Mbogimbogi mu Yehowa wa bulili.
135
1 Lwimbo lwa kubakama. Ganuna Yehowa!
Ganunazi izina lya Yehowa!
Inyuwe bakiti ba Yehowa, muganunazi!
2 Beinyuwe bakwemana mu numba za Yehowa,
Ga milungu za numba za Kalaga weitu,
3 Ganunazi Yehowa, kubuno eli na mponga;
Imbilazi izina lyage, kubuno kwatananina.
4 Kubuno Yehowa eisombolede Yakobo
Nu baIsraeli buno babe bikulo byage.
5 Kubuno nizi buno Yehowa eli munene,
Nu Mukota weitu eli gantata ga tulaga tunsania.
6 Yehowa akitile kinsania kyamutananizizie
Mwigulu nu mu kisi,
Mu kitatenge nu mu buzindu bunsania bwa kisi.
7 Akubakamia lutundutundu kutuka ku myaga za kisi,
Akwamagia nkuba buno zilokye mbula,
Akutikya kisoa ga kikagi kyage.
8 Eitile nkula za Misri,
Za bantu nu za nyama gamozi.
9 Asingile tulolesio nu migeleko mu kisi kyobe, ee Misri.
Ku Farao nu ku bakiti bage bansania.
10 Eitile baBilongo beingi,
Nu bakota babezaga na magala,
11 Sihoni mukota wa baAmori,
Nu Ogi mukota wa kisi kya Basani,
Nu makota mansania ma kisi kya Kanana.
12 Akasenne kisi kyabo
Kuba bupieni bwa Israeli bantu bage.
13 Ee Yehowa, izina lyobe lili lya milyalya,
Ee Yehowa, lukumu lwobe ku kibuti na kibuti.
14 Kubuno Yehowa atule bwisanana ku bantu bage,
Nu abe na kyombo ku bakiti bage.
15 Nkisi za baBilongo zikukitwa na feza nu olo,
Mulimo wa maboko ma bantu.
16 Zili na tunua, tondo tazikutenda;
Zili na meiso, tonda tazikumona;
17 Zili na matuzi, tondo tazikungwa;
Nu tazili na muuza mu tunua twazo.
18 Babo bakuzikita beli bumozi nazo,
U wozo muntu ukuzilemanina.
19 Ee kikanga kya Israeli, ganunazi Yehowa,
Ee kikanga kya Haruni, ganunazi Yehowa;
20 Ee kikanga kya baLawi, ganunazi Yehowa,
Beinyuwe bakukua Yehowa boba, ganunazi Yehowa.
21 Bansania bakwikala mu Yerusalema baganune Yehowa
Kutukila ku Sayuni. Aleluya!