Nyɛlatana nyɛ́ ɛtɛ́má aá hiɔ́bɔ hí belumitinine noómi
4
1 Yaátɛ́ asana,
a bɛsana eébí bikime,
ɛ ŋa mɛ́ banɔ́ báta anyía énu búle kɛ́la bɛsana a bɛ́ ŋaá bá bíé bílénékíne Bandɔ́mɛsɛ́ o otúme ekúlú ayɛ́ u ŋaá banɔ́ lɔ́ŋɔ́kɔ́.
Énu menyí anyía yaŋɔ́ ooci aámbáya eé ciíbe cɛ ɛcaná noómi anyía ɛ ŋa mɛ́ nyiɔnɔ Otéŋí a Waáŋá buólí.
2 Énu bílóósíki bikúlú bikime ;
núɔ́ bámɔ́kɔ́na mbuumu cɛ́ baacɔ,
nu eéhíkínyínyi banɔ́ na banɔ́ e nulénéne noómi.
3 *Efúúménénú yí Elilé yɛ́ ŋa banɔ́ iínjie mbuumu ɛ ɛtɛ́má noómi,
mbuumu eécí ŋaá banɔ́ láta e nyimónjóló noómi.
Aáná nuánɔ́ nyɛmana nú ɔbɛ́kɛ́ndákɛ́na o búle kuline nyɛlatana nyí nyimónjóló eényí aanɔ́ ɛ ɛkatɛ́katɛ́.
4 Yááŋa anyía,
cɛɛ́tɔ ci *Kilís áŋa hú ciíci ɛ́mɔtɛ́,
ɛ́cɛ anyía hiɔ́bɔ hí belumitinine ;
Efúúménénú yí Elilé áŋa hú yiíyi ɔ́mɔtɛ́,
híáná tɔ́na bɔkɔ abɔ́ Bandɔ́mɛsɛ́ ŋaá banɔ́ lɔ́ŋɔ́kɔ́ anyía nuánɔ́ háya mɔŋɔlɛ́ eé buúbu áŋa hú bɔ́mɔtɛ́.
5 Otéŋí a Waáŋá áŋa hú wuúci ɔmɔtɛ́ ;
ɔháya mɔŋɔlɛ́ né Kilís áŋa hú wuúci ɔmɔtɛ́,
aáná tɔ́na *obíótíne áŋa hú wuúci ɔ́mɔtɛ́.
6 Bandɔ́mɛsɛ́ áŋa hú wuúci ɔmɔtɛ́,
wáŋa Síkíne cɛ baacɔ bekime,
u ŋeé téŋínyi ɔhuálɔ́ okime,
u ŋa bɛ́kɛ́lɛ́na baacɔ bekime,
wuúci tɔ́na náábɔ́ eé beébe bekime.
7 Yááŋa anyía Kilís ŋe yíínjie ɔɔcɔ okime aá basɔ́ hú náányɛ́ nyíáyɛ́ nyɛnamá nyí buólí a yááyɛ́ yaála yí nuubo.
8 Buátɛ́ bɔkɔ yááŋa yɔ́ɔ́ŋɔ́kɔ́nɔ́ anyía :
« Ekúlú ayɛ́ u ŋaá báátáka ɔ Ɔmuaná ɔ ɔhɔla ɛŋɔ́lɔ́muaná,
u ŋaá báátákána baacɔ ebé u ŋe tíŋéke,
yó wiínjíékíne baacɔ moólí. »*
9 Mbá aátɛ́ yááŋa anyía « u ŋaá báátáka » e ?
Bú ŋe bíhémbúle anyía u ŋa cáŋacáŋa ɔlɔ́ɔ i injibí cɛ ɔmɛsɛ́.ª
10 Ɔɔcɔ awɔ́ u ŋɔɔ́ lɔ́ɔkɔ,
wuúci tɔ́na u ŋáa báátáka ɔ Ɔmuaná ɔ ɔhɔla ɛŋɔ́lɔ́muaná anyía mbá weé téŋgínyi a bɛhaála bikime bɛnyɛ́ma bikime.
11 Wuúci u ŋa kɛ́láka anyía baacɔ a bɔ́mɔtɛ́ á bámɔ́kɔ́na baacɔ bá ɛndɔ́ma,
a bɔ́mɔtɛ́ *behémúnyi bɛsana bá Bandɔ́mɛsɛ́,
a bɔ́mɔtɛ́ behulinyi bɔsɔ́ɔ́kɔ́ Ambányɛ yɛ́ Ɛsɔ́ma,
a bɔ́mɔtɛ́ tɔ́na bootonono ta anyía beékúnyi bɛsana.
