Bóol ŋaá kámɛna búáyɛ́ buólí bɔ́ ɔɔcɔ u ɛndɔ́ma
10
1 Yaŋɔ́ Bóol,
yaŋɔ́ ɛ ŋa mɛ́ banɔ́ bɛ́cɔ́kɔ́lɛ́na ne o osiotóto na a ambányɛ yɛ́ ɔtɛ́má háyɛ ú Yésus Kilís… Baacɔ ŋa bɔ́ kɔɔ́na báyɛ ya mɛ́ŋa obílóósínyi ɔ ɔmɛsɛ́ ekúlú ayɛ́ ya mɛ́ŋa eénú eé buúse ;
asana ɔ́mɔtɛ́ ɛ ŋa mɛ́ banɔ́ sáamɛna buéŋí ekúlú ayɛ́ ya mɛ́ŋa haaca na banɔ́.
2 Ɛ ŋa mɛ́ banɔ́ bɛ́cɔ́kɔ́lɛ́na,
nɔtɛ kɛlá bɔkɔ a búáŋa bɔ́ ɔkɛla anyía núénú mi éékínyi ɔ banɔ́ saamɛna ekúlú ayɛ́ ɛ ká kaá mɛ háma aáhá náánɔ́.
Ya mɛ́ŋa hoóhi na ɔ banɔ́ sáamakɛna,
anyía bɔ́mɔtɛ́ baacɔ náánɔ́ ŋa bɔ́ bɛ́táá anyía ɛ ŋa mɛ́ nyiɔ buólí hú a nyɛbá nyɛ́ baacɔ ;
i ké mí beébe saamakɛna efule tɛ́ka.
3 Aá taaká tua sɔ́ŋa bɔtɔmbɔ́tɔ́mbɔ,
anyía tu ŋe sú líhe ɔ ɔmɛsɛ́ a nyɛbá nyɛ́ bɔnyɛ baacɔ ;
mbá ɛcálɛ acɛ́ tu ŋa sɔ́ nua,
tu tɛ ŋá sɔ́ nua a nyɛbá nyɛ́ bɔnyɛ baacɔ.
4 Máásɔ́ meléfényí ti ŋé húle a bɔnyɛ baacɔ,
mbá mááŋa meléfényí ma makɛ́nda e mé ŋeé húle ná Bandɔ́mɛsɛ́ ;
ma ɔ́ɔ́lɔ́kɔ ɔbɛ́a tukáká.
Tu ŋa sɔ́ cákala bɛála bí injiŋé bɛ́ baacɔ ;
5 tu ŋa sɔ́ yáka buhúnyi bukime bɔ́ bumálá a bú ŋá cúána baacɔ ohónyí wú omenyinyi na Bandɔ́mɛsɛ́.
Tu ŋa sɔ́ kɔ́ŋɔ́na ɛbɛ́táá cɛ́ baacɔ anyía bá lɔ́kɔ́mákɛ́na yáaŋa *Kilís.
6 Ekúlú ekime eyí nu ké nú tóŋínyi anyía nu ŋa nɔ́ lɔ́kɔ́mɛ́na Kilís bɔmbányɛ bɔmbányɛ,
tua sɔ́ŋa babɛ́tábɔ́nákánɔ́ tɔ́na ɔ ɔbɔ́nɔ́sia ɔɔcɔ okime a wá yánáŋa na aatɔ́ ɔnata.
7 Ánɔ lɛcáka bɛsana aná.
ª Mbɔ́kɔ ɔɔcɔ a wɔmɔtɛ́ ŋeé menyi bɔmbányɛ e uúye ɔtɛ́má noómi anyía wáŋa ɔɔcɔ u Kilís,
u ŋá nyɛmána wu omenyi tɔ́na anyía basɔ́ tɔ́na tua sɔ́ŋa baacɔ bé Kilís háyɛ wuúci.
8 Yááŋa anyía Otéŋí a Waáŋá ŋeé mi iínjíé bɔɔcɔ anyía yámɛ́ banɔ́ ɔ́ɔ́lɔ́kɔ,
núánɔ́ kɔ́máka o olumitinine ;
tɛ́ cáŋa anyía yámɛ́ banɔ́ aáhákɛ́na e eciké.
ª Te yemi bíbéétíki buéŋí e buúbu,
ɛ tɛ ŋá mɛ lɔ́kɔ́ma aatɔ́ ɔlama,
te butíkítíki.
