I Yusuf bo sampesuvu-sampesuvuna
37
I Yakub naroo ri tana Kanaan, ri ngata ponturo ntuamana. 2 Bo iveimo tesa katuvu i Yakub sambanua:Tempo i Yusuf, ana i Yakub noumuru sapulu papitu mpae, ia nosinggani-nggani nte tuaka-tuakana nangurusi gimpu-gimpu bimba bo tovau ntuamana. Tuaka-tuakana haitu ana-ana i Bilha bo i Zilpa, berei piara ntuamana. I Yusuf nompangadu ka tuamana pura-pura anu nadaa nipovia ntuakana.
3 I Yakub nompotovepa i Yusuf pade anana ntanina, sabana i Yusuf nipoanaka tempo ia natuamo. Naria saeo tuamana nekipovia baju nagaya ka i Yusuf. 4 Nisani ntuakanapa tuamara nompotovepa i Yusuf pade ira, naraumo rarara nte i Yusuf sampe domo nadota ira notesa nabelo nte ia.
5 Naria sambongi i Yusuf nangipi, bo nitesana ka tuakana pangipina haitu, jadi nantambaimo karau rara ntuakana ka ia. 6 I Yusuf nanguli ka ira, “Epe vei! 7 Yaku nangipi kita pura-pura naria ri talua nompou gando, gandoku neangga nanoa. Gandomiu nobanda nombatiku gandoku.”
8 Nanguli tuakana ka ia, “Pangulimu iko majadi magau bo mombakuasai kami?” Jadi nantambaimo karau rara ntuakana nangepe pangipi nitesana.
9 Naliu haitu, nangipi vaimo i Yusuf, bo niulina vai ka tuaka-tuakana, “Nangipi vai yaku, nikitaku mata nu eo, bula, bo sapulu sangu betue nombasomba yaku.”
10 Pangipina haitu niulina muni ka tuamana, bo tuamana nosalaraka ia, ivei, “Pangipi nuapa ivetutu? Nipekirimu yaku, tinamu bo sampesuvu-sampesuvumu mombasomba iko?” 11 Tuaka-tuakana nasiriati nanggita i Yusuf, tapi tuamana kana nantanondoaka pangipi nu anana haitu.
I Yusuf nipobalu bo nikeni hau ri tana Mesir
12 Naria saeo, tuaka-tuaka i Yusuf hau ri ngata Sikhem noevu bimba bo tovau ntuamara. 13 I Yakub, anu nidae i Israel, nanguli ka i Yusuf, “Koi hau ri Sikhem, ri poevu ntuakamu binatata.”
Nesana i Yusuf, “Iyo.”
14 Nangulimo tuamana, “Peinta bara berimbamo tuakamu bo binatata. Maupu sia panjilimo iko tumai manguli ka yaku.”
Jadi nalaimo i Yusuf lako ri banuara ri lemba Hebron. Nakava i Yusuf ri ngata Sikhem nielonamo tuaka-tuakana. Da nolipa hau, 15 niposinggavakanamo saito langgai. Tona haitu nompekutana ia, “Nuapa nielomu?”
16 Nesana i Yusuf, “Tuaka-tuakaku. Ira noevu binata. Nisanimiu, riumba ira?”
17 Tona haitu nesana, “Nolinjamo ira lako ri sii. Niepeku ira nanguli hau ri ngata Dotan.” Jadi haumo i Yusuf nantuntuni tuaka-tuakana bo nikavana ira napara ngata Dotan.
18 Da nggavaona nikitaramo i Yusuf, bo dopame ia nakava, nasintuvumo ira mompatesi ia. 19 Nosimpotesamo ira, “Peinta, tumaimo pande mpangipi. 20 Anumo, rapatesita ia bo ranavusakata karona ra buvu bai. Raulita ngena ia nikandesi binata nadaa. Rapeintata berimbana ngena jadina pangipina haitu!”
21 I Ruben nangepe niara haitu, jadi nompasimbukumo ia mompakasalama i Yusuf. Niulina, “Nee rapatesita ia. 22 Aginamo ranavusakata ra buvu ri karava bai hitu, bo nee rabobata bara rapakabakata ia.” Niuli i Ruben ivesia, sabana ia madota mompakasalama i Yusuf bo manggeni ia mpanjili hau ri banua.
23 Nakavapa i Yusuf ante tuaka-tuakana, nivonjusiramo baju gayana. 24 Pade nijuunakaramo i Yusuf hau riara buvu bai.
25 Naliu haitu, nangandemo ira. Da ranja mpangande, sampesanika nikitara bara sakondua topogade nompanuntu noliu nte untara. Ira haitu toMidian, muli i Ismael lako ri bagia Gilead hau ri tana Mesir. Unta-untara nombaulaya rampa-rampa, pakuli bo dama. 26 Jadi nangulimo i Yehuda ka sampesuvu-sampesuvuna, “Nuapa gunana mompatesi tueita bo mombatabuniaka pepatesi haitu? 27 Aginamo ia rapobaluta ka muli i Ismael moitu. Neemo rapakaduata ia. Nau berimba, ia tueita mboto.”
Sampesuvu-sampesuvuna nasintuvu, 28 Jadi tempo toMidian gahaitu noliu, nisoreakaramo i Yusuf lako riara buvu haitu, bo nipobalura ka toMidian ropulu mpeka doi salaka. Naliu haitu nikeni ntopogademo ia hau ri tana Mesir.
29 (Tempo ira nompobalu i Yusuf, ledo naria i Ruben.) Jadi nanjilipa i Ruben nipeintana ri buvu. Nikavana domo naria i Yusuf ri sia, jadi nibitesinamo pakeana mboto sabana nabuku rarana. 30 Naliu haitu, nanjilimo i Ruben hau nte sampesuvu-sampesuvuna bo nanguli, “I Yusuf domo naria riara buvu. Nuapamo kupovia?”
31 Naliu haitu, nisambaleramo sangu tovau bo nitomera baju i Yusuf ri raa ntovau haitu. 32 Naupu sia nituduramo tona nanggeni baju haitu ka tuamara ante petevai, “Baju hitu nikava kami. Paresa vei, bara baju nu anamiu?”
33 Nisani i Yakub baju haitu, bo niulina, “Nakana mpuu, hitu baju nu anaku. Tantu mamimo ia nisaka nu binata nadaa. Oranga! Anaku i Yusuf namatemo nikandesi nu binata!”
34 I Yakub nombabitesi bajuna mboto, tandana nabuku mpuu rarana nantora kamate i Yusuf. Bo eo-eo ia nompasua pakea nipovia dako ri karu, tanda kabuku nu rarana nantora anana anu nipotovena ntoto. 35 Pura-pura anana, mombine bo langgai, nakava mombaondopi ia, tapi ia ledo nadota niondopi. Niulina, “Sampe mamate yaku kana kutangisi njuu anaku.” Ivesiamo kabuku nu rarana sabana anana i Yusuf.
36 Tempo haitu muni i Yusuf nipobalu ntoMidian ri Mesir rapajadi batua. Ia niali i Potifar, tomaoge ri tana Mesir. I Potifar haitu pakeni ntopojaga banua nu magau.