Eese a yɛ́ ŋa nɔ́ma i ibíne noómi
4
1 Yááŋa anyía Bandɔ́mɛsɛ́ ŋaá basɔ́ bɛ́cámá mahana a yááyɛ́ ambányɛ yɛ́ ɔtɛ́má,
yɔ́ basɔ́ íinjie buólí eebu ;
yaátɛ́ asana tu tɛ asɔ́ bá tú ɔkasaka.
2 Tu ŋe sú kínéke ɔkɛla bɛsana bɛ́ aatɔ́ ɔlama,
biíbi bɛ́ ŋa bɛ́kɛ́la a nyɛnamba.
Tu ti néŋe baacɔ mbá te okótímísi Bɛsana bɛ́ Bandɔ́mɛsɛ́.
Yááŋa anyía tú ŋe sú húlínyi yáaŋa baacɔ taaká cɛ Ambányɛ yɛ́ Ɛsɔ́ma o motóndóló eé buúse bɔ́ Bandɔ́mɛsɛ́,
ɔ ɔkɛla anyía baacɔ bekime ébú menyí nyɛnamá nyɛ́ baacɔ anyɛ́ tua sɔ́ŋa.
3 Ta híáná,
baacɔ a bɔ́mɔtɛ́ tɛ ŋá bɔ́ lɔ́kɔ́ma bɔmbányɛ Ambányɛ yɛ́ Ɛsɔ́ma eeye eyí tu ŋe sú beébe hulinyi ;
yááŋa háyɛ anyía bá bɔ́ŋa ne buume e eése.
Ta yɛ́ cáŋa á bá aáná,
énu menyí anyía búáŋa aáná hú á baacɔ eebe a bá bɔ́ŋa o ohónyí ú bunyímé noómi.
4 A asana na baacɔ eébé a bá tɛ ŋá bɔ́ lɔ́kɔ́ma bɔmbányɛ Ambányɛ yɛ́ Ɛsɔ́ma,
yááŋa anyía Sátan,
bandɔ́mɛsɛ́ cɛ ɔmɛsɛ́ ooci,
u ne meé beébe cakalaka bíábɔ́ bɛɛtɔ́,
anyía bá tɛ́ lɛcá háyɛ Ambányɛ yɛ́ Ɛsɔ́ma yí nuúmi nú *Kilís ŋá nɔ́ma náábɔ́,
nú húlúkúne ne Kilís.
Waáta Kilís áŋa taaká ci ihúényínyí cɛ Bandɔ́mɛsɛ́ bɛ́muátá.
5 Yááŋa anyíaʼo,
tɛ́ cáŋa yáásɔ́ asana yɛ́ bɛ́muátá tu ŋe sú húlínyi baacɔ ;
mbá tu ŋe sú beébe hulinyi hú asana yí Otéŋí a Waáŋá Yésus Kilís.
A yáásɔ́ aháŋá,
tu ŋa sɔ́ láana baacɔ hú anyía :
Tua sɔ́ŋa báánɔ́ bɔnyiɔnɔ anyía tu ŋa sɔ́ látɛ́na Yésus.
6 Yááŋa anyía Bandɔ́mɛsɛ́ u ŋaá kɔ́ɔ́na buáyá anyía eese á nɔ́máka i ibíne noómi,
wuúci tɔ́na u ŋaá basɔ́ númisinyi yááyɛ́ eese ɛ ɛtɛ́má noómi.
Eese eéyé ŋaá basɔ́ tóŋínyi núáyɛ́ nuúmi a nɔ́ ŋa nɔ́ma eé buúse bú Kilís ;
buátɛ́ bɔkɔ tu ŋe sú húlínyi baacɔ Ambányɛ yɛ́ Ɛsɔ́ma.ª
Na bɔtɔmbɔ́ ne muuyé mu buólí bɔ́ ɔɔcɔ u ɛndɔ́ma
7 Mbá basɔ́ eebe abá Bandɔ́mɛsɛ́ ŋaá basɔ́ cúméke taaká cɛ bɔnɔ́mɛ eébú,
tua sɔ́ŋa na bɔtɔmbɔ́ ;
tu ŋa sɔ́ bɛ́ɔ́ndɔɔ́ndɔ háyɛ tusényí a tɔ́ ŋa yáatia.
Bandɔ́mɛsɛ́ ŋa kɛ́láka aáná anyía mbá baacɔ ábɔ́ lɛcáka anyía bɛandándá bɛ́ makɛ́nda eébí ŋeé húle nááyá bímuócí,
tɛ́ cáŋa basɔ́ bɛ́muátá tua sɔ́ŋa ne biíbi.
