Bóol ŋaá táŋa asana yí beékúnyi bá bɛfala
11
1 Ɛ́ɛ,
ánɔ cáŋa mi ééhínyínyi,
míɔ cɔba ɔ ɔtáŋáka háyɛ yaála yɛ́ ɔɔcɔ ;
énu mi eéhínyínyi yámɛ kɛláka buála.
2 Yááŋa anyía,
ɛ ŋa mɛ́ banɔ́ kɛ́lɛna yɔɔtɛ i iŋetí acɛ́ Bandɔ́mɛsɛ́ ŋá kɛ́la,
a asana ayɛ́ ɛ ŋa mɛ́ banɔ́ cíkílíékéne nyɛtɔ́nɔ́ na ɔnɔ́mɛ ɔmɔtɛ́ ;
wuúci wáŋa *Kilís.
Nua nɔ́ŋa háyɛ ɛndɔ́ŋɔ fíómi cɛ ɔbɔ́la a wáŋa ofúúménénú ;
wuúci i ké ké mi síke ná ɔnɔ́mɛ.
3 Ta híáná,
ɛ ŋaá mɛ bɛ́ákɛ́na buéŋí anyía,
háyɛ ciɔ́hɔ ŋeé néŋéké *Ɛfa na mááyɛ́ menjiŋé,
baacɔ tɔ́na tɛ banɔ́ néŋéke ɔ ɔkɔɔ́háma ayɛ́ nua nɔ́ŋa nú ɔbɛ́áhákɛ́na e eciké,
nu tɛ háná látɛ́na taaká ci ohónyí [e wufúúménénú] ú Kilís.
4 Yááŋa anyíaʼo,
ɛ ŋaá mɛ táŋa aáná anyía,
ekúlú ayɛ́ ɔɔcɔ a wɔmɔtɛ́ á fáaya náánɔ́ ɔ ɔkɔɔ́ banɔ́ húlinyi asana yí Yésus u etémbí awɔ́ u tɛ á bá ooci awɔ́ tú ŋa sɔ́ banɔ́ hulíkínyi yááyɛ́ asana,
nu ŋe nú eéhínyínyi o wuúci lɔ́kɔ́ma.
Híáná tɔ́na,
nu ŋe nú ééhínyínyi ɔkáha elilé yí etémbí a yɛ́ tɛ á bá eeye ayɛ́ nu ŋa nɔ́ cáŋa ɔkáha,
ta ambányɛ yɛ́ ɛsɔ́ma yí etémbí a yɛ́ tɛ á bá eeye ayɛ́ nu ŋa nɔ́ lɔ́kɔ́máká,
núo yiíyi lumitinine.
5 I ŋeé mi bíkéti ɛsɛ́,
baacɔ eébé ebé nu ŋe nú híite háyɛ balá-baacɔ bá ɛndɔ́ma,
bá tɛ ŋá bɔ́ mɛ hɔ́la te butíkítíki.
6 Ta ayɛ́ ɛ tɛ ŋá mɛ́ hɔ́la omenyi ɔtáŋa háyɛ beébe,
i ŋe mí menyi ta híáná bɔkɔ abɔ́ ɛ ŋaá mɛ kɔɔna anyía ya mɛ́ŋa ɔ banɔ́ tóŋgínyínyi bɛsana eébí anamá ekime e bikúlú biéŋí.
7 Ɔ́kɔ,
ɛ́cɛ anyía ɛ ŋa mɛ́ kɛláka bɔɔbɛ́ ekúlú eyí i ŋeé mi bílóósi yaŋɔ́ bɛ́muátá ɔ ɔmɛsɛ́,
míɔ banɔ́ húlikinyi Ambányɛ yɛ́ Ɛsɔ́ma yɛ́ Bandɔ́mɛsɛ́ tɛ́ka na bɛnamá ananyía núánɔ́ bámɔ́kɔ́na ɔ ɔmuaná e ?
