Bóol ŋeé hembúlíne Bɔkɔlɛ́ɛntiɛ́ŋ asana a yɛ́mɔtɛ́
9
1 Yááŋa anyíaʼo,
bú tɛ ŋɔ́ɔ yɔ́ɔ́lɔ anyía yámɛ banɔ́ ɔ́ɔ́ŋɔ́kɛ́na nufule a asana na nyiɔ́lɔ a nyɛ́ ŋa lɛ́ca belumitinine *Kilís bé Yuté.ª
2 I ŋe mí menyi bíánɔ́ bɛmbányɛ bɛ́ ɛbɛ́táá a asana eéyé ;
yaŋɔ́ na bɔɔcɔ buéŋí ɛ ɛkatɛ́katɛ́ cɛ Bamasɛ́tɔ́niɛ́ŋ.
ª I ŋe mí beébe laákɛ́na ɛsɛ́ :
« O otúme a hiɔŋɔ ehinyíé belumitinine Kilís bé ekéti yí iisí yɛ́ Akayíª na maá bɔ́ bɛ́tábɔ́náka o beébe ɔɔ́lɛ́ta.
» Nyíánɔ́ nyibíínjie e nyiwééné áŋa nyikíndísíkínyi bɔsɔ́ɔ́kɔ́ a bɔ́mɔtɛ́ beéŋí.
3 Aáná ɛ́ ma mɛ́ banɔ́ tɔ́mɛ́na báásɔ́ benyíinyí bé olumitinine ɔ ɔkɛla anyía bábɔ́ banɔ́ kúána babɛ́tábɔ́nákánɔ́ taaká taaká a nyiɔ́lɔ anyɛ́ ɛ ŋa mɛ́ cáŋa o beébe laakɛna ;
nyiámɛ nyɛ-banɔ́-lémbi tɛ bɛ́cáŋa buólí bú nubókó.
4 Yááŋa anyía,
mbɔ́kɔ tɛ́ cáŋa aáná,
keyé ekúlú ayɛ́ ɛ ká mɛ́ faaya ɔlɔŋɔ na Bamasɛ́tɔ́niɛ́ŋ,
tuɔ kuana anyía nu tɛ ŋá nɔ́ bɛ́tábɔ́na a nyiɔ́lɔ eényí,
nu ké nú mi lemisi aatɔ́,
banɔ́ tɔ́na nuɔ́ bá na aatɔ́ ɔlama eébú eé buúse.
5 Yaátɛ́ asana ɛ ŋa mɛ́ lɛca bɔmbányɛ ɔ ɔbata báásɔ́ benyíinyí bé olumitinine anyía bá cáŋa ɔfaaya,
bá bándáka nyiínjie anyɛ́ nu ŋa nɔ́ bɛ́táná owiínjie.
Aáná a nyiámɛ nyɛkaáháma,
nu ká nɔ́ bá ɛ́cɛ nú ma nɔ́ bándáka nyiínjie eényí,
nyɛ́ɔ lɛ́cána anyía nu ŋe nú íinjie na yáánɔ́ ambányɛ yɛ́ ɔtɛ́má ekime,
tɛ́ cáŋa ɔɔcɔ wá banɔ́ eékínyi owiínjie.
Bɛnamá e bí ŋe húle e nuubo noómi
6 Énu menyí anyía ɔɔcɔ ewú u ŋeé míene hú tuandándá tú moohó ma bɛnyɛ́ma káá bándáka hú tuandándá tɔ́ bɛnyɛ́ma.
Ɔɔcɔ ewú u ŋeé míene moohó meéŋí káá bándáka tɔ́na bɛnyɛ́ma biéŋí.*
7 Aáná ɔɔcɔ okime á nyɛmána wu owiínjie a nyɛsɔ́mbɔ́tɔ́na nyí uúyé ɔtɛ́má ne obíléne,
u ti bícúcúle,
bé ti wuúci eékínyi.
Yááŋa anyía,
Bandɔ́mɛsɛ́ ŋeé léne ɔɔcɔ ewú u ŋe yiínjie ne obíléne okime.
8 Bandɔ́mɛsɛ́ áŋa na makɛ́nda ma ɔ banɔ́ nyɛhɛ́tɛ́na anamá cá bɛnyɛ́ma ekime ɔ ɔhɔla,
bɔkɔ tɛ banɔ́ bɛ́ambɛna.
Aáná nu ká nɔ́ bá na bɛnyɛ́ma biéŋí ɔ ɔhɔla,
bɛ́ ɔ banɔ́ ɔɔ́lɔ́kɔ ɔ ɔkɛla bɔsɔ́ɔ́kɔ́ bɛmbányɛ bɛ́ bɛsana bikime.
9 Aáná yááŋa yɔɔ́ŋɔ́kɔ́nɔ́ anyía :
« Ɔɔcɔ u ambányɛ yɛ́ ɔtɛ́má ŋoo bóosi basɔ́kásɔ́ka buéŋí na bɛnyɛ́ma ;
u káá cɔba ne buúse ɔ ɔkɛla aáná ɔ ɔhɔla bikúlú bikime ».*
10 Bandɔ́mɛsɛ́,
wuúci u naŋa we yiínjíékíne baacɔ ne moohó na bɛnyɛ́ma bɛ́ ɔnyíá biéŋí.
* U káá banɔ́ biíbi iínjíékíne,
yó tékisiki moohó ɔkɛla anyía núánɔ́ nuubo á ááŋánáka buéŋí ɔ ɔhɔla.
11 U káá banɔ́ iínjíékine bɛnyɛ́ma biéŋí ɔkɛla anyía núánɔ́ cɔba ne buúse o oboosi bɔsɔ́ɔ́kɔ́ ;
aáná baacɔ beéŋí ké bú iínjíékine Bandɔ́mɛsɛ́ bitéŋíti ɔ ɔbɛ́cɔ́kɔ́lɛ́na noómi a asana na nyíánɔ́ nyiɔ́lɔ enyí tu ké sú beébe cɔbanɛna.
12 Yááŋa anyía,
asana eyí nyiínjie eényí kéé tóŋínyi tɛ káá bá hú nyiɔ́lɔ nyɛ́ bɔnyiɔnɔ Bandɔ́mɛsɛ́ nyiínyi ne nyiínyi.
Mbá yí ké yiínjie baacɔ beéŋí makɛ́nda me owiínjíékíne Bandɔ́mɛsɛ́ bitéŋíti.
13 A nyíánɔ́ nyiɔ́lɔ eényí,
nu ké nú tóŋgínyi baacɔ nyíánɔ́ nyibíínjie o olumitinine.
Baacɔ beéŋí ké bú nyémiki Bandɔ́mɛsɛ́ a asana eyí nu ŋe nú wuúci lɔ́kɔ́mɛ́na e nyilumitinine enyí nu ŋe nú lumitinine Ambányɛ yɛ́ Ɛsɔ́ma yí *Kilís.
Bé ké bú wuúci nyémiki tɔ́na a asana eyí nu ŋe nú beébe boósi,
nu boósíki tɔ́na baacɔ bé etémbí bekime.
14 Aáná bé ké búle abɔ́ banɔ́ bɛ́cɔ́kɔ́lɛ́nɛ́na Bandɔ́mɛsɛ́ a asana ayɛ́ u ŋaá banɔ́ nyɛhɛ́tɛ́na bɛnyɛ́ma a yááyɛ́ yaála yí nuubo,
15 tú wuúci iínjíékíne bitéŋíti a asana na yááyɛ́ yaála yí nuubo a yɛ́ tɛ á bá ne iŋetí.