8 Tu ŋa sɔ́ lɔ́kɔ́ma anamánamá cé muuyé ekime,
ta híáná mu tɛ ŋá basɔ́ nyɔ́lɛ́na ;
ta híáná,
tu tɛ ŋá sɔ́ kása.
9 Indekese ciéŋí ŋaá basɔ́ húlíne á baacɔ,
ta híáná Bandɔ́mɛsɛ́ tɛ ŋá basɔ́ bɛ́yúata te hikúlúkúlú ;
baacɔ ŋa bɔ́ basɔ́ kúúsi ɔ ɔmɛsɛ́,
ta híáná tu ti ŋé sú wé.
10 Aáná ekúlú ekime,
nyɛnamá nyí owé nyí Yésus ŋaá basɔ́ númbine ɔ ɔkɛla anyía baacɔ ábɔ́ lɛcáka e úúsú olíhe,
olíhe ú Yésus.
11 E úúsú olíhe okime ú ɔmɛsɛ́,
basɔ́ baacɔ,
owé ú ŋaá basɔ́ númbine ekúlú ekime a asana ne Yésus.
Aáná baacɔ á bɔ́ŋa bá ɔlɛcaka olíhe ú Yésus náásɔ́,
basɔ́ baacɔ ebé tu ŋe sú wé.
12 Ɛ́ɛhɛ́,
a yáásɔ́ aháŋá,
owé wuúci ú ŋaá basɔ́ númbine ekúlú ekime ;
mbá aá banɔ́,
olíhe á banɔ́ sóómókíne a asana eéyé.
13 Aáná basɔ́ tɔ́na e Elilé noómi tua sɔ́ŋa belumitinine Bandɔ́mɛsɛ́ bɔkɔ búmɔtɛ́ háyɛ yááŋa yɔɔ́ŋɔ́kɔ́nɔ́ anyía :
« I ŋe mí lumitinine,
yaátɛ́ asana ɛ ŋaá mɛ táŋáka ».
* Basɔ́ tɔ́na tu ŋe sú lumitinine,
yaátɛ́ asana tu ŋa sɔ́ táŋa.
14 Tu ŋe sú menyi anyía Bandɔ́mɛsɛ́ ewú u ŋeé héényi Otéŋí a Waáŋá Yésus o owé,
wuúci tɔ́na ú káá basɔ́ héenyiki tɔ́na o owé anyía tua sɔ́ŋa ɔlɔŋɔ ne Yésus ;
yɔ́ kɛ́la anyía tú ka sɔ́ háma nááyá ɔlɔŋɔ na banɔ́.
15 Aáná muuyé mukime eémú amɔ́ tu ŋa sɔ́ lɔ́kɔ́ma áŋa a yáánɔ́ asana ɔ ɔkɛla anyía mbá yaála yí nuubo yɛ́ Bandɔ́mɛsɛ́ é tekéke buéŋí bikúlú bikime a baacɔ ;
aáná beéŋí nyémiki Bandɔ́mɛsɛ́,
bé wuúci iínjíékíne bitéŋíti buéŋí a núáyɛ́ nuúmi noómi.
Cɛɛ́tɔ ci ekúlú ekime
16 Yaátɛ́ asana tu tɛ ŋá sɔ́ bɛ́nyɛ́ána anyía makasa á basɔ́ tímbíéke ;
ta ciasɔ́ cɛɛ́tɔ ŋe húlé ɔtɔmbɔ butíkítíki butíkítíki,
híísú hɛtányɛ́ ŋe bíkúmbútúne a mɔɔ́sɛ́ mekime.
17 Yááŋa anyía muuyé mukime amɔ́ tu ŋa sɔ́ lɔ́kɔ́ma aámbáya tɛ á bá ta bɔkɔ ekúlú ayɛ́ tu ŋe sú muúmu keti na yaandándá yí nuúmi yí ekúlú ekime a yɛ́ a hɔ́la,
nuúnu tu ká sɔ́ lɛ́cáka.
18 Yááŋa anyía tua sɔ́ŋa na mɔŋɔlɛ́ a bɛsana bɛ́ Ɔmuaná abɛ́ baacɔ tɛ ŋá bɔ́ lɛca ne eése ;
basɔ́ tɛ́ka na mɔŋɔlɛ́ a bɛsana bɛ́ ɔmɛsɛ́ abɛ́ baacɔ ŋa bɔ́ lɛca na cáábɔ́ eése.
Yááŋa anyía bɛsana bɛ́ ɔmɛsɛ́ a bɛ́ ŋa lɛ́cana ne eése ti ŋeé líhe ekúlú acaha ;
mbá,
bɛsana bɛ́ Ɔmuaná a bɛ́ tɛ ŋá lɛ́cana ne eése ŋeé líhe bikúlú bikime.