8 Énu menyí anyía ekúlú ayɛ́ ɛ ŋaá mɛ bá náánɔ́,
ɛ ŋa mɛ́ kɛ́láka anyía tuɔ́bɔ tú belumitinine Kilís a tɔ́mɔtɛ́ e bínyímísíki a yáánɔ́ asana,
tuútu tú ŋa mɛ́ namáka búámɛ buólí náánɔ́.
9 Ta ayɛ́ ɛ ŋaá mɛ bá na ɔsɔ́ka,
yaŋɔ́ náánɔ́,
i ti ómo túéhínyi ɔɔcɔ a wɔmɔtɛ́ búámɛ bɔlamɔ́ ;
hú belumitinine bá aaha a Masɛtuán bé ŋe bú mi iínjíékíné bɛnyɛ́ma bikime a bɛ́ ŋaá bá bɛ́ á mɛ bɛ́ambákɛna.
I ŋeé mi bíkékényíki ɔ banɔ́ yébi ;
ɛ ká mɛ́ cɔba ne buúse ɔ ɔkɛla aáná.
10 Ɛ ŋa mɛ́ kɔɔna okelú ɔ ɔmuaná aá taaká ci Kilís a cɛáŋa náámɛ anyía :
Ta ɔɔcɔ náánɔ́ i iisí ikime cɛ Akayí tɛ a bá wu ɔ mɛ aáŋíá nuúmi eénú.
11 Mbá anyíatɛ́ ɛ ŋa mɛ́ táŋa aáná e ?
Yááŋa anyía ɛ tɛ ŋá mɛ́ banɔ́ léne e ?
Eéʼeé,
ta Bandɔ́mɛsɛ́ bɛ́muátá ŋe ményi anyía ɛ ŋa mɛ́ banɔ́ léne.
12 Mbá ɛ ŋa mɛ́ kɛla aáná,
ɛ cɔbaka ne buúse ɔ ɔkɛla aáná,
ananyía baacɔ a bá ŋa bɔ́ aamba ohónyí wú ɔbɛ́kɔ́ɔnaka anyía bá ŋa bɔ́ nyiɔ buólí bɔkɔ búmɔtɛ́ háyɛ basɔ́ ti wuúci bɔ́ŋɔ.
13 Aáná baacɔ eébé á bɔ́ŋa *baacɔ bá ɛndɔ́ma bá bɛfala,
beébe bɔnyiɔnɔ e bé ŋe bú néŋe bɔsɔ́ɔ́kɔ́,
bé bíhiítéke háyɛ baacɔ bá ɛndɔ́ma bé Kilís.
14 Nuti kékéke asana eéyé !
Yááŋa anyía ta Sátan bɛ́muátá,
u naŋa we bíhiítéke háyɛ *elilé yɛ́ bɔsɔ́ma e yí ŋo tóŋínyi eese.
15 *Híáná yááŋa hɛsanasáná ekúlú ayɛ́ bááyɛ́ bɔnyiɔnɔ ŋe bú bíhííte háyɛ bɔnyiɔnɔ a bá ŋa bɔ́ nyiɔ háyɛ Bandɔ́mɛsɛ́ ŋeé léne.
Nyíábɔ́ nyibíóndísínyi káá bá hú ɔhɔ́ma bɛnamá bɛ́ maabɔ́ mekilíkínyí.
Bɛɔ́mɔ́ bí Bóol a búáyɛ́ buólí bɔ́ ɔɔcɔ u ɛndɔ́ma
16 Ɛ ŋa mɛ́ hálɔ́mɔ́nɛ́na ɔkɔɔna isíʼo,
nuti mi hiíte háyɛ yaála yɛ́ ɔɔcɔ ;
oo,
énu mi hiíte aná háyɛ yaála yɛ́ ɔɔcɔ ɔ ɔkɛla anyía yámɛ bɛ́kɔ́ɔnaka,
ta yaŋɔ́ tɔ́na.
