5
1 Tu ŋe sú ményi anyía mbɔ́kɔ yáásɔ́ ekule eyí tu ŋe sú líhíne ɔ ɔmɛsɛ́,
ɛ́cɛ anyía ciasɔ́ cɛɛ́tɔ,
ŋá káátiaka,
tua sɔ́ŋa na yɔɔ́nɛ́nánɔ́ yí ciíbe ɔ Ɔmuaná acɛ́ Bandɔ́mɛsɛ́ ŋaá basɔ́ fálɛ́fákɛ́na.
Ciáŋa ekúlú ekime,
tɛ́ cáŋa baacɔ bá ŋa bɔ́ fálɛ́fáka na cáábɔ́ aabá.
2 Yaátɛ́ asana tu ŋa sɔ́ kɛ́mba aámbáya e ekule eéyé,
basɔ́ na ɛcaná cɛ ɔtálɛ́na aá cɛɛ́tɔ eécí cíásɔ́ ciíbe cɛ Ɔmuaná anyía cíé bíhúéne eeci a cɛ́mɔtɛ́,
3 ananyía bá basɔ́ lɛcaka anyía tua sɔ́ŋa babɛ́láŋábákánɔ́,
tu tɛ asɔ́ bá cɛɛ́tɔ etémbí.
4 Yááŋa anyía ekúlú ekime ayɛ́ tua sɔánáŋa e ekule eéyé,
muuyé maá basɔ́ eékínyi ;
tu ŋa sɔ́ kɛ́mba.
Bu tɛ á bá anyía tu ŋa sɔ́ aamba ɔwaálɔ́nána na ciasɔ́ cɛɛ́tɔ eeci,
mbá tu ŋa sɔ́ aamba yáaŋa ɔbɛ́tálɛ́na yɔɔ́sɔɔ́sɔ yɛ́ cɛɛ́tɔ yí etémbí,
ananyía mbá olíhe á mɛ́na hú míóti bɔkɔ eébú a búáŋa bú owé.
5 Bandɔ́mɛsɛ́ wuúci bɛ́muátá u ŋaá tábɔ́náka anyía tu ká sɔ́ hɛ́ŋɛ́na nyɛnamá nyɛ́ nyɛhɛŋɛna eényí,
yɔ́ basɔ́ iínjie yááyɛ́ Elilé a yááŋa hibílícínyínyí e hí ŋo tóŋínyi anyía u káá basɔ́ batɛ́ákɛ́nɛ́na bɛnyɛ́ma.
6 Yaátɛ́ asana tua sɔ́ŋa bonyíóyókónú na mɔŋɔlɛ́ ɔ ɔtɛ́má hú mbiɔ́kɛ ekúlú ekime.
Tu ŋe sú menyi anyía ekúlú ekime ayɛ́ tua sɔánáŋa o olíhe aá cɛɛ́tɔ eécí,
tua sɔ́ŋa haaca na haála ehé Otéŋí a Waáŋá ŋaá basɔ́ tábɔ́nákɛ́na.
7 Tu ŋe sú líhe o ohónyí wú olumitinine noómi,
tɛ́ cáŋa o ohónyí wú nyɛlɛca nyí eése nyɛ́ baacɔ.
8 Ta yɛ́ cáŋa á bá anyía tua sɔ́ŋa na mɔŋɔlɛ́ ɛ ɛtɛ́má hú mbiɔ́kɛ,
bú ŋa hɔ́la ɔ basɔ́ bíléníne anyía túásɔ́ bɛ́yuáta cɛɛ́tɔ eeci acɛ́ tua sɔ́ŋa ne ciíci aámbáya,
anyía tu ké sú límine hoóhi ne Otéŋí a Waáŋá.
9 Ɛ́ɛhɛ́ tu ŋa cáŋa asɔ́ aamba o wuúci bíléníne,
ta basɔ́ ɔ ɔmɛsɛ́ ooci,
ta basɔ́ ɔ Ɔmuaná nááyá.
10 Yááŋa anyía basɔ́ bekime,
tu ŋá sɔ́ nyɛ́mána tú ɔkɔtálɛ́mákɛ́na eé buúse bú *Kilís anyía waá basɔ́ kélísíki.
Aáná u káá námaka ɔɔcɔ okime a mááyɛ́ mekilíkínyí ma bɛ́muátá,
ta a mambányɛ,
ta a maabɛ́.
Behényíhényi bé Kilís
11 A asana eyí tu ŋe sú menyi aáná,
tu ŋe sú kéké Otéŋí a Waáŋá.
Yaátɛ́ asana tɔ́na tu ŋa sɔ́ bɛ́kɛ́ndɛ́na osúéne baacɔ nááyá.
A aháŋá na Bandɔ́mɛsɛ́,
u ŋaá basɔ́ ményi bɔmbányɛ bɔmbányɛ ;
ya mɛ́ŋa na mɔŋɔlɛ́ anyía banɔ́ tɔ́na nu ŋe nú mí menyi háyɛ túánɔ́ tɔcɔɔ́cɔ́ tɔ́ ɛtɛ́má ŋaá banɔ́ tóŋínyi.
