6
1 Ɛ́ɛhɛ́ háyɛ tu ŋa sɔ́ nyiɔ buólí ɔlɔŋɔ na Bandɔ́mɛsɛ́,
ɛ ŋa mɛ́ banɔ́ bɛ́cɔ́kɔ́lɛ́na anyía,
nɔtɛ kɛ́la anyía yaála yí nuubo ayɛ́ Bandɔ́mɛsɛ́ ŋaá banɔ́ iínjíé á bɛ́cáŋa buólí bú nubókó.
2 Yááŋa yɔɔ́ŋɔ́kɔ́nɔ́ anyía :
« Ɛ ŋaá mɛ bɛ́kámá úúwe ɔbɛ́cɔ́kɔ́lɛ́na e ekúlú a yɛnyɛmánánɔ́,
míɔ kuɔŋɔ́ nohi a buɔ́sɛ́ bɔ́ nyɛkɔmba.
»* Ánɔ lɛ́ca aná,
ekúlú anyɛmánánɔ́ yí cibicibi eeye aámbáya ;
aámbáya buɔ́sɛ́ bú okúmbíki baacɔ eebu hɛ́nánɔ.
3 Tu tɛ ŋá sɔ́ aamba okúfítínyi ta ɔɔcɔ o ohónyí a wɔ́mɔtɛ́,
anyía búásɔ́ buólí á bɛ́nyíɔ́kɔ tɛ́ka na abábɛ.
4 Mbá a bɛsana bikime abɛ́ tu ŋa sɔ́ kɛla,
tu ŋe sú tóŋínyi hú anyía tua sɔ́ŋa bɔnyiɔnɔ bá Bandɔ́mɛsɛ́.
Ta tuasɔ́ lɔ́kɔ́máka muuyé anyána,
ta mahana,
ta muuyé a mɔ háányɛ́ ;
ta bá basɔ́ tékeseke,
tu ŋe sú eéhínyínyi buéŋí.
5 Ta bá basɔ́ súbéke,
ta bá ŋaá basɔ́ háya eé ciíbe cɛ ɛcaná,
te bó yoósíkínyi baacɔ ɔ ɔ basɔ́ núúsi,
te tuésú wéékúne buólí,
tu tɛ hɛ́ta,
tu tɛ nyíá tɔ́na,
6 tu ŋe sú tóŋínyi ne efúúménénú yɛ́ ɔtɛ́má anyía tua sɔ́ŋa bɔnyiɔnɔ bá Bandɔ́mɛsɛ́ ne e nyimenyi nyɛ́ bɛsana noómi,
ne e úúsú oweéhínyínyi weéŋí ɔ ɔtɛ́má noómi ;
*Efúúménénú yí Elilé áŋa náásɔ́,
tu ŋe sú léne bɔsɔ́ɔ́kɔ́ na ɔtɛ́má okime.
7 Tu ŋe sú húlinyi baacɔ hú bɛsana bɛ́ taaká,
Bandɔ́mɛsɛ́ basɔ́ kíndísíki.
Yáásɔ́ ambányɛ yɛ́ nyɛbɛ́kɛ́lɛ́na áŋa háyɛ meléfényí ne me onuusiki baacɔ na ma ɔbɛ́kɛ́ŋákɛ́na e biité.
8 Baacɔ a bɔ́mɔtɛ́ ŋa bɔ́ basɔ́ iínjie nuúmi,
bɔ́mɔtɛ́ basɔ́ bábákɛ́na ;
a bɔ́mɔtɛ́ óómísi cáásɔ́ eénye,
a bɔ́mɔtɛ́ ceéce tubisiki.
Beéŋí ŋa bɔ́ basɔ́ lɛ́ca háyɛ benéŋe baacɔ,
yiíyi anyía tu ŋa sɔ́ kɔɔna bɛsana bɛ́ taaká.
9 Beéŋí a bɔ́mɔtɛ́ ŋa bɔ́ basɔ́ bínéŋítínyi háyɛ baacɔ ebé bé ti ŋé bú menyi,
yiíyi anyía bá ŋa bɔ́ basɔ́ menyi bɔmbányɛ ;
bɔ́mɔtɛ́ basɔ́ hiíteke háyɛ bitembú,
ɛ́ná,
basɔ́ eebe tua sɔ́ŋa taaká bɔɔ́sɔ ;
bá ŋaá basɔ́ tibíle buéŋí,
mbá tu ti wé.
