo i Selah noumuru 30 mpae,
ia nomulika ngana langgai,
sangana i Eber.
15 Naliu haitu i Selah da natuvu (403) pataatu talu mpaepa,
bo nomulika ngana natanina.
16 Tempo i Eber noumuru 34 mpae,
ia nomulika ngana langgai,
nosanga i Peleg.
17 Naliu haitu i Eber da natuvu (430) pataatu talupulu mpaepa,
bo nomulika ngana ntanina.
18 Tempo i Peleg noumuru 30 mpae,
ia nomulika ngana langgai,
nosanga i Rehu.
19 Naliu haitu i Peleg da natuvu (209) roatu sio mpaepa bo nomulika ngana ntanina.
20 Tempo i Rehu noumuru 32 mpae,
ia nomulika ngana langgai nosanga i Serug.
21 Naliu haitu i Rehu da natuvu (207) roatu pitu mpaepa bo nomulika ngana ntanina.
22 Tempo i Serug noumuru 30 mpae,
ia nomulika ngana langgai,
nosanga i Nahor.
23 Naliu haitu i Serug da natuvu (200) roatu mpaepa bo nomulika ngana ntanina.
24 Tempo i Nahor noumuru 29 mpae,
ia nomulika ngana langgai,
nosanga i Terah.
25 Naliu haitu i Nahor da natuvu (119) saatu sapulu sio mpaepa,
bo nomulika ngana ntanina.
26 Naganapa 70 mpae umuru i Terah,
ia nomulika tatalu ngana langgai,
haitumo:
i Abram,
i Nahor bo i Haran.
Muli I Terah
27 Hitumo muli i Terah:
I Terah tuama i Abram,
i Nahor bo i Haran.
I Haran nomulika ngana langgai sangana i Lot.
28 I Haran namate ri ngatana mboto,
haitumo ri ngata mbaso Ur ri Babilonia,
tempo da natuvu tuamana.
29 I Abram noberei nte i Sarai,
bo i Nahor noberei nte i Milka ana mombine i Haran.
I Haran da naria anana ntanina nosanga i Yiska.
30 I Sarai nagampa,
ledo noana ia.
31 I Terah nompalaisi ngata Ur ri Babilonia nosinggani-nggani nte anana i Abram,
i Lot tupuna,
bo i Sarai maniana,
berei i Abram.
Patujuna hau ri tana Kanaan.
Tapi nakava ri ngata Haran,
ira naroo hamaimo.
32 Bo ri ngata haitu muni i Terah namate tempo ia noumuru (205) roatu lima mpae.