Nufule enú Bóol ŋɔ yɔɔ́ŋɔ́kɛ́ná belumitinine bá
Ɛfɛ́ɛsɛ
Bitéŋíti
1
1 Yaŋɔ́ Bóol,
*Bandɔ́mɛsɛ́ ŋaá mɛ táfá anyía yámɛ bámɔ́kɔ́na *ɔɔcɔ u ɛndɔ́ma u *Yésus *Kilís.
Yaŋɔ́,
ɛ ŋa mɛ́ banɔ́ ɔ́ɔ́ŋɛ́na nufule eenu,
banɔ́ belumitinine Kilís ebé nú me nú bíínjie e nyimónjóló ne Yésus Kilís [banɔ́ ebé nu ŋe nú líhe a bálɛ́ka cɛ Ɛfɛ́ɛsɛ].
2 Ɛ ŋa mɛ́ bata ne Síkíne Bandɔ́mɛsɛ́ ne uusú Otéŋí a Waáŋá Yésus Kilís anyía bá banɔ́ sayábákɛ́na,
bá banɔ́ iínjíékíne mbuumu ɛ ɛtɛ́má noómi.
Bandɔ́mɛsɛ́ ŋaá basɔ́ sáyábɛ́na ɔ ɔhɔla anyía Kilís
3 Nuúmi á bá ná Bandɔ́mɛsɛ́,
Síkíne ci uusú Otéŋí a Waáŋá Yésus *Kilís.
U ŋaá basɔ́ iínjie bɛmbányɛ bɛ́ bɛsaya bí Elilé bikime bɛ́ Ɔmuaná anyía tua sɔ́ŋa e nyimónjóló ne Kilís.
4 Yááŋa anyía Bandɔ́mɛsɛ́ na maá basɔ́ táfáka buáyá ɛ́cɛ u tɛ ŋáá bɔ́tá na ɔmɛsɛ́ na ɔmuaná anyía túásɔ́ bámɔ́kɔ́na befúúménénú e nyimónjóló ne Kilís,
tɛ́ka na hɛkɔma eeyé eé buúse.
A asana ayɛ́ Bandɔ́mɛsɛ́ ŋaá basɔ́ lénéké,
5 u ŋaa cáŋa ɔsɔ́mbɔ́tɔ́na anyía tuásɔ́ bá e elime ci Yésus Kilís bááyɛ́ baáná bá ɔfana,
bú ŋeé wuúci bílénékíne ɔkɛla aáná.
6 Yaátɛ́ asana túásɔ́ nyɛmána tu o wuúci nyemiki a asana na yááyɛ́ yaála yí nuubo yí nuúmi.
U ŋaá basɔ́ bóosi etémbí ne etémbí anyía tua sɔ́ŋa e nyimónjóló ne uuyé Ɔɔ́nɔ́ u ɔtɛ́má.
7 U ŋaá basɔ́ háŋɔ́náká a buɔ́lɛ́ bɔ́ bɔɔbɛ́ o owé ú uuyé Ɔɔ́nɔ́ oócí,
yɔ́ basɔ́ nyɛanakɛnɛna maasɔ́ maabɛ́.
Aáná u ŋaá basɔ́ tóŋínyi anyána yááyɛ́ yaála yí nuubo áŋa yaáŋá ɔ ɔhɔla a yáásɔ́ aháŋá ;
8 yɔ́ basɔ́ nyióyísíkínyi ne injiŋé ikime na ambányɛ yí omenyi ekime a nyíáyɛ́ nyɛtákɛ́na nyɛ́ bɛsana.
9 U ŋaá basɔ́ námbɔ́nɛ́na nyíáyɛ́ nyɛtákɛ́na nyɛ́ bɛsana eényí a nyɛ́ ŋaá bá nyɛnámbánɔ́ buáyá ;
nyiínyi u ŋaá sɔ́mbɔ́tɔ́ná anyía u káá hɔ́lɛ́na né Kilís o o nyiínyi kɛla.
10 Nyíáyɛ́ nyɛtákɛ́na nyɛ́ bɛsana eényí áŋa anyía :
Ayɛ́ ekúlú káá nyɛmana,
u káá bándáka bɛnyɛ́ma bikime na bɛ́ ɔmɛsɛ́ na bɛ́ ɔmuaná anyía Kilís é biíbi téŋgínyi bikime.
11 Bandɔ́mɛsɛ́ ŋaá kɛla bɛsana bikime háyɛ bú ŋeé wuúci bíléníne.
Aáná u ŋaá caŋácáŋa ɔ basɔ́ táfáka buáyá a nyíáyɛ́ nyɛtákɛ́na nyɛ́ bɛsana anyía tua sɔ́ŋa e nyimónjóló ne Kilís ;
yɔ́ basɔ́ iínjie núásɔ́ nuafaª anɔ́ u ŋaá basɔ́ bɛ́tánɛ́na,
12 ananyía tuésú nyemiki búáyɛ́ buáŋá,
basɔ́ abá tu ŋa sɔ́ cáŋa ɔháya mɔŋɔlɛ́ né Kilís.
13 Banɔ́ tɔ́na,
ekúlú ayɛ́ nu ŋa nɔ́ lɔ́kɔ́máká taaká cɛ ɔtáŋa,
wuúci wáŋa Ambányɛ yɛ́ Ɛsɔ́ma a yɛ́ ŋaá banɔ́ nóhi,
nu ŋa nɔ́ hákɛ́ná mɔŋɔlɛ́ né Kilís.
