Buólí ebú Bóol ŋɔɔ́ nyiɔ́nɔ baacɔ a bá tɛ abɔ́ bá Besuif
3
1 Yaátɛ́ asana,
yaŋɔ́ Bóol ɛ naŋa yámɛ bɛ́cɔ́kɔ́lɔ́kɛ́na Bandɔ́mɛsɛ́.
Ya mɛ́ŋa eé ciíbe cɛ ɛcaná eé buúse bú Yésus *Kilís a yáánɔ́ asana,
banɔ́ abá nu tɛ anɔ́ bá *Besuif.ª
2 I ŋe mí menyi bɔmbányɛ,
nu ŋa nɔ́ lɔ́kɔ́máka bé bíkétíki anyía Bandɔ́mɛsɛ́ ŋeé mi iínjíé buólí eébú a yááyɛ́ yaála yí nuubo anyía yámɛ banɔ́ nyiɔkɛna.
3 Bandɔ́mɛsɛ́ ŋeé mi tóŋínyí nyíáyɛ́ nyɛtákɛ́na nyɛ́ bɛsana anyɛ́ ú ŋa námbɛ́na baacɔ háyɛ yámɛ cáŋa ɔ kɔtɛtɛna ɔwɔɔ́ŋɔ e nufule eenu.
4 Núénú nuúnu fanáka,
nu ŋa nɔ́ cɔ́ba ɔ ɔlɛca anyía i ŋe mí menyi bɛsana a bɛnambákánɔ́ a bɛ́ ŋa lɛ́ca Kilís.
5 Buáyá,
Bandɔ́mɛsɛ́ ti ómo tóŋínyi baacɔ asana eéyé.
Aámbáya ú ma námbɔnɛna na bááyɛ́ baacɔ bá ɛndɔ́ma na bááyɛ́ *behémúnyi bɛsana e befúúménénú a makɛ́nda ma yááyɛ́ Elilé.
6 Asana yí indiitie eéyé áŋa anyía baacɔ a bá tɛ ábɔ́ bá Besuif á bɔ́áŋa na nuafa a bɛnyɛ́ma abɛ́ Bandɔ́mɛsɛ́ ŋaá batɛ́ákɛ́nɛ́na bááyɛ́ baacɔ ;
bá búáŋa háyɛ maláŋá ma cɛɛ́tɔ ɛ́mɔtɛ́,
beébe tɔ́na ɛ ɛndána noómi acɛ́ Bandɔ́mɛsɛ́ ŋaá hɔlɛna né Yésus Kilís o o beébe bɛ́tánɛ́na.
Bɛsana bikime eébí áŋa anyía bé me bú lúmitekinine Ambányɛ yɛ́ Ɛsɔ́ma.
7 Aáná ya mɛáŋa muhulisi Ambányɛ yɛ́ Ɛsɔ́ma eéyé a yaála yí nuubo ayɛ́ Bandɔ́mɛsɛ́ ŋeé mi iínjíé a maayɛ́ makɛ́nda.
8 Yaŋɔ́ ooci awɔ́ ɛ tɛ amɛ́ bá ta bɔkɔ eé buúse bú belumitinine bekime ;
ta híáná,
Bandɔ́mɛsɛ́ ŋeé mi boósíki,
yɔ́ mɛ táfa anyía yémí hulíkínyi baacɔ a bá tɛ ábɔ́ bá Besuif Ambányɛ yɛ́ Ɛsɔ́ma yí injibí a yɛ́ a hɔ́la ;
yí ŋeé húle né Kilís.
9 U ŋa mɛ́ kɛ́lá tɔ́na bɔmbányɛ anyía yémi hembúlékíne bɔmbányɛ bɔmbányɛ baacɔ bekime anyána Bandɔ́mɛsɛ́ ŋa cɔba ɔ ɔkɛla bɛsana abɛ́ u ŋa batɛ́ákɛ́nɛ́ná bááyɛ́ baacɔ indiitie.
Wuúci Bandɔ́mɛsɛ́ bɛ́muátá,
Muketi bɛnyɛ́ma bikime,
wuúci u ŋa námbaka bɛsana eébí bikime o otúme buáyá ɔ ɔkɔɔ́háma aámbáya ayɛ́ ú meé biíbi nambɔnaka.