12 U ŋeé télímíkínyí baacɔ eébé aáná anyía bábɔ́ bá na makɛ́nda me o wuúci nyiɔkɛna buólí,
bó óombisiki cɛɛ́tɔ ci Kilís ɛ́cɛ anyía hiɔ́bɔ hí belumitinine.
13 Tu ká sɔ́ bá balatákánɔ́ e nyimónjóló basɔ́ bekime,
anyía tua sɔ́ŋa bɔɔ́nɛ́nánɔ́ ne o olumitinine noómi ne e nyimenyi nyɛ́ Ɔɔ́nɔ́ u Bandɔ́mɛsɛ́.
Aáná tu ká sɔ́ bámɔ́kɔ́na *baáŋá bá baacɔ bɛtálɛ́mánánɔ́,
bɔkɔ búmɔtɛ́ háyɛ Kilís.
14 Yaátɛ́ ekúlú,
tu tɛ ká háná asɔ́ bá háyɛ banásɛ́ ;
beébe,
baacɔ ŋe bú néŋe ne eékúnyi cá bɛfala,
bé beébe ndéŋelisiki i iŋetí cɛ ɔkɔkɔ́ ayɛ́ na bɛahɔ́ bí menyífé ne ehúne ŋé ndéŋelisi bɛhaála bikime aá nuɔmɔ́.
15 Mbá yááŋa anyía mbɔ́kɔ tú naŋa túásɔ́ kɔ́ɔnaka taaká tu lénékénéne basɔ́ na basɔ́,
tu ká sɔ́ ɔ́ɔmbɔ́kɔ bɛháŋá bikime,
tu cɔcɔbaka né Kilís a wáŋa aatɔ́.
16 Wuúci u ŋa kɛ́la anyía baacɔ bekime ábɔ́ bámɔ́kɔ́na balatákánɔ́ e nyimónjóló háyɛ cɛɛ́tɔ cɛ ɔɔcɔ áŋa ɛlatákánɔ́ na ɔɔŋɔ na tulaŋá.
Aáná ekúlú ayɛ́ bɔláŋá bɔ́ cɛɛ́tɔ bukime ŋé nyíóyísínyi buólí háyɛ yɛ́ ŋaá bɛ́ámba,
cɛɛ́tɔ ikime ŋa kɔ́ma bɔmbányɛ.
*Híáná yááŋa tɔ́na a hiɔ́bɔ hí belumitinine :
Ekúlú eyí belumitinine ŋe bú lénéne beébe ne beébe,
hiɔ́bɔ hí belumitinine hikime ŋa kɔ́ma,
hɛ́ ááŋánáka.
Yɔɔ́sɔɔ́sɔ yí olíhe ayɛ́ Bandɔ́mɛsɛ́ ŋé yííŋjíéne
17 Asana ayɛ́ míɔ cɔba ɔ ɔ banɔ́ laana o owoónyísínyi eé nyiínyi nyí uusú Otéŋí a Waáŋá íyéeye :
Nɔtɛ háná líhéke háyɛ be-ti-menyí Bandɔ́mɛsɛ́ ;
beébe bá náŋa bábɔ́ bɛ́tááka hú ɔkɛla bɛsana bí etémbí ne etémbí.
18 Ciíbú injiŋé áŋa i ibíne noómi ;
bá tɛ abɔ́ bá na nuafa ɔ yɔɔ́sɔɔ́sɔ yí olíhe ayɛ́ Bandɔ́mɛsɛ́ ŋé yííŋjíéne,
anyía bé ti ŋé bú menyi ta bɔkɔ,
beébe na bɛnatákánɔ́ bɛ́ ɛtɛ́má.
19 Bá tɛ ŋá háná abɔ́ lɔ́kɔ́ma aatɔ́ ɔlama,
bó bíínjíékíne ɔ ɔkɛla na mafala na anamánamá cá bɛsana cá mɔnyɔ́kɔ́lɔ́ ekime.