10 Ta yɛ́ cáŋa á bá anyía tu ŋa sɔ́ lɔ́kɔ́ma ɔtɛ́má ɔnua weéŋí,
tu ŋa sɔ́ cɔba bɔ cɔba ne buúse o obíléne noómi.
A nyɛlɛca nyɛ́ baacɔ,
tua sɔ́ŋa basɔ́kásɔ́ka,
yiíyi anyía tu ŋe sú céŋísi beéŋí baŋaŋa o olumitinine noómi ;
bú ŋa lɛcana háyɛ anyía tua sɔ́ŋa aabá éfendí ;
aá taaká tua sɔ́ŋa na bɛnyɛ́ma bikime.
11 Baláamɛ bá Kɔlɛ́ɛntɛ,
tu ŋa sɔ́ banɔ́ húúníne úúsú ɔtɛ́má okime,
tuɔ́ banɔ́ láakɛna bɛsana bikime ;
basɔ́ ta ɔ banɔ́ nambɛna bɔkɔ.
12 Aá basɔ́,
tu ŋa sɔ́ banɔ́ léne buéŋí,
mbá banɔ́ nu tɛ ŋá háná anɔ́ basɔ́ léne.
13 Aáná ɛ ŋaá mɛ́ táŋa náánɔ́ aaha háyɛ síkíne ŋá táŋa ná bááyɛ́ baáná ;
ɛ́ɛhɛ́ banɔ́ tɔ́na,
ánɔ basɔ́ huúnékíne cíínú ɛtɛ́má ikime.
Na bɔmbányɛ na bɔɔbɛ́ ti ŋé bú kéndinyi
14 Nɔtɛ tákáka mekendinyi e nyikílínyi nyɛ́ bɛsana na baacɔ e bé ti ŋé bú lumitinine Bandɔ́mɛsɛ́.
Énu menyí anyía na bɔmbányɛ na bɔɔbɛ́ ti ŋé bú kéndinyi ta buɔ́sɛ́,
te ne eese,
ne ibíne.
15 Híáná tɔ́na,
ne *Kilís na Bɛlɛ́alª tɛ abɔ́ bá bá ɔlɔ́kɔ́mákána ;
aáná ne mulumitinine Kilís ne mu-ti-lumitinine tɛ abɔ́ bá bá ɔbámɔ́kɔ́na na ɔbɛ́táá ɔ́mɔtɛ́.
16 Bɛbɔ́kɔ́bɔ́kɔ tɛ á bá ne nyilimíné eé *Ciíbe cɛ Bandɔ́mɛsɛ́ ;
basɔ́ tua sɔ́ŋa Ciíbe cɛ Bandɔ́mɛsɛ́ a wáŋa wɔɔ́sɔ.
Yááŋa háyɛ u ŋaá kɔɔna ɔsɛ :
« I ké ké mí limekíne náábɔ́,
ɛ kandaka a ciabɔ́ ɛkatɛ́katɛ́,
míɔ bá ciabɔ́ Bandɔ́mɛsɛ́,
beébe báámɛ baacɔ. »ª
17 Yaátɛ́ asana Síkíne Bandɔ́mɛsɛ́ ŋaá kɔɔna ɔsɛ :
« Ánɔ hatɔ́kɔ́na ɛ ɛkatɛ́katɛ́ cɛ bɛɛbɛ́ bɛ́ baacɔ eébí,
ánɔ cɔbáka haaca ne biíbi.
Nuti bítíse bɔkɔ bɔ́ mɔnyɔ́kɔ́lɔ́ a búmɔtɛ́;
* aáná ɛ ká mɛ́ banɔ́ káháka ne obíléne.ª
18 Ɛ́ɛhɛ́ ɛ ká mɛ bá cianɔ́ Síkíne,
núɔ́ bámɔ́kɔ́na báámɛ baáná,
ne e beénjú,
na a banɔ́mɔcɔ́.
Buhúnyi bú Síkíne Bandɔ́mɛsɛ́,
Alámakɛ́nda,
eébú búáŋa. »ª