Manusia Nobali Ante Alatala
3
Ule nataupa pade pura-pura binata ntanina nipajadi nTUPU Alatala.
Naria saeo Ule nompekutana mombine,
“Nakana Alatala nantagi komiu mangande vua lako ri pura-pura kayu ri Pampa hitu?”
2 Nesana mombine,
“Ledo ivesia.
Namala kami nangande vua lako ri pura-pura kayu ri Pampa hitu.
3 Aga vua lako ri kayu ri tatanga nu Pampa hitu ledo nidekeiNa rakande kami.
Ledo muni nidekeiNa kami mombatuina.
NiuliNa mamate kami ane mangande atau mombatui vua kayu haitu.”
4 Nesana Ule,
“Ledo nakana!
Ledo mamate komiu!
5 Nisani nu Alatala ane rakandemiu vua haitu manotomo raramiu.
Komiu majadi mpo Alatala muni,
rasanimiumo anu nabelo bo anu nadaa.
Haitu sampe niuliNa ka komiu ivesia.”
6 Mombine haitu nanggita vua nu kayu pangane nabelo mpuu.
Marasa mpuu rakande.
Naoge rarana mangisani anu nabelo bo anu nadaa.
Haitu sampe nipupuna vua haitu bo nikandena.
Nidekeina muni vua haitu ka bereina langgai anu naria ri sia nte ia bo nikande nu bereina munimo.
7 Naupu sia nanotomo rarara bo nisanira ira novuloa.
Jadi ira nodau tava napekaa rapovia pevo.
8 Nggoviana haitu,
ira njamboko nangepe TUPU Alatala nanjayo ri Pampa.
Niepera Alatala nanjayo,
nalai ira netabuni ri olo kayu dea ala ledo rakita nu Alatala.
9 Tapi TUPU Alatala nombaronde langgai haitu,
“Adam,
ri umba iko?”
10 Nesana langgai,
“Niepeku Komiu nanjayo ri Pampa.
Naeka yaku apa novuloa.
Jadi yaku nalai netabuni.”
11 Nesana Alatala,
“Isema nanguli iko novuloa?
Nikandemumo tano vua nitagiKu mukande!”
12 Nesana langgai,
“Mombine anu nidekeiMiu nomporoa yaku haitu,
iamo nombadekei vua kayu ka yaku,
bo nikandeku.”
13 Naupu sia TUPU Alatala nompekutana mombine,
“Nokuya bo nipoviamu anu tutu?”
Nesana mombine,
“Ule haitu nombabagiu yaku sampe nikandeku vua kayu haitu.”
Alatala Nombahuku Manusia
14 Naupu sia TUPU Alatala nanguli ka ule,
“Iko mpuu-mpuu nasala.
Jadi iko rahuku.
Iko rapindasi melabipa pade pura-pura binata ntanina.
Lako ri eo hitu iko menjoyo-njoyo ri tana bo tana majadi pangandemu savesia kasaena katuvumu.
15 Iko nte mombine mosipovuu mata.
Ivesia muni mulimu nte muli nu mombine.
Mulina mombatampadusi pakaoya balenggamu bo iko mombateo tampadu muli nu mombine.”
16 Pade TUPU Alatala nanguli ka mombine,
“Nasala mpuu iko.
Jadi Yaku mompakadua iko ri katianamu.
Tempo moana madua mpuu murasai.
Tapi naupa ivesia,
kana maoge raramu mosanggani nte bereimu,
bo ia mombabalenggai iko.”
17 Pade nanguli vai TUPU Alatala ka langgai,
“Iko muni rahuku,
apa iko nantalingai tesa nu bereimu sampe nikandemu vua nitagiKu.
Rapindasi tana,
sabana panggaviamu!
Mandasa ngena iko mangelo anu mukande savesia kasaena katuvumu.
18 Timpo bo lari matuvu ri tana.
Bo iko mangande anu natuvu ranggarava.
19 Iko mokarajaa ntamo mabubu ini mompaelo anu rakande.
Ivesia sampe iko mamate bo manjili vai majadi tana.
Apa iko nipajadi lako ri tana bo majadi tana mpanjili.”
20 I Adam nompoposanga bereina i Hawab,
apa ia majadi tina pura-pura nu manusia.
21 Naupu sia TUPU Alatala novia baju lako ri kuli binata ka i Adam bo bereina,
pade nidekeiNa ka ira rapasuara.
I Adam nte i Hawa nipopalai lako ri Pampa Eden
22 Naupu sia TUPU Alatala nanguli,
“NikitaKu manusia najadi mpo Kitamo,
nisanira anu nabelo bo anu nadaa.
Ledo mabelo ane radekei ira mompupu bo mangande vua lako ri kayu nombadekei katuvua.
Apa ane rakandera vua haitu,
ira matuvu sampe ri kasae-saena.”
23 Jadi TUPU Alatala nompopalai manusia lako ri Pampa Eden ala ira mokarajaa tana.
Ira nimandu lako ri tana bo lako ri tana muni rapompaelora katuvuara.
24 Naupu TUPU Alatala nompopalai manusia lako ri Pampa haitu,
nipoponturoNamo malaeka-malaeka nalanga nturonac ri sia,
mojagai bobaa pesua hau ri Pampa Eden,
ri bagia mpandakena.
Naria samata guma nte topojaga haitu.
Guma haitu navaya bo nanggasoe hau tumai ala ledo rapakule ntona manggaparai kayu anu nombadekei katuvua haitu.