Bɔnyiɔnɔ bá yɔɔ́sɔɔ́sɔ yɛ́ nyɛlatana
3
1 A bɛsana eébí abɛ́ ɛ ŋa mɛ́ ɔ́ɔ́ŋɔ́kɔ,
nua nɔ́ŋa nú ɔkɔɔna yáakɛlá anyía i ŋeé mi bíbééti ayɛ́ʼ ?
Ta anyía tu ŋa sɔ́ áamba anyía núánɔ́ basɔ́ iínjíé nufule nɔ́ ɛmbasɔ́ e nú ŋe tóŋínyi anyía tua sɔ́ŋa taaká cɛ́ baacɔ bá ɛndɔ́ma e ?
Bú tɛ ŋɔ́ yɔ́ɔ́lɔ o otóŋínyi baacɔ nyɛnamá nyí nufule nɔ́ ɛmbasɔ́ eényí aá yaandándá yí buólí ayɛ́ tu ŋa sɔ́ nyiɔ́kɔ náánɔ́.
2 Yááŋa anyía banɔ́ bɛ́muátá nua nɔ́ŋa núásɔ́ nufule a núáŋa nuɔ́ŋɔ́kɔ́nɔ́ é cíísú ɛtɛ́má noómi ;
nuúnu baacɔ bekime ŋe bú menyi,
bá fánaka tɔ́na.
3 Bú ŋoó tóŋínyi bɔmbányɛ bɔmbányɛ anyía *Kilís bɛ́muátá u ŋɔ yɔ́ɔ́ŋɔ́kɔ nufule nú buólí eénú ;
u tɛ ɔ́mɔ́ wɔ́ɔ́ŋɔ na hɛɔ́ŋɛ́ná,
mbá u ŋɔ yɔ́ɔ́ŋɔ́kɔ ne Elilé yɛ́ Bandɔ́mɛsɛ́ a wáŋa wɔɔ́sɔ ;
u tɛ ɔ́mɔ́ wɔ́ɔ́ŋɔ á bɛsalɛ bɛ́ andányɛ́ ɔ ɔmuaná,
mbá u ŋɔ yɔ́ɔ́ŋɔ́kɔ ɛ ɛtɛ́má cɛ́ baacɔ noómi.ª
4 Tu ŋa sɔ́ kɔ́ɔna aáná ananyía tua sɔ́ŋa baháyánɔ́ mɔŋɔlɛ́ eé buúse bɔ́ Bandɔ́mɛsɛ́ a asana eyí Kilís ŋaá basɔ́ tóŋínyi anyía bɛsana eébí áŋa taaká.
5 Tu ŋe sú ményi anyía tu tɛ asɔ́ bá tú ɔkɛlaka bɔkɔ a búmɔtɛ́ na máásɔ́ makɛ́nda ma bɛ́muátá,
ª mbá Bandɔ́mɛsɛ́ bímuócí u ŋaá basɔ́ íinjie makɛ́nda ma ɔnyiɔkɔ buólí eébú.
6 Wuúci u ŋaá basɔ́ iínjíékíne makɛ́nda ma ɔbámɔ́kɔ́na bɔnyiɔnɔ bá yɔɔ́sɔɔ́sɔ yí bumbénú.
Bikotí abɛ́ bɔ́ ŋɔ yɔ́ɔ́ŋɔ́kɔ́ buáyá tɛ á bá a yɔɔ́sɔɔ́sɔ yí bumbénú eéyí noómi,
mbá e Elilé noómi.
Bikotí abɛ́ bɔ́ ŋɔ yɔ́ɔ́ŋɔ́kɔ́ buáyá ŋɔ yɔ́ɔnɔ baacɔ,
mbá *Efúúménénú yí Elilé ŋe beébe iínjie yɔɔ́sɔɔ́sɔ yí olíhe yí ekúlú ekime.
7 Yááŋa anyía bɔ́ ŋɔ yɔ́ɔ́ŋɔ́kɔ́ *bikotí a bɛ́ ŋɔ yɔ́ɔ́nɔ́nɔ a bɛsalɛ bɛ́ andányɛ́ ɔ ɔmuaná na hɛɔ́ŋɛ́ná,
bɔ́ lɛ́caka eese yɛ́ makɛ́nda ma Bandɔ́mɛsɛ́ ekúlú eyí bé ŋe yoófíkinyi baacɔ a nyɛlatana eényí noómi.
Buúse bú *Moyís ŋaá bá búá nɔ́maka na nyɛnamá nyí eese anyɛ́ baáná bé *Islayɛ́l tɛ ɔ́mɔ bɔ́ bá bó wuúci tála eése,
yiíyi anyía eese eéyé ŋaá bá yí ekéti yí ekúlú.
