Pojanji nu Alatala ante i Nuh
9
Alatala nombadekei rasi ka i Nuh ntaliana bo nanguli,
“Poana pakadeamo,
ala mulimiu monturo ri njumangu dunia.
2 Pura-pura tonji bo bau ante binata ntanina maeka nte komiu.
Pura-pura binata haitu rakuasaimiu.
3 Pura-pura anu natuvu majadi kandeamiu,
nasimbayu mpo baipia tuda-tuda nagavu nidekei rakandemiu.
Hitupa Kudekei pura-pura haitu ka komiu majadi kandeamiu.
4 Naupa ivesia,
sangaya anu ledo mamala rakandemiu iamo bau binata anu da naria raana.
NiuliKu ivesia sabana nyawana naria riara nu raana.
5 Ane manusia bara binata mombapatesi manusia,
Kuhuku mate.
6 Manusia nipajadi nasimbayu mpo Yaku.
Sabana haitu,
isema mompatesi manusia,
ia mboto kana rapatesi nu manusia.
7 Komiu kana moana bo momuli madea,
ala mulimiu monturo ri njumangu dunia.”
8 Alatala notesa ka i Nuh ntaliana,
9 “Hitupa Kupovia pojanjiKu ante komiu bo ante mulimiu,
10 bo ante pura-pura anu natuvu,
haitumo tonji-tonji bo pura-pura binata ntanina ri kabatana anu nosinggani-nggani nte komiu nesuvu lako ranjakaya.
11 Hitumo pojanjiKu nte komiu:
Yaku nojanji pura-pura anu natuvu domo Kupakaropu ante uve oge.
Domo maria uve oge mompakagero dunia hitu.
12 Kupovia anu majadi tanda pojanjiKu ante komiu pura-pura anu natuvu,
bo pojanji haitu sampe ri kasae-seana.
13 Kudika tirauve ri kulimu majadi tanda pojanjiKu ka isi dunia.
14 Nggani-nggani,
ane langi Kututui ante kulimu,
bo maria tirauve rakita,
15 Yaku mombatora pojanjiKu ante komiu bo pura-pura anu natuvu.
Yaku domo mompakaropu pura-pura anu natuvu ante uve oge,
haitumo janjiKu.
16 Ane Kukita tirauve ri kulimu,
Kutora pojanji nipoviaKu ante pura-pura anu natuvu ri dunia,
bo pojanjiKu haitu sampe ri kasae-saena.
17 Tirauve najadi tanda pojanjiKu ka pura-pura anu natuvu ri dunia.”
I Nuh bo Ana-anana
18 Ana-ana i Nuh nesuvu lako ri sakaya,
haitumo,
i Sem,
i Ham bo i Yafet.
(I Ham tuama i Kanaan).
19 Tatalu ana i Nuh haitu nomulika pura-pura tona ri dunia.
20 I Nuh topokarajaa ri talua,
bo iamo pamula-mulana notalua anggur.
21 Naria saeo,
niinunapa uve nu anggurna nalimpunomo ia.
Nivonjuna puramo pakeana bo naturumo ia riara tendana.
22 Tempo i Ham,
tuama i Kanaan haitu,
nanggita tuamana novuloaa,
nesuvumo ia nangulika sampesuvuna randua.
23 Jadi i Sem bo i Yafet nangala santonga baju bo nilavera ri vingara.
Bo nolipa ntaliku ira nesua ri tenda haitu bo nombatampunisi tuamara ante baju haitu.
Ira neili ntanina ala ledo rapeintara tuamara novuloa.
24 Nanotopa rara i Nuh lako kalimpunona,
bo nisanina anu nipovia nu anana panggaupu ka ia,
25 nangulimo ia,
“Nasurukavumo i Kanaan!
Ia majadi batua nu sampesuvu-sampesuvuna bo raparitambe ntona.
26 Ratoiyamo TUPU Alatala nisomba i Sem!
I Kanaan majadi batua i Sem.
27 Kuperapi Alatala mombatambai rasi bo mompakaluo ponturo ka i Yafet.
Kambana mulina monturo singgani-nggani nte muli i Sem.
I Kanaan majadi batua i Yafet.”
28 Naliu uve oge haitu,
i Nuh da natuvu (350) taluatu limapulu mpaepa.
29 I Nuh noumuru (950) sioatu limapuu mpae pade namate.