7
1 Baláamɛ bá ɔtɛ́má,
Bandɔ́mɛsɛ́ maá basɔ́ bɛ́tánákɛ́na ɔ basɔ́ iínjíékine bɛnyɛ́ma eébí bikime.
Yaátɛ́ asana túá nyɛanáka ɔkɛla bɛsana bɛ́ mɔnyɔ́kɔ́lɔ́ na aá ciasɔ́ cɛɛ́tɔ ne eé cíísú ɛtɛ́má áyá ;
túá bɛ́kɛ́ndákɛ́na ɔbámɔ́kɔ́nɛ́na ekúlú ekime befúúménénú bɔmbányɛ bɔmbányɛ,
tu líhéke háyɛ Bandɔ́mɛsɛ́ ŋeé léne o o wuúci kéke.
Bóol ŋeé bíléne a asana ne belumitinine bá Kɔlɛ́ɛntɛ
2 Ɛ ŋaá mɛ́ hálɔ́mɔ́nɛ́na ɔ banɔ́ laana anyía ánɔ basɔ́ húúnékíne cíínú ɛtɛ́má ikime.
Basɔ́ ta ɔkɛla ɔɔcɔ a wɔmɔtɛ́ asana a yaabɛ́,
te onenisi ɔɔcɔ a wɔmɔtɛ́ úúyé olumitinine,
mbá ta ɔnyɛana ɔɔcɔ a wɔmɔtɛ́ bɔkɔ.
3 Ɛ tɛ ŋá mɛ kɔɔna aáná anyía yámɛ banɔ́ túméke andányɛ́,
mbá yááŋa háyɛ yámɛ́ kɔɔna anyía tu ŋa sɔ́ banɔ́ léne buéŋí,
tú ma sɔ́ banɔ́ háya e cíísú ɛtɛ́má noómi ;
te o olíhe,
te o owé,
tua sɔ́ŋa ɔlɔŋɔ.
4 Ya mɛ́ŋa ɔháyánɔ́ mɔŋɔlɛ́ buéŋí náánɔ́,
nu ŋe nú mi iínjie bɔɔcɔ,
nu mi kíndísíki ɔtɛ́má.
Ta ayɛ́ ya mɛ́ŋa ɔlɔ́kɔ́mákánɔ́ muuyé muéŋí,
ɛ tɛ ŋá mɛ kasa ;
mbá ta híáná i ŋeé mi bíléne,
ya mɛ́ŋa háyɛ nyitíne nyí bilúŋe.
5 Yááŋa anyía,
a nyíásɔ́ nyɛkaáháma aaha a Masɛtuán,
tu tɛ ɔ́mɔ sɔ́ bɔ́ŋɔ ohónyí wú ohélúméke te butíkítíki,
mbá tu ŋa sɔ́ lɔ́kɔ́máká anamánamá cé muuyé ekime.
Baacɔ ŋa bɔ́ bá bábɔ́ basɔ́ núúsiki,
basɔ́ tɔ́na ne bulíkílíki aasɔ́ ɛ ɛtɛ́má.
6 Yááŋa anyía ekúlú ekime ayɛ́ baacɔ á bɔ́ŋa bakasákánɔ́,
Bandɔ́mɛsɛ́ u ŋeé beébe kíndísi.
Wuúci u ŋaá basɔ́ hélúmúkúnyi ɛtɛ́má a tɔɔna ekúlú eyí Tite ŋa kaá hámá.
7 Tɛ́ cáŋa hú a asana eéyé cíísú ɛtɛ́má ŋaá halɔ́mɔ́kɔ́ná a tɔɔna,
mbá tɔ́na Bandɔ́mɛsɛ́ ŋaá basɔ́ kíndísíki a bɛsana abɛ́ u ŋaá basɔ́ láákɛ́na.
Ɔsɛ nu ŋe nú wuúci kíndísíkí,
banɔ́ na ɛcaná ciéŋí ci ɔ háná mɛ lɛca ;
nu bɛ́kákálákɛ́na yáánɔ́ aabɛ́ yɛ́ nyɛbɛ́kɛ́lɛ́na,
banɔ́ bebíínjíénú e nyiwééné ɔ mɛ́ kamɛna.
Aáná bɛsana bikime eébí ŋa háná émi íínjie obíléne weéŋí ɔ ɔhɔla.
8 Yááŋa anyía ɛ tɛ ŋá mɛ bɛ́kákálɛ́na aámbáya e nufule anɔ́ ɛ ŋa mɛ́ banɔ́ ɔ́ɔ́ŋɔ́kɛ́na,
ª anyía nú ŋaá banɔ́ íínjíé ɔtɛ́má ɔnua.
Ɛ ŋa cáŋa ámɛ bɛ́kákálákɛ́na ananyía núámɛ́ nufule ŋaá banɔ́ íínjíé ɔtɛ́má ɔnua e hikéti hí ekúlú.
