Uve Oge Nakunju
8
Alatala ledo nalinga raraNa nte i Nuh bo pura-pura binata vura bo binata-binata nipiara,
anu nosinggani-nggani nte i Nuh riara njakaya haitu,
bo Alatala nompopeburu poiri nombatavusi tana,
sampe nakunju uve haitu.
2 Jadi pura-pura mata nu uve ri tambe ntana bo mata nu uve ri laerava nitutuiNa.
Jadi natoromo uda,
3 bo uve nantambaimo kakunjuna.
Naliu (150) saatu limapulu eo uve domo nalanga ntoto.
4 Jadi nanggava tanggala sapulu papitu,
bula papitu,
sakaya haitu nasampe ri bavo Bulu Ararat.
5 Uve nakunju njuumo bo nanggava tanggala sangu bula sapulu,
nikitamo vuntu nu bulu.
6 Naganapa patapulu eo,
nibuka i Nuhmo pelaba njakaya,
7 bo nipopevorona sambaa tonji kalikoa.
Tonji haitu ledo nanjili ri sakaya aga nevoro hau tumai sampe nakunju mpuu uve oge.
8 Naliu haitu,
nipopevoro i Nuh vai tonji karo-mbaana,
haitumo tonji banggebodo ala rapangisani bara nakunju mpuumo uve haitu.
9 Tapi tonji banggebodo haitu ledo ria petuu nggadana jadi nanjili vai ia hau nte i Nuh riara njakaya haitu,
sabana pura-pura bavo ntana da naria uve.
Niuluraka i Nuhmo palena bo tonji haitu netuu ri palena bo nisuarakana riara njakaya.
10 I Nuh nompopea pitu-eopa,
pade nipopevorona vai tonji haitu lako ranjakaya.
11 Nanggovia nakava vai tonji haitu ri sakaya i Nuh bo nikenina santau tava kayu zaitun da namata.
Lako rahaitu,
nisani i Nuhmo,
uve nakunju mpuumo lako ri bavo ntana.
12 Dako rahaitu,
nipopeana vai pitu-eopa,
pade nipopevorona vai tonji banggebodo haitu,
tapi domo nanjili tonji haitu.
13 Tempo i Nuh noumuru (601) onoatu bo sampae,
riara bula paratama,
tanggala sangu bula haitu,
nabaimo uve ri bavo ntana;
pade nibuka i Nuhmo vamba njakaya haitu bo nipeintana nabaimo tana.
14 Jadi ri bula karanduana,
haitumo ri eo (27) karopulu papituna bula haitu,
nabaimo tana.
15 Jadi notesamo Alatala ka i Nuh:
16 “Pesuvumo lako riara njakaya,
iko nte bereimu bo ana-anamu ante maniamu.
17 Keni mpesuvumo tonji bo binata ntanina,
mbasona bo kodina,
ala ira mamala moana madea bo makamburaka hau ri njumangu dunia.”
18 Jadi nesuvumo i Nuh lako riara njakaya haitu nosinggani-nggani nte bereina,
ana-anana bo maniana.
19 Pura-pura tonji bo binata ri kabatana nesuvu lako riara njakaya haitu,
bo simbo notani nangoseaka lunu nu ngayana.
I Nuh Nombadekei Pesomba
20 I Nuh nosunju vatu rapovia lanta pesomba ka Alatala.
Nialana sambaa-sambaa tonji bo binata ntanina anu nagasaa,
pade nidekeina pesomba nipalabu ri bavo lanta pesomba haitu.
21 Pesomba navangi haitu nompakasana rara nu Alatala,
bo niuliNa riara ntaiNa,
“Domo Kupindasi dunia hitu sabana pokainggu nu manusia.
NisaniKu lako ri tempo kakodina pekiri manusia haitu nadaa.
Domo Kupakaropu hanupa pura-pura anu natuvu,
eva anu dako naliu nipoviaKu hitu.
22 Bo savesia kasaena dunia hitu maria,
ledo maupu tempo motuda bo tempo mokato,
tempo ranindi bo tempo nggapane,
tempo nangau bo tempo uda,
eona bo bongina.”