Tu ŋá sɔ́ nyɛmána tú olíhéke e eese noómi
5
1 Nua nɔ́ŋa baáná bá ɔtɛ́má bá Bandɔ́mɛsɛ́.
Yaátɛ́ asana ánɔ bɛ́kɛ́ndákɛ́na ɔlátɛ́na nyíáyɛ́ nyɛbɛ́kɛ́lɛ́na ;
2 énu líhéke,
nu lénéke bɔsɔ́ɔ́kɔ́ i iŋetí ci *Kilís.
U naŋa waá basɔ́ª lénéke,
ɛ́ɛhɛ́ u ŋeé wé a yáásɔ́ asana háyɛ abɛ́sámbá yɛ́ bɛnyɛ́ma te yí etúké eyí bé ŋe lúli o oocó ;
yááyɛ́ ambányɛ yí enumbé bílénékíne Bandɔ́mɛsɛ́.
3 Nua nɔ́ŋa baacɔ bá Bandɔ́mɛsɛ́,
ɛ́ɛhɛ́ bɔ́ tɛ a kɛ́la bɔmbányɛ anyía bá bɛ́káná ɔcamba buúse bukime ta ɛnjɔkɔ́nɔ́nɔ,
ta bɛsana bɛ́ mɔnyɔ́kɔ́lɔ́,
te olénéke mɔɔnyɛ́ buéŋí aanɔ́ ɛ ɛkatɛ́katɛ́.
4 Bɔ́ tɛ ŋáá hɛ́ka anyía núénú túmékénéne bɛahɔ́,
nu kɔɔ́nákána bɛsana ta bɛ́ buála ta bɛ́ mɔnyɔ́kɔ́lɔ́ ;
mbá bɔ́ ŋa hɔ́la ɔhɛka anyía núénú íínjíékíne bu íínjíékíne Bandɔ́mɛsɛ́ bitéŋíti.
5 Énu menyí bɔmbányɛ anyía na bakɛla ɛnjɔkɔ́nɔ́nɔ,
na bakɛla bɛsana bɛ́ mɔnyɔ́kɔ́lɔ́,
na baacɔ e bé ŋe bú léne mɔɔnyɛ́ buéŋí,
ɛ́cɛ anyía nyinyemi nyɛ́ bɛbɔ́kɔ́bɔ́kɔ,
tɛ ábɔ́ bá na nuafa buúse bukime e Butéŋí ne bú Kilís na bɔ́ Bandɔ́mɛsɛ́.
6 Nuti humé !
Ɔɔcɔ tɛ banɔ́ nénísi ohónyí na bɛsana bɛ́ bɛfala :
Yááŋa anyía a nyɛnamá nyɛ́ bɛsana eényí Bandɔ́mɛsɛ́ ŋó lóbísínyi baacɔ e bé ti ŋé bú wuúci lɔ́kɔ́mɛ́na.
7 Nɔtɛ latána bukendinyi na nyɛnamá nyɛ́ baacɔ eényí a asana a yɛ́mɔtɛ́.
8 E ekúlú yɛ́ buáyá,
nu ŋa nɔ́ bá nuenú líhéke i ibíne noómi ;
mbá aámbáya nua nuáŋa o olíhe e eese noómi anyía nua nuáŋa e nyimónjóló ne Kilís.
Yaátɛ́ asana énu líhéke aná i iŋetí cɛ baacɔ a bá náŋa bébú líhéke e eese noómi.
9 Eese eéyé ɛ́ náŋa yé yiínjíékíne baacɔ makɛ́nda ma ɔkɛlaka na bɛmbányɛ bɛ́ bɛsana bikime,
na a bɛtálɛ́mánánɔ́ áyá,
yí beébe íínjíékíne tɔ́na makɛ́nda ma ɔkɛlaka taaká cɛ́ bɛsana.
10 Ánɔ bɛ́kɛ́ndɛ́na ɔwaákɔ́nɛ́na omenyi bɛsana e bí ŋe bíléníne Otéŋí a Waáŋá.
11 Nɔtɛ latána na baacɔ a bá ŋa bɔ́ kɛ́la bɛsana bí ibíne ;
bɛ́ tɛ ŋɔ́ yɔɔ́lɔ.
Mbá ánɔ bándɔ́náka bɛsana eébí bɛ́ á lɛcákána a miányɛ́.
12 Yááŋa anyía,
bɛsana abɛ́ baacɔ eébé ŋa bɔ́ kɛla a nyɛnamba ŋe yiínjie aatɔ́ ɔlama te o o biíbi bíkéti.
13 Aáná ekúlú eyí bé ŋe tóŋínyi bɛsana eébí bikime a miányɛ́,
baacɔ ŋe bú ményi aátɛ́ yááŋa taaká.
14 Yááŋa anyíaʼo,
asana ekime eyí bé ŋe tóŋínyi a miányɛ́ a yáaŋa eese bɛ́muátá ;
yaátɛ́ asana bá ŋa kɔɔna anyía :
« Haanyúá,
kuɔŋɔ́ mɔhɛ́ta hiiné,
hatɔ́na ɛndánáka ɛ ɛkatɛ́katɛ́ ci biwéewé ;
aáná Kilís kéé númisiki eese nɔ́ɔ́wɔ. »ª
15 Háyɛ yááŋa aáná,
énu bíkékényíki e úúnú olíhe,
ánɔ nyɛánáka olíhe háyɛ be-ti-menyí bɔkɔ,
mbá énu líhéke háyɛ bemenyi bɛsana.
16 Nɔtɛ cáŋgɛ́na e etémbí ne etémbí bíánɔ́ bikúlú bɛ́ ɔkɛlaka bɔmbányɛ,
anyía mɔɔ́sɛ́ eeme áŋa maabɛ́.
