Uve Oge
7
Naliu haitu niuli nTUPUmo ka i Nuh:
“Pesuamo komiu sanjou hau riara njakaya tutu,
sabana nikitaKu aga iko saitomu nanoa ri panggitaKu ri tatanga ntodea sii-sii.
2-3 Keni pitu-pasa lako ri mpengaya tonji bo binata ntanina anu nagasaa,
bo binata ledo nagasab kambana sapasa sangaya.
Poviamo haitu ala mpengaya-ngaya binata maria masalama lako ri katunana bo malinju ri dunia.
4 Pitu-eopa Kupopanaumo uda anu ledo matoro-toro sampe patapulu eo bo patapulu bongi kasaena.
Ivesiamo Kupakaropu pura-pura anu natuvu ri kabatana nipajadiKu.”
5 Jadi nipovia i Nuhmo anu niparenta nTUPU ka ia.
6 I Nuh noumuru (600) onoatu mpae tempo uve oge nombatutui njumangu dunia.
7 I Nuh njamboko,
bo anana nte maniana,
nesua riara njakaya haitu mompakasalama karora lako ri uve oge.
8-9 Mpengaya-ngaya tonji bo binata ntanina anu nagasa bo anu ledo nagasa nopasa-pasa nesua singgani nte i Nuh hau riara njakaya haitu,
nangoseaka parenta nu Alatala.
10 Naliu haitu ri eo kapapituna,
nakavamo uve oge nombatutui dunia.
11 Tempo i Nuh noumuru (600) onoatu mpae,
haitumo tanggala sapulu papitu bula randua,
nembokamo pura-pura mata nu uve lako ri tambe ntana.
Pura-pura mata nu uve ri laerava nemboka,
12 bo naudamo patapulu eo bo patapulu bongi.
13 Ri eo haitu muni i Nuh njamboko nesua riara njakaya haitu nosinggani-nggani ante anana tatalu;
haitumo i Sem,
i Ham bo i Yafet ante berei-bereira.
14 Tonji bo binata ntanina muni nesua nosinggani nte ira sangaya-sangaya,
anu nanaya bo anu navura,
kodina bo mbasona.
15 Sapasa-sapasa lako ri mpengaya-ngaya binata natuvu nesua ranjakaya nosinggani-nggani nte i Nuh,
16 nangoseaka parenta nu Alatala ka i Nuh.
Naupu purapa ira nesua,
nitutui nTUPUmo vamba njakaya.
17 Patapulu eo bo patapulu bongi kasaena uve oge haitu nombatutui dunia.
Uve haitu nantambai kaogena bo nombananggosaka sakaya i Nuh,
sampe nalanga ntotomo lako ri bavo ntana.
18 Tempo uve oge haitu nantambai pompenena ri bavo ntana,
nonanggo-nanggomo sakaya haitu ri bavo nu uve.
19 Bo uve haitu nantambai njuumo kaogena nombatutui tana,
sampe bulu-bulu nalanga nalome pura,
20 sampe pitu-metere kalangana lako ri vuntu nu bulu langa.
21-23 TUPU nompakaropu pura-pura anu natuvu ri dunia haitu:
manusia,
tonji bo binata ri kabatana nau nakodi nau nambaso.
Aga i Nuh bo anu naria nosinggani nte ia ranjakaya ledo namate.
24 Uve notampunisi dunia (150) saatu limapulu eo kasaena.