9 Bá ŋaá kɔ́ɔna báyɛ ɛ ŋa mɛ́ banɔ́ líkímísi bu líkímísi na túámɛ tufule.
Bú tɛ á bá aáná.
10 Yááŋa anyía baacɔ a bɔ́mɔtɛ́ ŋa bɔ́ kɔ́ɔna anyía :
« Tufule tú Bóol áŋa ne mehúnyi a má ŋa láma,
ma káláka buéŋí ;
mbá ekúlú ayɛ́ wáŋa eé buúse bɔ́ baacɔ,
u tɛ ŋáá kɛ́nda,
bé fékítíkínyi mááyɛ́ mehúnyi. »
11 Baacɔ a bá ŋa bɔ́ kɔ́ɔna aáná ébú menyí anyía bɛsana bikime abɛ́ tu ŋa sɔ́ banɔ́ ɔɔ́ŋɔ́kɛ́na basɔ́ haaca,
tu ké sú biíbi nyíóyísíkínyi híáná efule tɛ́ka,
ekúlú ayɛ́ tu ká sɔ́ bá aanɔ́ ɛ ɛkatɛ́katɛ́.
12 Tu ti ŋé sú eéhínyínyi ta ɔnyɛmana,
mbá te obíkétínyínyi bɔ́mɔtɛ́ baacɔ e bé ŋe bú bíhiíte beébe bɛ́muátá anyía bá bɔ́ŋa *baáŋá.
Bá ŋa bɔ́ kɛla buála,
anyía bá bɔ́ŋa na núábɔ́ nuketi nɔ́ bɛ́muátá enú bé ŋe bú bíkéti ;
bé ti bíhiíte i indélímínyínyi acɛ́ baacɔ a bɔ́ŋa bé o beébe télímínyi.
13 Mbá,
aá basɔ́,
tu tɛ ŋá sɔ́ cɔba o obíbéétíki a bɛsana a bɛ́ tɛ ŋá lɛca buólí abɔ́ Bandɔ́mɛsɛ́ ŋaá basɔ́ cúméke anyía tuásɔ nyiɔkɔ ;
aáná tu ŋe sú oóndísi hí e buólí eébú,
túɔ́ kɔ hámánána o buúbu nyiɔ náánɔ́.
14 Yááŋa anyía tu ti ómo sú húlisi nyióndi nyɛ́ búásɔ́ buólí ekúlú ayɛ́ tu ŋa sɔ́ cáŋa ɔkɔɔ́ banɔ́ húlíkínyi Ambányɛ yɛ́ Ɛsɔ́ma a yɛ́ ŋa lɛca asana yí Kilís.
15 Aáná tu ti ŋé sú bíbééti ɔ ɔhɔla e buólí abɔ́ bɔsɔ́ɔ́kɔ́ ŋa bɔ́ nyiɔkɔ.
Mbá,
maasɔ́ mɔŋɔlɛ́ áŋa anyía úúnú olumitinine ŋa cɔba ɔ ɔwɔɔ́nɛ́na ɔ ɔhɔla a nyɛnamá anyɛ́ tu ká sɔ́ nyiɔkɔ buólí bú etémbí e buéŋí náánɔ́ a makɛ́nda amá bá ŋaá basɔ́ iínjie.
16 Aáná tu ké ké sú húlíkínyi baacɔ Ambányɛ yɛ́ Ɛsɔ́ma ɔ bɔsɔ́ɔ́kɔ́ a bá bɔ́ŋa a bɛhaála bí etémbí bí elime cɛ cianɔ́ iisí,
tu ti bíbééti e buólí abɔ́ bɔsɔ́ɔ́kɔ́ ŋa bɔ́ nyiɔkɔ.
17 Ɛ́ɛhɛ́ yááŋa anyía ɔɔcɔ okime awɔ́ u ŋa yaámba obíbééti ŋá nyɛmána wu obíbéétíki né Otéŋí a Waáŋá.ª
18 Yááŋa tɔ́na anyía bé ti ŋé lumitine nyɛkɛla a nyɛmbányɛ nyɛ́ ɔɔcɔ anyía u ŋeé bíbééti ;
mbá Bandɔ́mɛsɛ́ é bééti ɔɔcɔ,
bú ŋo tóŋínyi anyía nyíáyɛ́ nyɛkɛla áŋa nyɛmbányɛ.