Kadaa nu Manusia
6
Tempo nadeamo manusia ri dunia,
bo ngana-ngana mombine nipoanaka,
2 nipeinta malaeka nu Alatala nagaya mpuu manusia mombine gahaitu.
Jadi nialara sanu mombine gahaitu anu nipokonora bo nipobereira.
3 Notesamo TUPU:
“NosaKu ledo monturo riara manusia sampe ri kasae-saena,
sabana ira aga manusia bo kana mamate.
Mompamula hitu-hitu umurura ledo melabi lako ri saatu ropulu mpae.”
4 Ri tempo haitu naria tona nambaso natuvu ri dunia,
bo ri tempo maliu haitu muni.
Ane malaeka nu Alatala nosimperou nte manusia mombine,
mombine-mombine gahaitu moanaka tona nambaso.
Tona nambaso haitumo tadulako-tadulako naroso ri tempo nggaulu,
haitumo tona nipokumaaka.
5 Nipeinta nTUPU nadaa mpuu manusia,
bo pura-pura pekirira aga daana bayangi,
ledo ria nabelo.
6 Jadi TUPU mpuu-mpuu nabuku raraNa bo nanjoso raraNa nompajadi manusia ri dunia.
7 Notesamo TUPU,
“Kupakaropu manusia nipajadiKu bo muni binata bo tonji-tonji ri laerava.
Nanjoso raraKu nompajadi ira.”
8 Tapi i Nuh nompakadamba rara nTUPU.
Tesa Katuvu I Nuh
9 Iveimo tesa katuvu i Nuh:
i Nuh ledo nasala bo aga ia saitona nanoa ri tempo haitu,
bo ia novega rapa nte Alatala.
10 I Nuh nomulika tatalu ngana langgai:
i Sem,
i Ham,
bo i Yafet.
11 Manusia ri dunia nadaa mpuumo ri panggita nu Alatala bo dunia naponu ante kaseserakara.
12 Alatala nompeinta dunia bo aga daana bayangi nikitaNa,
sabana pura-pura manusia nadaa katuvuna.
13 Pade notesamo Alatala ka i Nuh,
“NibotusiKumo mompakaropu manusia.
Dunia naponumo ante kasesera,
jadi Kupakaropu ira bo dunia.
14 Poviamo sangu sakaya mbaso lako ri kayu nakaa.
Sakaya haitu mutombi-tombi,
ri savalikuna bo riarana kana mutapiki ala ledo mesua uve.
15 Poviamo sakaya,
kambasona 133 metere lampana,
kaluona 22 metere,
bo kalangana 13 metere.
16 Poviamo ata nu sakaya haitu,
kalavana 44 senti ri olo nu ata bo rindi-rindina.
Poviamo sakaya talu unju sunjuna,
bo povia vambana ri tampana.
17 Kuparenta uve oge mombatutui pura-pura tana ala mompakaropu pura anu natuvu ri dunia.
18 Tapi Kupovia pojanji ante iko.
Pesuamo riara nu sakaya mosinggani-nggani nte bereimu,
bo ana-anamu ntali-njamboko.
19-20 Kenimo simbo sapasa lako ri mpengaya-ngaya tonji,
bo binata ntanina,
ala ledo matuna.
21 Keni muni anu rakandemiu bo anu rakande nu binata-binata haitu.”
22 I Nuh nombaturusi pura-pura anu niparenta nu Alatala ka ia.