20 Mbá náánɔ́,
tɛ́ cáŋa aáná nú ŋa nɔ́ áákɔ́nákɛ́ná a asana a yɛ́ ŋa lɛ́ca *Kilís,
21 anyía nú ŋa nɔ́ lɔ́kɔ́máká bé bíkétíki bɔmbányɛ bɔmbányɛ bɛsana bikime e bí ŋe wuúci lɛca,
bɔ́ banɔ́ eékúnyíki taaká cɛ́ bɛsana a cɛ́áŋa né Yésus.
22 Nu ŋá nɔ́ nyɛmána nú ɔnyɛanaka aná bíánɔ́ bɛɛsɔ bɛ́ buáyá,
biíbi bɛ́ ŋaá bá bɛ́ a banɔ́ cáŋgɛna a asana na bɛɛbɛ́ bí ibíkéti a bɛ́ ŋaá bá bɛ́ a banɔ́ néŋéke.
23 Nu ŋá nɔ́ nyɛmána nú ɔbámɔ́kɔ́nɛ́na bɔmbányɛ bɔmbányɛ bɛɔ́sɔɔ́sɔ bɛ́ baacɔ na ɛ ɛtɛ́má noómi na ɔ ɔbɛ́táá noómi.
24 Ánɔ látákɛ́na yɔɔ́sɔɔ́sɔ yɛ́ nyɛbɛ́kɛ́lɛ́na anyɛ́ Bandɔ́mɛsɛ́ ŋe kéti ;
nyɛ́ ŋaá hɔ́á nyɛ́ Bandɔ́mɛsɛ́.
Nyɛ́áŋa taaká,
nyiínyi nyɛtálɛ́mánánɔ́,
nyiínyi nyifúúménénú tɔ́na.
25 Yaátɛ́ asana ánɔ nyɛanáka munéŋéne ;
hú naányɛ́ á laakɛ́na sɔ́ɔ́kɔ́ taaká,
anyía basɔ́ bekime tua sɔ́ŋa maláŋá ma cɛɛ́tɔ ɛ́mɔtɛ́.ª
26 Yáá háma anyía nuánɔ́ lɔ́kɔ́ma olóbi,
énu bíkékényíki ɔkɛla asana a yaabɛ́.
ª Ɔɔ́cɔ́ tɛ ka fianɛna ɛ́cɛ nua nuanáŋa ɔ ɔlɔ́kɔ́ma olóbi.
27 Nuti iínjíé Musɔ́mɛ́na ohónyí.
28 Ɔɔcɔ okime awɔ́ u náŋa we yeébéke tɛ háná éébe ;
mbá wé búle lɛca muuyé ɔ ɔnyiɔ buólí na cááyɛ́ aabá,
u hɔ́máka mɔɔnyɛ́.
Aáná u káá bá na bɔkɔ bɔ́ ɔwɔɔ́lɔ́kɔ basɔ́kásɔ́ka.
29 Nuti hémúkúnyi bɛahɔ́ a cáánɔ́ eété,
mbá maanɔ́ mehúnyi ŋá nyɛmána me okíndísíki olumitinine,
ma ɔɔ́lɔ́kɔ ba-banɔ́-lɔ́kɔ́ma.
30 Nuti líŋísíki *Efúúménénú yí Elilé ;
yiíyi yááŋa hibílícínyínyí ahɛ́ Bandɔ́mɛsɛ́ ŋaá banɔ́ háyá o otóŋínyi anyía nua nɔ́ŋa bááyɛ́ ;
hibílícínyínyí eéhí áŋa afacɛ́ e yí ŋo tóŋínyi anyía Bandɔ́mɛsɛ́ káá banɔ́ háŋɔ́náka buúse bukime a bɔɔbɛ́ e ekúlú a yɛnyɛmánánɔ́.
31 Ánɔ nyɛánáka ɔlɔ́kɔ́ma na ɔtɛ́má ɔnua,
ne tuliŋéliŋe,
ne tulóbi ;
ánɔ nyɛánáka tɔ́na na ɛsáká na muɔ́mbɔ́nána ;
ánɔ nyɛánáka nyɛnamá nyɛ́ nyɛŋána nyikime.
32 Mbá ánɔ bámɔ́kɔ́na na nukasa ne nuubo aanɔ́ ɛ ɛkatɛ́katɛ́ ;
nu nyɛánakanana tɔ́na háyɛ Bandɔ́mɛsɛ́ ŋaá banɔ́ª nyɛánákɛ́nɛ́na e elime ci Kilís.