12 Tu ti ŋé sú bíbééti ;
tu ŋa sɔ́ aamba yáaŋa anyía núánɔ́ bámɔ́kɔ́na na bɔɔcɔ ekúlú ekime ayɛ́ nu ŋa nɔ́ bɛ́káma baacɔ a bá ŋa bɔ́ basɔ́ kákálɛ́na,
bé híiteke nuúmi nɔ́ ɛkata,
nuúnu tɛ́ka taaká e ci ŋeé húle ɔ ɔtɛ́má noómi.
13 Yááŋa anyía mbɔ́kɔ basɔ́ tua sɔ́ŋa bɛála,
tua sɔ́ŋa bɛála a asana na Bandɔ́mɛsɛ́,
mbá basɔ́ tua sɔ́ŋa bambányɛ aá bɛɛtɔ́ noómi a yáánɔ́ asana.
14 Yááŋa anyía nulénéne nú *Kilís náásɔ́ ŋaá basɔ́ íínjie makɛ́nda ma ɔnyiɔkɛna bɔsɔ́ɔ́kɔ́ buólí,
basɔ́ tu ŋe sú ményi taaká anyía ɔɔcɔ ɔmɔtɛ́ ŋeé wééné eé buúse bɔ́ baacɔ bekime,
aáná baacɔ bekime ŋe bú wéékúné ɔlɔŋɔ ne wuúci.
15 U ŋeé wééné eé buúse bɔ́ baacɔ bekime,
ananyía baacɔ eébé a bá bɔ́ŋa ekúlú ekime bɔɔ́sɔ tɛ háná líhe a nyíábɔ́ nyɛháŋa nyɛ́ bɛ́muátá,
mbá bá aambáka ohónyí wú o wuúci bíléníne,
anyía a búábɔ́ bɔmbányɛ u ŋeé wééné,
yɔ́ háanyua o owé.
16 Yaátɛ́ asana,
o otúme aámbáya basɔ́,
tu tɛ ŋá háná asɔ́ lɛca baacɔ háyɛ baacɔ bá bɔtɔhɔ,
te yiíyi anyía tu ŋa sɔ́ lɛ́cáka Kilís aáná ;
mbá aámbáya tu tɛ ŋá háná esú wuúci lɛca aáná.
17 Aáná ɔɔcɔ okime a wáŋa e nyimónjóló ne Kilís a yáaŋa yɔɔ́sɔɔ́sɔ yɛ́ bɔlɔŋɔ ;
mááyɛ́ mekilíkínyí ma buáyá ma mánaka,
bɛsana bikime a yáaŋa bɛɔ́sɔɔ́sɔ nááyá.
18 Bɛsana eébí bikime ŋeé húle ná Bandɔ́mɛsɛ́ bímuócí ;
wuúci u ŋaa kɛ́la anyía nyiitíé a nyɛ́ ŋaá bá na basɔ́ ne wuúci á mána e elime ci Kilís.
Wuúci u ŋaá basɔ́ íínjie makɛ́nda ma ɔnyiɔkɔ buólí bú omenyisiki nyiitíé ɛ ɛkatɛ́katɛ́ cɛ na baacɔ ne wuúci.
19 Ɛ́cɛ anyía e elime ci Kilís,
Bandɔ́mɛsɛ́ ŋaa kɛ́lá anyía nyiitíé eényí á mana ɛ ɛkatɛ́katɛ́ cɛ na baacɔ bekime ne wuúci bɛ́muátá.
U tɛ háná beébe fanɛna maabɔ́ maabɛ́.
U ŋaá basɔ́ íinjie buhúnyi bɔ́ ɔkɔláakɛna baacɔ anyía nyiitíé á mana ne wuúci.
20 Aáná tu ŋa sɔ́ nyiɔ buólí bú behényíhényi bé Kilís,
búáŋa háyɛ Bandɔ́mɛsɛ́ bɛ́muátá ŋaa báŋɛna baacɔ eesú e eété ;
tu beébe bɛ́cɔ́kɔ́lɔ́kɛ́na eé nyiínyi nyí Kilís anyía bé lumitine anyía nyiitíé a nyɛ́áŋa ɛ ɛkatɛ́katɛ́ ci ne beébe na Bandɔ́mɛsɛ́ á maná.
21 A aháŋá ne Kilís,
u tɛ ɔ́mɔ kɛ́la bɔɔbɛ́ ta buɔ́sɛ́,
mbá ta híáná Bandɔ́mɛsɛ́ ŋeé wuúci túéhínyí búásɔ́ bɔɔbɛ́ª ɔkɛla anyía wá basɔ́ háŋɔ́náka,
túɔ́ bámɔ́kɔ́na bɛtálɛ́mánánɔ́ bɛ́ baacɔ eeyé eé buúse.ª