I Kain bo I Habel
4
Naupu haitu,
i Adam nosampaturu nte bereina i Hawa.
Natianamo i Hawa bo noanaka saito ngana langgai nipoposanga i Kaina.
I Hawa nanguli,
“Ante petulungi nu Alatala yaku noanaka saito manusia.”
2 Nambaso i Kain,
nipoanaka vai saito ngana langgai nosanga i Habel,
tuei i Kain.
I Habel najadi topoevu bo i Kain najadi topotalua.
3 Naria saeo i Kain nangala sabagia lako ri asele ntaluana pade nikenina rapesomba ka TUPU.
4 I Habel nangala sangu ana bimba lumbua,
pade nisambalena bo nipesombakana ka TUPU bagia tobelona.
TUPU nadamba nte i Habel bo pesombana,
5 tapi pesomba i Kain ledo nitarimaNa.
Nagigi mpuu rara i Kain bo nakuru lenjena.
6 Nanguli TUPU ka i Kain,
“Nee magigi raramu.
Nee makuru lenjemu.
7 Ane mabelo anu nipoviamu,
tantu madamba raramu bo pesombamu ratarima.
Tapi pakabelo-belo!
Ane ledo mabelo anu mupovia hitu-hitu,
domo mamala mutaamaka dota rara movia dosa.
Dota rara movia dosa nasimbayu mpo binata nasoa nepopea ri savaliku nu vamba mombasaka iko.
Apa naoge mpuu rarana mombadagi iko,
tapi kana mupasimbuku mombadagi ia.”
8 Tapi haumo i Kain nanguli ka tueina i Habel,
“Hau ranggarava kita.”
Nakava hamai,
sampesanika i Kain nombabaga tueina bo nipatesinamo.
9 Pade nanguli TUPU ka i Kain,
“Umbamo tueimu i Habel?”
Nesana i Kain,
“Ledo nisaniku.
Ledo yaku topopaa tueiku!”
10 Pade TUPU nanguli,
“Nakuya sampe iko novia anu nadaa ivehitu?
NikitaKu raa ntueimu nisonde ntana.
NiepeKu suara ntueimu nombaronde Yaku ala topompatesi ia rahuku.
11 Jadi iko rapindasi bo rapopalai lako ri tana hitu,
sabana iko nompatesi tueimu bo raana nisonde ntana.
12 Ane iko mokarajaa tana,
domo matuvu nuapa-nuapa.
Iko aga hau tumai bo ledo maria ponturomu.”
13 Nesana i Kain ka TUPU,
“Nantamo gaga pehuku hitu!
14 Pue!
Eo hitu Komiu nompopalai yaku lako ri tana hitu bo domo mamala yaku makava ri ngayoMiu.
Yaku aga hau tumai,
bo ledo maria ponturoku.
Isema-sema manggita yaku ngena,
aga rapatesina yaku.”
15 Tapi nesana TUPU,
“Ledo nakana.
Isema-sema mompatesi iko,
ia rahuku.
Bo pehuku haitu pitu-nggani kantamona pade pehuku nipambela ka iko.”
Naupu sia TUPU nombadika tanda ka i Kain,
ala isema-sema manggita tanda haitu,
ledo mompatesi ia.
16 Jadi i Kain nalai lako ri ngayo nTUPU bo nonturo ri bagia Nodb,
ri bagia mpandake nu Eden.
Muli I Kain
17 I Kain nosampaturu ante bereina,
bo natianamo bereina.
Naupu haitu ia noanaka i Henokh.
Tempo haitu i Kain nombangu sangu ngata.
Nipoposangana ngata haitu ngata Henokh nantuntuni sanga nu anana.
18 I Henokh nomulika i Irad.
I Irad tuama i Mehuyael.
I Mehuyael tuama i Metusael,
bo Metusael tuama i Lamekh.
19 I Lamekh noberei randua.
Bereina paratama nosanga i Ada bo bereina karanduana nosanga i Zila.
20 I Ada nompoanaka saito ngana langgai nosanga i Yabal,
bo muli i Yabal nonturo ri rovu bo noevu japi.
21 Tuei i Yabal nosanga i Yubal bo muli i Yubal topokacapi bo toposuli.
22 I Zila,
berei i Lamekh karanduana,
noanaka saito ngana langgai,
sangana i Tubal-Kain.
Ia najadi topompempe,
bo napande novia mpengaya-ngaya pareva lako ri ase bo gala.
Tueina mombine nosanga i Naama.
23 Naria saeo i Lamekh nangoe ri ngayo bereina ntali-samarue ante dade hitu,
“Ada,
Zila,
epe tesaku!
Nipatesiku saito kabilasa sabana ia nombaboba yaku.
24 Ane rapatesi ntona tupuku i Kain,
pitu-nggani kantamona pehuku ka tona haitu pade pehuku ka i Kain.
Tapi ane yaku rapatesi,
pitupulu pitu-nggani kantamona pehuku ka topompatesi yaku!”
I Set bo I Enos
25 Naupu i Habel nipatesi i Kain,
i Adam nosampaturu vai ante bereina bo natianamo bereina.
Nasae-sae noanaka vai saito ngana langgai.
Niuli i Hawa,
“Alatala nombadekei ka yaku saito ngana langgai posambei i Habel anu nipatesi i Kain.”
Haitu sampe nipoposanga ngana haitu i Setc.
26 Nambaso i Set,
nomulika saito ngana langgai nosanga i Enos.
Tempo haitu manusia nompamulamo nanggasangai sanga nTUPU ane nosambaya.