Mbɔ́kɔ bikotí a bɛ́ ŋɔ́ yɔ́ɔnɔ baacɔ ŋeé beébe tóŋgínyi eese yɛ́ Bandɔ́mɛsɛ́ aáná,
8 mbá anyána aná ne buólí bú Efúúménénú yí Elilé e ?
Bú káá kɛ́la anyía baacɔ á lɛcáka buáŋá bɔ́ Bandɔ́mɛsɛ́ ɔ ɔhɔla.
9 Mbɔ́kɔ buólí bú ohulikinyi baacɔ bikotí ŋaá bá búó yóómísíki Bandɔ́mɛsɛ́,
ta yɛ́ caŋa á bá anyía bikotí eébí ŋaá bá bí é nénisiki baacɔ,
tɛ́ka asana e yí ŋe télímínyi baacɔ a batálɛ́mánánɔ́ eé buúse bɔ́ Bandɔ́mɛsɛ́ kéé wuúci óómísíki ɔ ɔhɔla e ?
10 Aáná,
bé é kéti ne nuúmi nɔ́ buáyá na nɔ́ aámbáya bú ŋa lɛ́cana ɔ ɔlɛcana anyía bɔkɔ bɔ́ buáyá eébú tɛ á bá ta bɔkɔ,
ananyía nuúmi nɔ́ aámbáya ne meé buúbu bíhúéne buúse bukime.
11 Yááŋa anyía nyɛlatana nyí bumbénú nyɛ́ buáyá anyɛ́ Bandɔ́mɛsɛ́ ŋaá láta e ekéti yí ekúlú ŋaá bá nyío yoómóko,
tɛ́ka yɔɔ́sɔɔ́sɔ yɛ́ nyɛlatana nyí bumbénú nyí ekúlú ekime kó yoómóko ɔ ɔhɔla e ?
12 Yaátɛ́ asana tu ŋa sɔ́ táŋa a miányɛ́,
baacɔ bekime lɔ́kɔ́máka,
anyía tua sɔ́ŋa baháyánɔ́ nyɛnamá nyɛ́ mɔŋɔlɛ́ ɛ ɛtɛ́má a nyɛ́ á hɔ́la.
13 Yááŋa anyía basɔ́ tu tɛ ŋá sɔ́ kɛla háyɛ Moyís ;
u ŋaá bá weé bíhúéke bɔlaka eé buúse anyía baáná bé Islayɛ́l tɛ lɛca háyɛ eese a yɛ́ ŋaá bá yá nɔ́maka eeyé eé buúse,
e ekéti yí ekúlú ŋeé séŋúlue.ª
14 Híáná cííbú injiŋé ŋeé nyímúkúne ɔ ɔkɔɔ́háma hɛ́nánɔ eeci ;
ekúlú ayɛ́ bá ŋa bɔ́ fana tufule tɔ́ nyɛlata nyí bumbénú nyɛ́ buáyá a Ciɔɔ́ŋɛ́ cɛ́ Bandɔ́mɛsɛ́,
bá tɛ ŋá bɔ́ lɔ́kɔ́ma bɔmbányɛ nyɛfana anyía bá bɔ́ánáŋa ne buume e eése.
Yááŋa anyía hí ekúlú ayɛ́ ɔɔcɔ áŋa e nyimónjóló ne Kilís,
ɛ́ɛhɛ́ buume ŋá mána eeyé eé buúse.
15 Ɛ́ɛ,
ta hú hɛ́nánɔ eeci,
ekúlú ayɛ́ bá ŋa bɔ́ fana tufule tú Moyís,
bá tɛ ŋá bɔ́ lɔ́kɔ́ma bɔmbányɛ nyɛfana háyɛ anyía bɔkɔ meé beébe cúáka injiŋé.
16 Mbá ɔɔcɔ a wá bɛ́kɔ́ŋɔ́nɛ́na ɔtɛ́má,
yɔ́ tála eése né Otéŋí a Waáŋá,
buume káá mána a cááyɛ́ eése.ª
17 Buhúnyi eebu « Otéŋí a Waáŋá » ŋe hémbule aaha anyía Efúúménénú yí Elilé;
ª aáná haála ehé Elilé yí Otéŋí a Waáŋá áŋa baacɔ á bɔ́ŋa baháŋɔ́nákánɔ́.
18 Híáná basɔ́ bekime tú tɛ asɔ́ bá tɔ́na ne buume e eése,
anyía nuúmi nú Otéŋí a Waáŋá ŋa nɔ́ma náásɔ́ª háyɛ o oólí noómi,
tu lɛcakana háyɛ ciayɛ́ ihúényínyí,
na yaandándá yí nuúmi a yɛ́ ŋá bááta bɔ bááta ɔ ɔhɔla.
Buólí bú Otéŋí a Waáŋá eébú ebú Elilé ŋɔ́ nyiɔ.