17 Asana ayɛ́ ɛ ŋa mɛ́ táŋa aámbáya ti ŋé bíléníne Otéŋí a Waáŋá,
ɛ ŋa mɛ́ táŋa háyɛ yaála yɛ́ ɔɔcɔ ;
i menyukune anyía ya mɛ́ŋa na bɔkɔ bɔ́ ɔbɛ́kɔ́ɔnakɛna.
18 Ayɛ́ yááŋa anyía baacɔ beéŋí ŋa bɔ́ bɛ́kɔɔ́na a bɛsana abɛ́ bá ŋa bɔ́ kɛ́láka ɔ ɔmɛsɛ́,
ta yaŋɔ́ tɔ́na míɔ cɔba ɔ ɔbɛ́kɔ́ɔnaka.
19 Tɛ́ka nɔsɛ nua nɔ́ŋa ne injiŋé ciéŋí a bɛɛtɔ́ a nyɛnamá enyí nu ŋe nú ééhínyínyi ta bɛála aá cianɔ́ ɛkatɛ́katɛ́ e ?
20 Nu ŋe nú lúmitine anyía baacɔ bé etémbí ábɔ́ banɔ́ tíŋéke bɛɔ́lɛ́,
bá banɔ́ nyíákɛ́na bɛnyɛ́ma,
bá banɔ́ néŋéke,
bá banɔ́ fénékíne,
bá banɔ́ tékéséke.
21 Ánɔ mɛ nyɛánɛ́nɛ́na !
Ya mɛ́ŋa na aatɔ́ ɔlama o olumitine anyía tua sɔ́ŋa bɔcɔ́ɔ́cɔ́ buéŋí.
Yiíye anyía ɛ ŋaá mɛ táŋa háyɛ yaála yɛ́ ɔɔcɔ,
ɛ bɛ́kɔ́ɔnaka a bɛsana a bɛ́mɔtɛ́ abɛ́ bɔsɔ́ɔ́kɔ́ ŋa bɔ́ bɛ́kɔ́ɔnɛna.
22 Ta bá bɔ́ŋa baacɔ bé Ebélé,
yaŋɔ́ tɔ́na ya mɛ́ŋa ɔɔcɔ u Ebélé ;
ta bá bɔ́ŋa *Besuif,
yaŋɔ́ tɔ́na ya mɛ́ŋa u Besuif ;
ta bá bɔ́ŋa bá bɔnyɛ *Abɛ́laham,
yaŋɔ́ tɔ́na ya mɛ́ŋa ɔɔcɔ u hííyé hɛnyɛ́nɔ́.
23 Ta bá bɔ́ŋa bɔnyiɔnɔ *Kilís,
yaŋɔ́ tɔ́na i ŋe mí wuúci nyiɔnɔ buólí o o beébe hɔ́la,
ɛ ŋa mɛ́ táŋa aaha háyɛ ɔɔcɔ awɔ́ u tɛ a bá tɔ́na na aatɔ́.
Yááŋa anyía ya mɛ́ŋa ɔnyiɔ́kɔ́nɔ́ ɔ ɔhɔla,
bé húlé mɛ hákɛ́na eé meébe ma ɛcaná ɔ ɔhɔla,
bá mɛ sábáka o onuti bikúlú biéŋí ɔ ɔhɔla,
owé mi numbékine.
24 Betéŋínyi Besuif á bɔ́ŋa bé mi súbékénú bikúlú bɛ́táánɔ,
hí ekúlú mesue nyitíne ne buunyi ne menyíse.ª
25 Aáná tɔ́na baacɔ bá ambala yí *Lóom á bɔ́ŋa bé mi súbékénú bikúlú bɛ́tátɔ́.
Ekúlú ɔ́mɔtɛ́ bé ŋé mi túméke andányɛ́ ɔ ɔ mɛ ɔ́ɔ́nɔ,
bikúlú bɛ́tátɔ́ ya mɛ́ŋa ɔbɛ́hɔɔ́nɔ e menyífé eé sitíme,
ya mɛ́ŋa ɔhɔlákánɔ́ buɔ́sɛ́ búmɔtɛ́ ne buutú búmɔtɛ́ aá nuɔmɔ́ nɔ́ makɛ́lɛ́ noómi.