Aáná Bandɔ́mɛsɛ́ ŋaá banɔ́ háyá hííyé hibílícínyínyí hɛ́ bɛ́muátá ;
híáŋa *Efúúménénú yí Elilé ayɛ́ u ŋaá banɔ́ bɛ́tánɛ́ná o otóŋínyi anyía nua nɔ́ŋa bááyɛ́.
14 Efúúménénú yí Elilé eéyé áŋa náásɔ́ háyɛ afacɛ́ e yí ŋoó tóŋínyi anyía Bandɔ́mɛsɛ́ káá basɔ́ iínjíékíne bɛmbányɛ bɛ́ bɛnyɛ́ma bí etémbí abɛ́ u ŋaá batɛ́ákɛ́nɛ́ná a búáyɛ́ Bunɔŋɔ,
ɛ́cɛ ekúlú yɛ́ nyíásɔ́ nyɛkɔmba maá nyɛmána bɔmbányɛ bɔmbányɛ.
Tue nyemiki aná buáŋá bɔ́ Bandɔ́mɛsɛ́.
Ɔbɛ́cɔ́kɔ́lɛ́na ú Bóol a asana ne belumitinine bá Ɛfɛ́ɛsɛ
15 Yaátɛ́ asana i ŋeé mi iínjie Bandɔ́mɛsɛ́ bitéŋíti a yáánɔ́ asana.
Ɛ ŋaá mɛ lɔ́kɔ́máka bá banɔ́ lémbíki anyía nu ŋa nɔ́ cɔba ne buúse ɔ ɔháya mɔŋɔlɛ́ né Otéŋí a Waáŋá Yésus,
nu lénéke tɔ́na belumitinine bekime.
16 Aáná i ŋeé mi iínjie Bandɔ́mɛsɛ́ bitéŋíti,
ɛ tɛ tɔmbɔ,
ekúlú ekime eyí i ŋe mí wuúci bɛ́cɔ́kɔ́lɛ́na eenú eé buúse.
17 Ɛ ŋaá mɛ bɛ́cɔ́kɔ́lɛ́na Bandɔ́mɛsɛ́,
Síkíne ci nuúmi ewú uusú Otéŋí a Waáŋá Yésus *Kilís ŋaá bá weé nyémiki ;
i ŋe mí wuúci bɛ́cɔ́kɔ́lɛ́na anyía wá banɔ́ íínjíé injiŋé,
mbá u bítóŋínyi náánɔ́ o o wuúci menyi bɔmbányɛ bɔmbányɛ ;
18 yɔ́ banɔ́ hákɛ́na eese ɛ ɛtɛ́má noómi anyía nuénu ményi,
nuɔ́ bámɔ́kɔ́na tɔ́na na nyɛnamá nyɛ́ mɔŋɔlɛ́ anyɛ́ u ŋaá banɔ́ lɔ́ŋɔ́kɔ eé nyiínyi,
núó ményi tɔ́na bɛnyɛ́ma biéŋí bí nuúmi abɛ́ u ŋaá batɛ́ákɛ́nɛ́ná bááyɛ́ baacɔ.
19 Ɛ ŋa mɛ́ aamba tɔ́na anyía núénú menyi mááyɛ́ makɛ́nda a má ŋa hɔ́la na anyána me ŋe bítóŋínyi náásɔ́,
basɔ́ abá tu ŋa sɔ́ hákɛ́ná mɔŋɔlɛ́ nááyá ;
makɛ́nda eémé Bandɔ́mɛsɛ́ ŋoo tóŋínyi bɔkɔ búmɔtɛ́ né Kilís,
20 ekúlú eyí u ŋeé wuúci heényi e biwéewé,
yó wuúci limisinyi a aháŋá yí úúye ɔɔbɔ́ ú manɔ́mɛª ɔ Ɔmuaná noómi.
21 A haátɛ́ haála eéhé Kilís áŋa oliménénú o otéŋínyi ne metéŋí mé bililé bikime bɛ́ ɔhuálɔ́,
na báábɔ́ betéŋí áyá ;
ta maabɔ́ makɛ́nda,
ta búábɔ́ bɔɔcɔ,
ta cáábɔ́ olokí áyá.
Nyíáyɛ́ nyiínyi ŋo yóómo ɔ ɔhɔla eénye ekime a cáŋa cé owoómókoª bɛhaála bikime a hɛɛya hɛ́ aámbáya,
ta a tɔɔya a tɔ́ ŋa fáakɔna.
22 Aáná Bandɔ́mɛsɛ́ ŋeé wuúci bééti Otéŋí u bɛnyɛ́ma bikime,
yɔ́ kɛla anyía Kilís é biíbi límékíníne bikime a bɛɛtɔ́,
ª nyi wuúci télímínyi eényí Otéŋí u hiɔ́bɔ hí belumitinine.
23 Hiɔ́bɔ hí belumitinine eéhí áŋa háyɛ ciayɛ́ cɛɛ́tɔ,
bɛmbányɛ bɛ́ bíáyɛ́ bɛnyɛ́ma áŋa hɔ́á noómi hú mbiɔ́kɛ ;
bɛmbányɛ bɛ́ bɛnyɛ́ma bɛ́ Bandɔ́mɛsɛ́ bikime áŋa binyíóyókónú tɔ́na nááyá hú mbiɔ́kɛ.