9 Mbá aámbáya i ŋeé mi bíléne buéŋí,
tɛ́ cáŋa a asana ne úúnú ɔtɛ́má ɔnua,
mbá ananyía úúnú ɔtɛ́má ɔnua ŋaá banɔ́ ɔ́ɔ́lɛ́tá ɔ ɔbɛ́kákálákɛ́na máánɔ́ maabɛ́,
ª mbá nu sɔ́mba ɔkɔlɔ́ eé meéme.
Bú ŋeé bilénékíne Bandɔ́mɛsɛ́ aáná,
tu ŋa sɔ́ lɛ́cá anyía tu tɛ ɔ́mɔ sɔ́ banɔ́ kɛ́la bɔɔbɛ́.
10 Yááŋa anyía ɔtɛ́má ɔnua ewú ú ŋe bíléníne Bandɔ́mɛsɛ́ ŋɔ kɔ́ŋɔ́na ɔtɛ́má ú ɔɔcɔ anyía wɔ́ nɔhɔ ;
bé ti ŋé wuúci kákálɛ́na ta buɔ́sɛ́.
Mbá nyɛnamá nyɛ́ ɔtɛ́má ɔnua e nyí ŋeé tímbie baacɔ bá ɔmɛsɛ́ ŋeé beébe héléníne owé.
11 Úúnú ɔtɛ́má ɔnua ŋee bílénékíne Bandɔ́mɛsɛ́ ;
aámbáya aná,
ánɔ lɛcá bɔkɔ abɔ́ ú maá banɔ́ kɛ́laka :
Aayá a nyɛlɛca,
nú me nú bíínjie na ɔtɛ́má okime o otóŋínyi anyía nu tɛ ŋá háná énu léne bɔɔbɛ́ ;
nu ŋa nɔ́ bɛ́kákálɛ́na banɔ́ bɛ́muátá nyɛnamá na nyɛ́ mahana ne nyí bulíkílíki a asana eéyé.
Nua nɔ́ŋa na ɛcaná cɛ ɔ mɛ lɛcɔtɔna,
núá aambaka ɔkɛla háyɛ Bandɔ́mɛsɛ́ ŋeé léne anyía bá bɔ́nɔ́sɛa mɔkɛla maabɛ́.
Nú me nú tóŋgínyi ihényí ikime anyía nu tɛ anɔ́ kɛ́la na hɛkɔma a asana eéyé.
12 Ɛ́ɛhɛ́ nufule anɔ́ ɛ ŋa mɛ́ banɔ́ ɔ́ɔ́ŋɔ́kɛ́ná tɛ ŋá lɛca ɔɔcɔ oócí awɔ́ u ŋa kɛ́láka bɔɔbɛ́,
mbá te ooci awɔ́ sɔ́ɔ́kɔ́ ŋeé wuúci kɛla bɔɔbɛ́ ;
mbá i ŋe mí nuúnu ɔɔ́ŋɔ́kɔ́ anyía núénú ményi bɔmbányɛ eé buúse bɔ́ Bandɔ́mɛsɛ́ anyía nu ŋa nɔ́ basɔ́ léne ne úúnú ɔtɛ́má okime.
13 A yaátɛ́ asana,
aámbáya tua sɔáŋa na ɔtɛ́má a tɔɔna.
Tua sɔ́ŋa na ɔtɛ́má a tɔɔna,
mbá asana yí etémbí áŋa tɔ́na a yɛ́ a hɔ́la.
Tu ŋe sú bíléne tɔ́na a asana ne obíléne ú Tite,
anyía banɔ́ bekime nu ŋe nú wuúci iínjie mbuumu ɔ ɔtɛ́má noómi.
14 Ɛ ŋa mɛ́ banɔ́ lembiki buéŋí ɔ ɔhɔla eé buúse bú Tite,
bú ŋa lɛcana aámbáya anyía ɛ tɛ ɔ́mɔ banɔ́ lémbi e etémbí.
Bɛsana bikime abɛ́ tu ŋa sɔ́ banɔ́ laana áŋa taaká,
híáná nyilémbi nyikime anyɛ́ tu ŋa sɔ́ banɔ́ lémbiki eé buúse bú Tite áŋa tɔ́na taaká.
15 Aáná nulénéne anɔ́ u ŋaá banɔ́ léne áŋa nuhɔ́lánɔ́ buéŋí,
ekúlú ekime ayɛ́ u ŋa bɛ́táá nyíánɔ́ nyɛlɔ́kɔ́mɛ́na anyɛ́ nua nɔ́ŋa bé wuúci lɔ́kɔ́mákɛ́nánɔ́ banɔ́ bekime,
ɔlata ne nyikéke enyí nú ŋe nú wuúci kékéké ne bulíkílíki.
16 I ŋeé mi bíléne buéŋí anyía ya mɛ́ŋa ɔháyánɔ́ mɔŋɔlɛ́ náánɔ́ a bɛsana bikime.