26 Bikúlú bikúlú abɛ́ ɛ ŋa mɛ́ kanda hɛ́ a bɛɔ́mɔ́ ɔ ɔmuaná :
Bɛɔ́mɔ́ eé tuúci e tunyíóyókónú,
bɛɔ́mɔ́ ɔ ɔhɔlaka bɛhaála ebí bicónjólóŋó bɛ́ baacɔ áŋa,
bɛɔ́mɔ́ na baacɔ bá mɔnɔŋɔ me etémbí,
bɛɔ́mɔ́ a buamɛ bɔ́ bɛ́muátá,
bɛɔ́mɔ́ a bálɛ́ka,
bɛɔ́mɔ́ i iisí cɛ ɔsɛ́bɛ́á,
bɛɔ́mɔ́ aá nuɔmɔ́ nɔ́ makɛ́lɛ́ noómi,
bɛɔ́mɔ́ bɛhaála bikime te ne eebe e bé ŋé bú bíhíite háyɛ benyíinyí bé olumitinine.
27 Ɛ ŋa mɛ́ bɛ́ɔ́kɔ́sɔ́kɔ ne muuyé muéŋí e buólí meetú meéŋí ɛ tɛ hɛ́ta hiiné ;
mío weéhíkínyínyi na ɛcaná ne nyimóti,
bikúlú a bɛ́mɔtɛ́ ɛ ŋa mɛ́ bá oweékínyínyi *obíkíilie ɔnyíá,
nyiike ŋaá mɛ nuákɛ́na yaŋɔ́ cɛɛ́tɔ etémbí,
tɛ́ka na bɔlaka.
28 Ɛ tɛ ámɛ bá wu ɔfaaya ɔ ɔfana bɛɔ́mɔ́ bí etémbí.
Úúmi ɔtɛ́má bɛ́nyíáka mɔɔ́sɛ́ mekime ekúlú ayɛ́ ɛ ŋaá mɛ bɛ́táá tuɔ́bɔ tú belumitinine Kilís tukime.
29 Yááŋa anyíaʼo,
ekúlú ekime ayɛ́ ɔɔcɔ a wɔmɔtɛ́ á kása,
bú ŋeé mi kesi buéŋí e úúmi ɔtɛ́má noómi ;
híáná tɔ́na,
ekúlú ekime ayɛ́ ɔɔcɔ a wɔmɔtɛ́ a kɛ́la asana a yaabɛ́,
asana eéyé ŋaá mɛ kálɛ́na buéŋí ɔɔ́mɛ ɔ ɔtɛ́má noómi.
30 Aá taaká,
ɔ́kɔ ɛ ŋá mɛ nyɛmána wu ɔbɛ́kɔ́ɔnaka,
ɛ ŋá mɛ́ nyɛmána wu ɔbɛ́kɔ́ɔnaka a búámɛ bɔtɔmbɔ́ noómi.
31 Bandɔ́mɛsɛ́ áŋa Síkíne ci Otéŋí a Waáŋá Yésus ;
wáŋa ne nuúmi bikúlú bikime,
wuúci u ŋe ményi anyía i ti ŋé mi néŋe.
32 Ekúlú ayɛ́ ɛ ŋaá mɛ bá a bálɛ́ka cɛ Tamás,
kɔ́mɛ́na a cɛ́ ŋaá bá cɛ́ɔ́ nyiɔkɛna Otéŋí Alɛsɛtás,
ª ŋeé télímíkínyi bicénji o ofine ekime cá hɛkáká hɛ́ bálɛ́ka anyía bɛ́ á mɛ hatɛ́na.
33 Ta híáná,
bá ŋá mɛ háya ɛ ɛŋáká,
bó mí loosiki ne nukolí e wíndo a cɛmɔtɛ́ cɛ hɛkáká hɛ́ bálɛ́ka ;
aáná ɛ ŋa mɛ́ bɛ́hɔ́ɔ́nɔ ɔɔcɔ oócí.