Kristə-lyì bí gə́ mə̂ sə bə zə bə̀ cìn ní
3
Byili Kristə-lyì bí ni náàcɛ̀nɛ́ bə̀ bə̀ zwẽ cɔ w yé né cìnə́ bé ǹdə́ lyì byɛ̀bɛ́ gakó bə̀ zhe ŋwɔ̀nɔ́ mɔ́ nyí ni.
Bə̀ mə̂ sə bə shɛ̀nɛ́ bə wɛ̀rhɛ́ kɔn dɛ̀bɛ́ bə̀ nʼê byili,
sə bə̀ nʼê wɛ̀rhɛ́ kɔn dɛ̀bɛ́ rə̀ càn twéé twéé.
2 Byili bi bə̀ bə̀ bə̀kʼa zɔ̀m lò yil námməlwɛ̀lɛ́,
sə bə̀ bə̀kʼa bú dwã myɛ yé.
Bə̀ yál wu-bɔ̀nɔ̀ cìnə́,
sə bə wɛ̀rhɛ́ cɛ̀nɛ̀ twéé twéé ǹdə́ lyì bí gakó.
3 Shãã ga nə́myɛ yʼâ yə̀l kaka yé.
Nə́ yʼâ tʼá zwẽ nyí yé.
Nə́ yʼâ tɛ̀nɛ́ zhə̀n sɔ́má yó yé.
Wẽ̀ tɛ̀bɛ́ rə̀ bə càn yâl shil yʼà zù nə́ba,
ce nə́ yʼâ jǐrh ǹdə yómə́ ta rə̀ yilə.
Nə́ yʼâ nʼé dùr bwɛ̃̌,
nə́ rʼé twĩ̀ tumə nyɛ̀bɛ́ nə̀ bə càn.
Nə́ yʼâ bə lyì bí dwã bɛ́ só yé,
bə̀myɛ yʼà bə nə́myɛ só yé.
4 Sə Yi nə́ Zwennə mó byili numbyínə́ bé ne bə̀ ń wɔ́ wu-bɔ̀nɔ̀ ǹdə́ sónó cí,
5 n zɛ̃̀ n vwârh nə́ba.
È də̀ nə́ tumə né wɔ́ cángá yil yé.
Wɔ́ ń gə́ zhe nɔ̀nɔ̀-dǔr ǹdə́ nə́ba mɔ́ yilə.
Ń tó Eshirhə náàcɛ̀nɛ́ dɛnnɛ n shàrh nə́ yə̀-bəlwàálɛ́,
nə́ zɛ̃̀ nə́ nə lul nándùl ǹdə́ nyǔ nándùl.
6 Yi ce Eshirhə náàcɛ̀nɛ́ só nə́ yó w námpúm nə́ Zwennə Yezu Kristə jàn yilə.
7 Wɔ́ Yi gə́ só nə́ba mɔ́ è ce rə wɛ̀rhɛ́ èta,
rə̀ ce nə́ kʼé bə dwə́ə́re zhe yé.
Èta,
nə́ bʼâ nə nyǔ mú mə̀ tʼâ la zhɔ̌,
nə́ rʼé dɛ̃̀ mɔ́.
8 Zɔ̀mɛ̀ rɛ́ rə̀myɛ́ mɔ́ wɔ́ zhə̀nà.
À nʼâ yâl bə̀ ǹ byili ri náàcɛ̀nɛ́.
Èta,
byɛ̀bɛ́ bə̀ zù Yi mú bʼa twĩ̀ tùm-ècɛ̀nà námpúm.
Rə̀myɛ́ bʼa yə̀ kɔn dɛ̀bɛ́ rə̀ càn rə jʼa zhe kùr lyì bí gakó yilə.
9 Sə è gə wɔ́ nə́ nàmbala bɛ́ yilə né,
ǹdə́ búlə́ né,
ǹdə́ nyə̀-pâr nyə̀ná Muyiisi nyə́ né shò-kwã nɛ́ mɔ́ yilə,
sə bə̀ká ce ǹ cìn gàà yé,
bə̀ nyə̀-pâr mâ rə̀myɛ́ yil wɔ́ kɔn nánfò,
rə̀ bə kùr zhe yé.
10 Lò mɔ̀bɔ́ ń nə́ ń lwe Kristə-lyì bí dwã nɛ,
sə́ byili mu.
Ń gə yə̀ yẽ̌,
sə́ kə́ bwérhé ń byili mu.
Ń gə zɛ̃̀ ń yə̀ cili,
rə̀myɛ́ yi ní,
sə́ vùr mò.
11 Lwar bə̀ lò mɔ̀bɔ́ ń nə́ ń twĩ̀ èta ŋwɛ́nɛ́ sɔ́má kɛ̀bɛ́ è bə càn yó.
Ń gə cə̀ə̀lè ń nə́ ń wɛ̀rhɛ́ yə̀-bəlɔ̀lɔ́,
ń nə́ ń cĩ́ dóó ń cìcì yó wə.
12 À mʼa twĩ̀ Arətəmaasɛ ǹdə́ Tishiki ǹ sono.
Sə bə̀ gə túwə́,
sə́ ce jàn nɛ́ ń bə̀ ń nə nɛ Nikopoli ni.
Wɔ́ gàà mɔ́ à nʼâ yâl a jòm né a bʼa dɛ̃̀ wàr rɛ́ lyãɔ̃.
13 Ce jàn nɛ́ ń sɛ̃ Zənaasɛ mɔ́ ń yě nyə́ né náàcɛ̀nɛ́ mɔ́ ǹdə́ Apɔlɔɔsɛ nɛ,
mùnì kaka bə̀kʼa mwìrì bì bə̀ sɔ́má y kǒ yil yé.
14 Nə́ da-byâ Kristə-lyì bí myɛ mə̂ sə bə twĩ̀ tumə nyɛ̀bɛ́ nə̀ càn bə mʼe sɛ̃ lyì byɛ̀bɛ́ bə̀ bə zhe ne.
15 Byɛ̀bɛ́ gakó bə̀ ŋwɛ́nɛ́ ǹdə́ nɛ mɔ́ nʼê ce mó.
Ce nə́ dɔwabá byɛ̀bɛ́ gakó bə̀ wɔ́ Yi lyì ǹdə nə́ ta mɔ́.
Yi bʼa cĩ́ bwəl á gakó yó!