Tua súáŋa bɔnɔhɔ́kɔ́nɔ́ anyía Bandɔ́mɛsɛ́ ŋaá basɔ́ bóósíki
2
1 Nu ŋa nɔ́ bá buáyá háyɛ biwéewé eé buúse bɔ́ Bandɔ́mɛsɛ́ a asana na cáánɔ́ anana na maanɔ́ maabɛ́,
2 nu látákɛ́na bɛɛsɔ bɛ́ baacɔ bá ɔmɛsɛ́ ooci ;
nu lɔ́kɔ́mákɛ́na mɔ́mbálɛ,
mutéŋínyi bililé bí mehúne.
Wuúci wáŋa elilé a yɛ́ ŋa nyɛ́kɛtɛna baacɔ ɔ ɔkɛlɛna Bandɔ́mɛsɛ́ aatɔ́ ɔnata.
3 Basɔ́ bekime tu ŋa sɔ́ bá bɔkɔ búmɔtɛ́ háyɛ beébe.
Tu ŋa sɔ́ bá tuesú líhéke e nyibíléníne nyí cíísú imehú,
tu kɛlaka bɛɛbɛ́ bɛ́ bɛsana e nyiléne nyɛ́ na ciasɔ́ cɛɛ́tɔ ne úúsú ɔtɛ́má,
ananyía tu ŋa sɔ́ bá baacɔ háyɛ beébe.
Aáná Bandɔ́mɛsɛ́ ŋa nyɛ́mána wu ɔ basɔ́ lóbísíkínyi a asana na maasɔ́ maabɛ́.
4 Mbá ta híáná,
wáŋa na mahana meéŋí,
yaátɛ́ asana u ŋaá basɔ́ lénéke buéŋí,
5 basɔ́ abá tu ŋa sɔ́ bá háyɛ biwéewé,
ª tu kɛlaka bɛɛbɛ́ bɛ́ bɛsana.
Ta híáná,
u ŋaá basɔ́ iínjie yɔɔ́sɔɔ́sɔ yí olíhe ɔlɔŋɔ ne Kilís anyía u ŋaá basɔ́ lénéké.
A asana na yaála yí nuubo yɛ́ Bandɔ́mɛsɛ́ nua nɔ́ŋa bɔnɔhɔ́kɔ́nɔ́.
6 E nyimónjóló anyɛ́ tua sɔ́ŋa ne Yésus *Kilís,
ɛ́ɛhɛ́ Bandɔ́mɛsɛ́ ŋaá basɔ́ heényiki o owé ɔlɔŋɔ ne Kilís,
yɔ́ basɔ́ iínjie nyilimíné ɔ Ɔmuaná o otéŋínyi ɔlɔŋɔ ne wuúci.
7 U ŋaá basɔ́ kɛ́láka bɔmbányɛ,
yɔ́ hɔ́lɛna né Yésus Kilís ananyía wó tóŋgínyi baacɔ bekime bá tɔɔya a tɔ́ ŋa fáakɔna anyána yááyɛ́ yaála yí nuubo áŋa yaáŋá ɔ ɔhɔla bɛnyɛ́ma bikime.
8 Yááŋa anyía Bandɔ́mɛsɛ́ ŋaá banɔ́ nóhí a asana ne úúnú olumitinine,
tɛ́ cáŋa a asana na bɛsana bɛ́ búánɔ́ buólí,
mbá a yááyɛ́ yaála yí nuubo ;
9 tɛ́ cáŋa a asana na yáánɔ́ ambányɛ yɛ́ nyɛbɛ́kɛ́lɛ́na anyía ɔɔcɔ ti bíbéétíki.
10 Tua sɔ́ŋa buólí bɔ́ Bandɔ́mɛsɛ́,
wuúci u ŋaá basɔ́ kétíki e nyimónjóló ne Yésus Kilís anyía túásɔ́ kɛ́láka bɛmbányɛ bɛ́ bɛsana ;
biíbi u ŋa cáŋa ɔ basɔ́ tábɔ́nɛ́na anyía túésú biíbi kɛláka.
Kilís ma látaka belumitinine bekime
11 Yaátɛ́ asana ánɔ bɛ́tááka anyána nú ŋa nɔ́ bá buáyá :
Nu tɛ ɔ́mɔ nɔ́ bá *Besuif e nyibíbíéne.
Baacɔ a bá ŋa bɔ́ bɛ́ácáka ŋa bɔ́ kɔɔna anyía bá bɔ́ŋa baacɔ bá Bandɔ́mɛsɛ́ ;
bá banɔ́ lɔ́ŋɔ́kɔ anyía benduéndue,
yiíyi anyía hú bɔsɔ́ɔ́kɔ́ bé ŋe bú beébe aacáka ;
tɛ́ cáŋa Bandɔ́mɛsɛ́.
12 Yaátɛ́ ekúlú eéyé nu ŋa nɔ́ bá ɛ́cɛ nu tɛ ŋá nɔ́ háya mɔŋɔlɛ́ né *Kilís ooci awɔ́ Bandɔ́mɛsɛ́ ŋɔ lɔ́tɔ ;
banɔ́ tɛ́ka biéti bí *Islayɛ́l.
