Pwəə sɛ́bɛ́ rɛ́ ń kɛ̃ n pə
Titi
ni mú
Pwəə nə́ ń ce Titi
1
Wɔ́ àmyɛ́ Pwəə à nʼâ kɛ̃ sɛ́bɛ́ rɛ́ tɛ̀bɛ́.
À wɔ́ Yi tùntùnnə̀ ǹdə́ Yezu Kristə tùntúm.
Wɔ́ àmyɛ́ Yi wò bʼà zə byɛ̀bɛ́ rə̀ cír mó a bə̀ bə zù Kristə,
sʼa ce bə lwar zhə̀n dɛ́ gə́ wɔ́ nɛ́,
mùnì ga bə zhí mu kẽkẽ.
2 Èta bə̀ mʼa dɛ̃̀ nyǔ mə̀ tʼâ la zhɔ̌ mɔ́ rə̀ bwəl be mə̀ nyí shãã ga mɔ́.
Yi gə bwəl nyí,
rə̀ tʼâ kwàrh yé.
3 Sə yi rí tɛ̀bɛ́ rə̀ yʼà byili mú gə́ tú e yí,
Yi nə́ Zwennə mó ce bə lwar ń zɔ̀mɛ̀ rɛ́.
Wɔ́ zɔ̀mɛ̀ rɛ́ rə̀myɛ́ Yi pɔ nɛ nyí bʼà bwə̂l a byili.
4 Titi,
à nʼâ kɛ̃ sɛ́bɛ́ rɛ́ tɛ̀bɛ́ à la mɔ́ pɔ,
bə̀ ǹ wɔ́ à byǐ zhə̀n zhə̀n Kristə wẽ́.
Nə́ Yi-ni-zhú mú ce nə́ jǐrh kɔn rə̀dù.
Nə́ Da Yi ǹdə́ nə́ Zwennə Yezu Kristə bʼa cĩ́ bwəl ǹ yó,
sə bə pɔ̃́ yə̀-zùlə́!
Kristə-lyì gùúlí yé né cìnə́ bé
5 À zhǐr a yẽ̌ mó Kərɛtɛ nɛ́ mùnì ga ń kwɛrhɛ kɔn dɛ̀bɛ́ rə̀ dàl Kristə-lyì gùúlí cɛmɛ nɛ́ wẽ́ mó cɛ̀nɛ̀,
sə́ cír lyì ń cĩ́ gùlú gakó yé né.
Lyǐrh kɔn dɛ̀bɛ́ à byili mú bə̀ cír mó shò-kwã nɛ́ mɔ́:
6 Kristə-lyì gùlú yé né cə́bal bə mə̂ sə n yə̀ lò mɔ̀bɔ́ yò ŋwɛ́nɛ́ ń yó w yé.
Ń mə̂ sə n yə̀ kɛ̃ mə̀dù byal,
ń bə̀ká n nyǐ ń dõ yó w yé.
Ń byâ bɛ́ mə̂ sə bə yə̀ Kristə-lyì nántwə̂rh,
lyì bí bə̀kʼa zɔ̀m bə̀ yil námməlwɛ̀lɛ́ yé,
sə bə yə̀ byâ byɛ̀bɛ́ bə̀ nʼê nyàm lò.
7 Kristə-lyì gùlú yé né cə́bal wɔ́ Yi nyə̀ná nɛ́ sõ ń nə́ ń cili ní.
Rə̀myɛ́ ce,
ń bə mə̂ sə n zə yò bə̀ nʼê byili yé;
ń bə̀ká n yə̀ cìn-byilu cə́bal yé;
ń bə̀ká n yə̀ lyim cə́bal yé;
ń bə̀ká n yə̀ sə̀-nyɔ̀rɔ́ yé;
ń bə̀ká n yə̀ búlə́ cə́bal yé;
ń bə̀ká n pyà wársɛ ǹdə́ yǔyǔ yé.
