Cící Kristə-lò gakó
2
Sə è gə wɔ́ ǹmyɛ́ yilə,
cèrhè kàrmɔ́ mɔ̀bɔ́ mə̀ ŋwɛ́nɛ́ zhə̀n sɔ́má yó mó lyì bí ni.
2 Byili bala bɛ́ náncɛsɛ́ nɛ,
bə̀ bə̀ mə̂ sə bə zə bə̀ cìn cɛ̀nɛ̀;
lyì bí mə̂ sə bə nyɛ̀ bɛ̀ bə̀ tùntwə̃̀ə̃̀ né yilə;
bə̀ tumə né mə̂ sə nə sú lyì bí yírh;
bə̀ mə̂ sə bə zhí Yi ni kẽkẽ,
sónó ǹdə́ yala nɛ zhìlù wẽ́.
3 Sə́ byili kana bɛ́ náncɛsɛ́ myɛ nɛ bə̀ bə̀ zə bə̀ cìn cɛ̀nɛ̀ bə wɛ̀rhɛ́ Yi pùbùlə̀;
bə̀ bə mə̂ sə bə zɔ̀m lyì bí dwã bɛ́ yil námməlwɛ̀lɛ́;
bə̀ bə mə̂ sə bə yə̀ sɛ̃´ mɔ́ yómə́ yé;
bə̀ mə̂ sə bə byili kɔn dɛ̀bɛ́ rə̀ càn,
4 mùnì bə tó rə̀myɛ́ dɛnnɛ bə byili kə-bwə̃́ə̃́ bé ne bə̀ bə̀ swéné bə̀ byə́nə́ bé ǹdə́ bə̀ bə̀sɔ́ná bɛ́.
5 Èta,
bə̀ mʼa yə̀ wárhgáá,
bə yə̀ lyì byɛ̀bɛ́ bə̀ mʼa sú lyì bí yírh.
Bə̀ mə̂ sə bə nyǐ bə̀ kâlsɛ́ yò;
lyì bí swéné be,
sə bə shɛ̀nɛ́ bə̀ byə́nə́ bé nyí ni.
Èta,
lò kə́ ń wàr ń bà n zɔ̀m Yi zɔ̀mɛ̀ rɛ́ yò námməlwɛ̀lɛ́ yé.
6 Cící ébwá-dàlá bɛ́ myɛ bə zə bə̀ cìn cɛ̀nɛ̀,
bə̀ tumə né sú yírh;
7 sə ǹmyɛ́ cìcì mú yə̀ myɔrhɔ nántwə̂ ǹ tùntwə̃̀ə̃̀ né ǹdə́ ǹ kɔn gakó wẽ́,
ń zə ǹ cìn cɛ̀nɛ̀,
sə́ byili kàrmɔ́ lyì bí ni zhə̀n zhə̀nà ǹdə́ ǹ wu gakó.
8 Ǹ zɔ̀mà nɛ́ gə wɔ́ zhə̀nà,
lyì bí tʼâ la ǹ sõ zɔ̌m yé.
Èta,
cìzhìl bʼa zə nə́ zwə̀ bé,
bə̀ tʼâ la kɔn dɛ̀bɛ́ rə̀ wɔ́ lwɛlɛ nɔ bə zɔ̀m nə́ yil yé.
9 Cící byɛ̀bɛ́ bə̀ wɔ́ yómə́ mó bə zwẽ bə̀ yó-cìnə́ bé nyí ni kɔn gakó wẽ́.
Bə̀ bə̀kʼa cẽ bə̀ nyí ni yé,
sə bə wɛ̀rhɛ́ bə̀ pùbùlə̀.
10 Bə̀ bə̀kʼa myìnì bì yé,
sə bə zə wu-põ ǹdə́ bɛ,
mùnì bə ce lyì bí nyɛ̀ Yi nə́ Zwennə mó zɔ̀mɛ̀ rɛ́ nə́ rʼé byili mú kɔn gakó wẽ́.
11 Yi byili nə́ba rə̀ yò-ècɔ̀nɔ̀ w ò nʼô vwârh lyì bí gakó mó.
12 Yò-ècɔ̀nɔ̀ w òmyɛ́ mɔ́ nʼô byili nə́ba bə̀ nə́ yẽ̌ lwɛlɛ ǹdə́ lũ w shilə námməlwâlsɛ dwí gakó ne,
mùnì ga nə́ yə̀ lyì-twə̂rh,
nə́ yə̀ wu-põ ǹdə́ wu-cángá cìnə́,
bə̀ jʼa zhí Yi ni.
13 Wɔ́ èta nə́ mə̂ sə nə́ wɛ̀rhɛ́ nɛ́ nə́ mʼé dɛ̃̀ wu-nyɔ̃̀ dɛ̃ rɛ́ tɛ̀bɛ́ nə́ Da Yi ǹdə́ nə́ Zwennə Yezu Kristə zùwə́ y la du lyì bí yírhə́ w mó.
14 Ń pɔ ń cìn nə́myɛ̌ yilə,
mùnì ga n vwârh nə́ba nə́ yə̀-bəlwàálɛ́ wa,
n ce nə́ jǐrh ń lyì byɛ̀bɛ́ ń shàrh bə jǐrh wárhgáá,
bə̀ só sə bə wɛ̀rhɛ́ cɛ̀nɛ̀ twéé twéé.
15 Wɔ́ rə̀myɛ́ ǹ mə̂ sə́ byili ǹdə́ ŋwɔ̀nɔ́ w kɔ̀bɔ́ ǹ zhe mó,
mùnì ń cící byɛ̀bɛ́ bə̀ nʼê cili ǹ zɔ̀mà nɛ́ mɔ́.
Bə̀ká yẽ̌ bə̀myɛ́ mə̀dù ga pɔ̀ɔ́sɛ mɔ́ yé.