Bandɔ́mɛsɛ́ ŋa látákána membénú na baacɔ bá búáyɛ́ bunɔŋɔ,
yó beébe bɛ́tánákɛ́na bɛsana abɛ́ u ŋa nyɛmána wu ɔkɛlaka.
Mbá banɔ́ nu tɛ ɔ́mɔ nɔ́ bá hɔ́á,
nu ŋa nɔ́ bá nuenú líhéke ɔ ɔmɛsɛ́ ooci tɛ́ka na bɔkɔ bɔ́ ɔháya mɔŋɔlɛ́ eé buúbu,
nu ti menyi Bandɔ́mɛsɛ́.
13 Mbá aámbáya,
banɔ́ abá nu ŋa nɔ́ bá buáyá haaca na Bandɔ́mɛsɛ́,
nú me nú bíkósíti nááyá e nyimónjóló ne Yésus Kilís a asana ne uúyé owé eenú eé buúse.
14 Yááŋa anyía Kilís wuúci bɛ́muátá u ŋaá basɔ́ héléníné mbuumu.
ª U ŋa kɛ́lá anyía ne Besuif na mɔnɔŋɔ me etémbí á bámɔ́kɔ́na bunɔŋɔ búmɔtɛ́,
u ŋaá basɔ́ látáka basɔ́ bekime na Bandɔ́mɛsɛ́ ekúlú ayɛ́ u ŋa yaáŋíá muliŋenene a mɔ́ ŋaá bá aasɔ́ ɛ ɛkatɛ́katɛ́ háyɛ nyɛmámá nyí ciíbe,
ª u ŋa yaáŋíá ekúlú eyí u ŋeé wé.
15 U ŋeé témbúsíki ne *bikotí bí Besuif na cáábɔ́ esúŋe na cáábɔ́ abɛ́kɛ́lɛ́na a caabɛ́ áyá e uúyé owé.
U ŋa kɛ́láka aáná anyía mɔnɔŋɔ ma baacɔ eémé méfendí á hálɔ́mɔ́na yɔɔ́sɔɔ́sɔ yɛ́ bunɔŋɔ hú ɔ́mɔtɛ́ a nyɛlatana ne wuúci.
Aáná u ŋa kɛ́lá anyía túásɔ́ bámɔ́kɔ́na e mbuumu noómi.
16 A asana ne úúyé owé ɔ ɔmbásá ɔ ɔmuaná,
ɛ́ɛhɛ́ Kilís ŋe ményísi muliŋenene,
yɔ́ látaka bífendí bɛ́ mɔnɔŋɔ eémé bɔkɔ búmɔtɛ́,
bá lɔ́kɔ́mákána na Bandɔ́mɛsɛ́.
17 Yááŋa anyía Kilís ŋaá faáya na ɔ ɔkɔɔ́ banɔ́ húlinyi Ambányɛ yɛ́ Ɛsɔ́ma yí mbuumu,
na ná banɔ́ abá nu ŋa nɔ́ bá haaca na Bandɔ́mɛsɛ́,
ne né Besuif tɔ́na a bá ŋa bɔ́ bá hoóhi ne wuúci.ª
18 Ɛ́ɛhɛ́ basɔ́ bekime tua sɔáŋa tú ɔtálɛ́mɛ́na aámbáya eé buúse bú Síkíne Bandɔ́mɛsɛ́,
túɔ́ hɔ́lɛ́na né Kilís a makɛ́nda me *Efúúménénú yí Elilé ɔ́mɔtɛ́.
19 Yaátɛ́ asana nu tɛ anɔ́ bá tɔ́na bekenyí mbá te biliminyi e bí ŋe húle haaca.
Nua nuáŋa aámbáya biéti bɛ́ bunɔŋɔ bɔ́ Bandɔ́mɛsɛ́ ;
nua nuáŋa baacɔ bé hííyé hɛnyɛ́nɔ́.
20 Nua nuáŋa banɔ́ tɔ́na háyɛ imbiŋe cí ciíbe ɔ ɔfalɛfa a wáŋa oketíkínyí e buólí bɔ́ na *baacɔ bá ɛndɔ́ma ne *behémúnyi bɛsana bá Bandɔ́mɛsɛ́.
ª Yésus Kilís wuúci bɛ́muátá áŋa nukúse a nɔ́ maá bɛ́túáhɛ́na ɔfalɛfa oócí ;
21 wuúci u náŋa weé kíndísíki ciíbe,
ɔfalɛfa cɔ́cɔbaka ne buúse,
mbá cɛ́ káá bɛ́cáŋa ciíbe e cifúúménénú,
ciíci ne Otéŋí a Waáŋá noómi.
22 A nyɛlatana anyɛ́ nua nɔ́ŋa ne Yésus Kilís,
ú maá banɔ́ óofinyi ɔ ɔfalɛfa oócí ɔlɔŋɔ na bɔsɔ́ɔ́kɔ́ bekime anyía núánɔ́ bɛ́cáŋa ciíbe ecí Elilé yɛ́ Bandɔ́mɛsɛ́ ŋeé líhe noómi.