8 Ń mə̂ sə n zwẽ zhələ náàcɛ̀nɛ́,
sə n swéné kɔn dɛ̀bɛ́ rə̀ càn;
ń mə̂ sə n yə̀ lò mɔ̀bɔ́ ń zhe ń cìn cɛ̀nɛ̀;
ń mə̂ sə n yə̀ cángá cə́bal;
ń mə̂ sə n yə̀ lyì-ècɛ̀n námpúm,
lò mɔ̀bɔ́ ń yě ń tum párá;
9 ń mə̂ sə n yə̀ lò mɔ̀bɔ́ ń zhe Yi zɔ̀mɛ̀ rɛ́ zhə̀n dɛ́ ń wẽ́ ǹdə bə̀ gə́ cèrhè mò né.
Èta ń mà n ŋwɛ̀nɛ́ n zə lyì bí dwã bɛ́ wun ni ǹdə́ còrhò mɔ̀bɔ́ mə̀ wɔ́ zhə̀nà.
Ń mà n tó rə̀myɛ́ dɛnnɛ n byili lyì bí byɛ̀bɛ́ bə̀ bə ń kàrmɔ́ só mó ne bə̀ bə̀ tɛ̀nɛ́ zhə̀n sɔ́má yó yé.
Lyì jàlà nʼê byili kàrmɔ̀ mɔ̀bɔ́ mə̀ də̀ zhə̀n mɔ́
10 Zhə̀nà,
lyì nánzhəzhɔ̌ bə shɛ̀ nyí zõ yé,
sə wɔ́ Zhwifubá byɛ̀bɛ́ bə̀ zù Kristə mó bə̀ du.
Bə̀ nʼê jə́jɛ̀rɛ́ lyì bí ǹdə́ zɔ̀mà nyɛ̀bɛ́ nə̀ bə kùr zhe.
11 Bə̀ nʼê zhìlì kâlsɛ námpúmə́ yò.
Bə̀ nʼê byili kɔn dɛ̀bɛ́ rə̀ bə mə̂,
bə̀ mʼê zwẽ wársɛ.
Rə̀myɛ́ ce,
cə̂r be bə̀ kʼê bə̀ zɔ̀m yé.
12 Bə̀ yʼà zhe bə̀ lò mə̀dù bə̀ nʼê nyǐ ǹdə Yi nyì-zwennə ta.
Ń wòwə̀:
“Kərɛtɛ lyì bí nʼê gòm kɔma twéé twéé;
bə̀ wɔ́ vwàmá nyɛ̀bɛ́ nə̀ bə càn;
bə̀ wɔ́ nə̀wàcã̀nyɛla;
wɔ́ jú mú yò ò zù bì.”
13 Sə tɛ̀bɛ́ ń zɔ̀m mɔ́ wɔ́ zhə̀nà.
Rə̀myɛ́ ce,
bú bi náàcɛ̀nɛ́,
mùnì ga bə̀ Yi-ni-zhú mú yə̀ zhə̀n sɔ́má yó,
14 sə bə yẽ̌ Zhwifubá nyə̀ná nɛ́ nə̀ də̀ zhə̀n mɔ́ nɛ.
Bə̀ mə̂ sə bə yẽ̌ lyì bí byɛ̀bɛ́ bə̀ zhɔ̃̀ zhə̀n dɛ́ mɔ́ nyə́ né ne.
15 Kɔn gakó wɔ́ wárhgáá lyì bí byɛ̀bɛ́ bə̀ wɔ́ wárhgáá mɔ́ yilə.
Sə byɛ̀bɛ́ bə̀ zhe jìmdì,
bə zɛ̃̀ bə̀ tʼâ yâl bə zwẽ nyí mú,
kaka də̀ wárhgáá bə̀ yil yé.
Bə̀ wun ní ǹdə́ bə̀ lármɔ́ ga zhe jìmdì.
16 Bə̀ nʼê wə̀l bə̀ bə̀ yě Yi párá,
e jà bə̀ tùntwə̃̀ə̃̀ né nʼê byili bə̀ bə̀ yə̀l rə̀ pár yé.
Bə̀ yò zhìlì;
bə̀ tʼâ nyàm lò lò yé;
bə̀ wàr kɔn dɛ̀bɛ́ rə̀ càn bə̀ nʼê wɛ̀rhɛ́ yé.