2
Ivesiamo Alatala nompakaupu pompajadiNa langi bo dunia ante pura-pura isina.
2 Eo kapapituna,
nenontomo Alatala apa naupumo pura-pura panggaviaNa.
Jadi eo kapapituna Ia ledo nokarajaa.
3 Alatala nompakaoge bo nombataniaka eo kapapituna haitu majadi eo penonto.
Apa eo kapapituna notondodomo Ia.
4 Ivesiamo Alatala nompajadi langi,
dunia,
bo pura-pura isina.
I Adam bo i Hawa
Tempo TUPU Alatala nompajadi langi bo dunia,
5 dopa naria anu natuvu ri tana apa TUPU Alatala dopa nompopanau uda ri dunia,
bo dopa ria manusia mombakarajaa tana.
6 Tapi naria uve nenjisi lako ri tambe ntana nombabanggasi tana.
7 Jadi TUPU Alatala nangala tana bo nomandu manusia.
Pade nisuarakaNa nosaNa ri onge nu manusia ala manusia haitu matuvu.
8 Naupu sia,
TUPU Alatala novia pampa ri Eden ri bagia pandakena bo ri siamo nipoponturoNa manusia nipajadiNa.
9 TUPU Alatala nompakatuvu mpengaya kayu,
kayu nagaya bo kayu nabelo vuana rakande.
Ri tatanga nu pampa haitu naria ronggayu kayu,
sanggayu nombadekei katuvua ka manusiaa bo sanggayupa nompopaisani anu nabelo bo anu nadaa.b
10 Naria sangu binangga noili lako ri Eden nombauvesi pampa haitu.
Ri savaliku Pampa Eden binangga pangane nopenga pata-mpenga.
11 Pengana paratama nipoposanga Pison.
Pengana haitu noili nolintiku tana Hawila.
12 (Ri tana Hawila nagasa mpuu bulava nikava ri sia.
Naria muni dupa navangi bo vatu losa.)
13 Penga karanduana nosanga Gihon.
Uvena noili nolintiku tana Kus.
14 Penga katataluna nosanga Tigris bo binangga haitu noili ri bagia mpandake tana Asyur.
Penga kaampana nosanga Efrat.
15 Jadi TUPU Alatala nangala manusia pangane bo nipoponturoNa ri Pampa Eden rapopokarajaa bo mombajagai pampa haitu.
16 TUPU Alatala nangulika manusia haitu ivei:
“Pura-pura vua kayu ri pampa hitu mamala nukande.
17 Tapi,
vua kayu anu nompopaisani anu nabelo bo anu nadaa,
ledo namala mukande.
Apa ane mukande vua haitu,
natantumo iko mamate ri eo haitu muni.”
18 TUPU Alatala nanguli,
“Ledo nabelo manusia natuvu saitona.
Kupajadi saitopa momporoa bo mantulungi ia.”
19 Dopame haitu,
TUPU Alatala nangala sakide tana bo nomandu mpengaya binata ri tana bo tonji ri laerava.
Pura-pura binata pangane nikeni nTUPU Alatala ka manusia,
rapeintaNa sanga nuapa rapoposanga nu manusia ka binata haitu.
Sanga nipoposanga nu manusia ka binata haitu,
haitumo sangana.
20 Tapi lako ri pura-pura binata bo tonji pangane,
ledoria sangua nikava natao momporoa bo mombatulungi manusia.
[Sanga nu manusia haitu i Adam].
21 Jadi TUPU Alatala nompaluru i Adam namonjo.
Da ranja nggamonjo ia,
TUPU Alatala nombaosu sampeka buku nu usu lako ri karo i Adam,
bo nitutui belana nte isi.
22 Lako ri buku nu usu haitu,
TUPU Alatala nompajadi saito mombine.
Nanotopa rara manusia haitu,
TUPU Alatala nombadekei mombine haitu ka ia.
23 Nangulimo i Adam,
“Hitumo ia!
Manusia nasimbayu nte yaku!
Bukuna lako ri bukuku,
isina lako ri isiku.
Kupoposanga ia ‘Mombine’c apa ia lako ri karoku,
langgai.”
24 Haitumo sampe langgai nompalaisi tina tuamana bo matuvu mosanggani nte bereina,
bo ira randua kana mosangu raramo.
25 Langgai pangane ante bereina mombine novuloa tapi dopa naria eya matara.