17 Yaátɛ́ asana nu tɛ ɔ́mɔ nɔ́ nyɛmána nú ɔkɛlaka buála,
ánɔ bɛ́kɛ́ndɛ́na yáaŋa o omenyi aátɛ́ Otéŋí a Waáŋá ŋa yáamba anyía nuánɔ́ kɛ́láka.
18 Nuti híólóko meluku,
anyía maáŋa bunyímé.
Mbá ánɔ bámɔ́kɔ́nɛ́na bonyíóyókónó ne *Efúúménénú yí Elilé,
19 nu kíndísíkínyínyi ɛtɛ́má na maŋana ne me nyinyemi na ma ɔbɛ́cɔ́kɔ́lɛ́na ne emé Efúúménénú yí Elilé ŋaá banɔ́ tóŋínyi ɔhákɛ́na.
Ánɔ hákɛ́nɛ́na uusú Otéŋí a Waáŋá maŋana eémé,
nu wuúci nyemiki ne uúnú ɔtɛ́má okime.
20 Énu iínjíékíne ciasɔ́ Síkíne Bandɔ́mɛsɛ́ bitéŋíti a bɛsana bikime a bɛ́ ŋa bɛ́kɛ́la,
nu hɔlakɛna bikúlú bikime né uusú Otéŋí a Waáŋá Yésus Kilís.
Ne beénjú bá ɔtɔ́nɔ́ na báábɔ́ banɔ́mɛ
21 Énu kékékénéne ananyía nu ŋa nɔ́ lɔ́kɔ́mɛ́na Yésus *Kilís.
22 Banɔ́ beénjú bá ɔtɔ́nɔ́,
énu kékéke báánɔ́ banɔ́mɛ,
aáná Otéŋí a Waáŋá ŋa yáamba.
23 Yááŋa anyía ɔnɔ́mɛ ŋeé téŋínyi oónyí i iŋetí ecí Yésus Kilís ŋeé téŋínyi hiɔ́bɔ hí belumitinine.
Kilís áŋa Munohi hiɔ́bɔ hí belumitinine ;
híáŋa háyɛ ciayɛ́ cɛɛ́tɔ.
24 Yaátɛ́ asana beénjú bá ɔtɔ́nɔ́ ábɔ́ nyɛmána bé okékéke báábɔ́ banɔ́mɛ a bɔkɔ bukime háyɛ hiɔ́bɔ hí belumitinine ŋeé kéke Yésus Kilís.
25 Banɔ́ banɔ́mɛ,
énu lénéke báánɔ́ beényí i iŋetí ecí Yésus Kilís naŋa weé lénéke hiɔ́bɔ hí belumitinine,
ɛ́ɛhɛ́ u ŋgaá bɛ́sɔ́mbɛ́ná a yááyɛ́ asana.
26 U ŋa kɛ́láka aáná anyía mbá hííyé hiɔ́bɔ á bámɔ́kɔ́nɛ́na hifúúménénú eé buúse bɔ́ Bandɔ́mɛsɛ́,
u ŋeé hiíhi fúúmínyi ne menyífé na búáyɛ́ buhúnyi.ª
27 U ŋaá bá weé lénéke anyía hiɔ́bɔ hí belumitinine eéhí á bámɔ́kɔ́nɛ́na ne nuúmi,
hifúúménénú eeyé eé buúse,
tɛ́ka ne ehíŋe ɔ́mɔtɛ́,
ta na bɔkɔ a bɔɔbɛ́ a bɔ́mɔtɛ́,
ta na hɛkɔma a hɛ́mɔtɛ́ hí o hiíhi kákálákɛ́na.
28 Híáná banɔ́mɛ ábɔ́ nyɛmána bé olénéke báábɔ́ beényí a nyɛnamá enyí bé ŋe bú léne cííbú cɛɛ́tɔ cɛ́ bɛ́muátá.
Ɔɔcɔ okime ewú u ŋeé léne oónyí ŋo tóŋínyi baacɔ anyía u ŋeé léne ciayɛ́ cɛɛ́tɔ cɛ bɛ́muátá.
29 Ta ɔɔcɔ ti ŋée líŋine ta buɔ́sɛ́ ciayɛ́ cɛɛ́tɔ cɛ bɛ́muátá,
mbá u náŋa weé ciíci túkéke,
u ciíci sókóbíki i iŋetí ci nyisókóbi enyí Yésus Kilís náŋa weé sókóbíki hiɔ́bɔ hí belumitinine.
30 Yááŋa anyía basɔ́ bekime tua sɔ́ŋa maláŋá ma ciayɛ́ cɛɛ́tɔ.
31 Yááŋa yɔɔ́ŋɔ́kɔ́nɔ́ anyía :
« Aáná ɔnɔ́mɔcɔ́ náŋa waá hátɔna a maabána me ne iinyí ne síkíne,
yɔ́ kɔ látana ne oónyí ;
bífendí eébí bɛ́ɔ́ kɔ hálɔ́mɔ́na ɔɔcɔ ɔmɔtɛ́. »*
32 Asana eéyé áŋa taaká ci injibí cɛ asana.
Yaŋɔ́,
ɛ ŋa mɛ́ kɔɔna aáná anyía yɛ́ ŋa lɛ́ca ne Kilís ne hííyé hiɔ́bɔ hí belumitinine.
33 Híáná yɛ́ ŋaá banɔ́ lɛ́ca tɔ́na :
Ɔɔcɔ okime aá banɔ́ ŋá nyɛmána wu olénéke oónyí háyɛ u ŋeé léne ciayɛ́ cɛɛ́tɔ cɛ bɛ́muátá.
Oónjú u nyɛtɔ́nɔ́ okime é kékéke tɔ́na ɔnɔ́mɛʼoo.