10 U ŋa kɛ́láka aáná anyía ne metéŋí na makɛ́nda ma bɛnyɛ́ma a bɛ́áŋa ɔ Ɔmuaná noómi á nyɛmána omenyukune e elime ci hiɔ́bɔ hí belumitinine anyána Bandɔ́mɛsɛ́ áŋa ne injiŋé a anamánamá cá bɛnyɛ́ma ekime.
11 Aáná Bandɔ́mɛsɛ́ ŋa kɛ́láka háyɛ u ŋaá sɔ́mbɔ́tɔ́ná ɛ́cɛ ɔmɛsɛ́ tɛ ŋáa bá.
U ŋa hɔ́lɛ́na né Yésus Kilís uusú Otéŋí a Waáŋá anyía wá kɛláka aáná.
12 A asana ayɛ́ tua sɔ́ŋa a nyɛlatana ne Yésus Kilís,
ɛ́ɛhɛ́ tua sɔ́ŋa tu obíkósíti ná Bandɔ́mɛsɛ́ª na mɔŋɔlɛ́ ɛ ɛtɛ́má hú mbiɔ́kɛ anyía tu ŋe sú meéme háya nááyá.
13 Aáná ɛ ŋa mɛ́ banɔ́ laana anyía nɔtɛ kásáka a asana anyía ɛ ŋaá mɛ lɔ́kɔ́ma muuyé a yáánɔ́ asana,
mbá muamɛ muuyé eémú á banɔ́ iínjíé yáaŋa nuúmi.
Nulénéne enú Yésus ŋaá basɔ́ léne
14 Yaátɛ́ asana í meé mi túmékíne Síkíne Bandɔ́mɛsɛ́ eŋéndu ɔ ɔbɛ́cɔ́kɔ́lɛ́na,
15 anyía wuúci u ŋaá bɔ́táká tɔnyɛ́nɔ́ tukime na tɔ́ ɔmɛsɛ́ na tɔ́ ɔmuaná.
16 A asana ayɛ́ núáyɛ́ nuúmi áŋa nuáŋá ɔ ɔhɔla,
wuúci na bɛnyɛ́ma bikime,
ɛ́ɛhɛ́ i ŋe mí wuúci batá anyía wé kíndísíki cíínú ɛtɛ́má a makɛ́nda ma yááyɛ́ Elilé.
17 Híáná *Kilís kéé límekine e cíínú ɛtɛ́má noómi anyía nu ŋa nɔ́ háya mɔŋɔlɛ́ nááyá,
núɔ́ kɛ́ndáka ne nulénéne na háyɛ bɔɔtɛ́ e bú meé yóofikinyi bɛkaŋá ɔ ɔmɛsɛ́ noómi,
na háyɛ ciíbe a cɛ́áŋa itúmékénú na makɛ́nda.
18 Aáná nu ká nɔ́ bá na makɛ́nda me omenyukune bɔmbányɛ bɔmbányɛ ɔlɔŋɔ ne befúúménénú bé etémbí bekime anyána nulénéne enú Kilís ŋa basɔ́ léne áŋa nuáŋánáŋána,
tɛ́ka ne iŋetí :
Ta a mabahɔ́,
ta a bucaha,
ta ɔ ɔtányɛ́,
te i injibí.
19 Ta ayɛ́ núáyɛ́ nulénéne áŋa nuáŋánáŋána tɛ́ka ne iŋetí,
baacɔ ti nuúnu menyi bɔmbányɛ bɔmbányɛ,
ɛ ŋa mɛ́ banɔ́ láana anyía énu nuúnu líhéke bɔmbányɛ ;
aáná cíínú ɛtɛ́má kéé nyióyíki hú mbiɔ́kɛ na bɛnyɛ́ma bikime a bɛ́áŋa ná Bandɔ́mɛsɛ́.
20 Bandɔ́mɛsɛ́ bímuócí wáŋa wu ɔkɛlaka ɔ ɔhɔla bɛnyɛ́ma bikime ebí tu ŋe sú wuúci báta ta abɛ́ tu ŋa sɔ́ bɛ́táá o wuúci báta a makɛ́nda e mé ŋeé bítóŋínyi náásɔ́.
21 Wuúci wá nyɛmana ne nuúmi na a asana na hiɔ́bɔ hí belumitinine na a asana ne Yésus Kilís bikúlú bikime ne bikúlú bikime,
híáná yááŋa !