Lutanuno lw'Idagi lya Yehowa.
119
1 Mbogimbogi ku babo basongoloka mu nzila zabo, Bakwenda mu makakizio ma Yehowa.
2 Mbogimbogi ku babo bakulanga bulongeki bwage,
Bakumulonda na mutima wabo unsania.
3 Tabakukita bwagi,
Tondo bakwenda mu nzila zage.
4 Watukakizizie makakizio mobe,
Buno tumanze nunsania.
5 Ngugumanie mu nzila zane
Buno nanze milembe zobe.
6 Nsyakue na nsoni,
Nkungu zinalange makakizio mobe mansania.
7 Nakuganune na mutima wisanana,
Nkungu zinigisibwe makakizio mobe meisanana.
8 Nanze milembe zobe,
Ntunsige nunsania.
9 Buni bwisananie musikila nzila zage?
Mu kuyanga idagi lyobe.
10 Nakulondile na mutima wane unsania,
Ntunsige kwenda bulazi na makakizio mobe.
11 Nabisile idagi lyobe mu mutima wane,
Buno nsikwagile.
12 Ee Yehowa, uganunwe.
Unigisie milembe zobe.
13 Na milomo zane nasambede
Makakizio mansania ma kanua kobe.
14 Nabogilebogile kwenda mu nzila za bulongeki bwobe,
Kutinga kuba na bikulo byingi.
15 Nakengele makakizio mobe,
Nu kusongolola nzila zobe.
16 Nabogelebogele milembe zobe,
Nsibilile idagi lyobe.
17 Kwila mukiti wobe kyombo
Buno nilame nu kwanza idagi lyobe.
18 Kandula meiso mane buno nimone
Miganogano zili mu milembe zobe.
19 Nili mugeni mu kisi,
Ntumbise makakizio mobe.
20 Mutima wane watamba na mpusia
Zinili nazo nkungu insania ku makakizio mobe.
21 Wazugide beiya kabenga,
U babo baswililwa bakwenda bulazi na makakizio mobe.
22 Ntikizye nsoni nu kabenga,
Kubuno nalangile bulongeki bwobe.
23 Mitonge zakundamenne nu kutenda ku kabamba kane,
Tondo mukiti wobe akengede milembe zobe.
24 Bulongeki bwobe buli mbogimbogi zane,
Nu basunguzi bane.
25 Mutima wane walandana na mukungu;
Nkase kalamo anga buli idagi lyobe.
26 Nalolesizie nzila zane nu wanakwide.
Nnigisie milembe zobe.
27 Mmenyesie nzila za makakizio mobe,
Bubo nakengele milimo zobe za miganogano.
28 Mutima wane watamba na kabebe.
Nkase magala anga buli idagi lyobe.
29 Mbembukye na nzila za buza;
Ndolesie nzila za bulili na milembe zobe.
30 Nasombwede nzila za bulili,
Nu kubika makakizio mobe lwabusio lwane.
31 Nalandana na malagi mobe,
Ee Yehowa, ntunitie na nsoni.
32 Nitume lubilo mu nzila za makakizio mobe,
Kubuno watanuna mutima wane.
33 Ee Yehowa, nnigisie nzila za makakizio mobe,
Nu nazilange aaba nu kuzinda.
34 Nkase bumenyinino, nu nne nalange milembe zobe;
Lebelebe namanze na mutima wane unsania.
35 Nsondelezie mu nzila za makakizio mobe,
Kubuno nabogaboga nazo.
36 Sondelezia mutima wane ku malagi mobe,
Ta ku ntundo mbi.
37 Bembukya meiso mane buno nsimone ku bitaswaga,
Tondo nkase kalamo mu nzila zobe.
38 Sakikila mukiti wobe idagi lyobe,
Wozo ukukukua boba.
39 Mbembukye na bilingano binkukua boba,
Kubuno nango zobe zili nsoga.
40 Lola, nili na mpusia ku makakizio mobe;
Nkase kalamo ku kwisanana kwobe.
41 Ee Yehowa, kyombo kyobe kimvwile,
Nu lonio lwobe anga buli idagi lyobe.
42 Ububo naakule wozo ukundinga,
Kubuno nkulemanina idagi lyobe.
43 Ntutikye idagi lya bulili mu kanua kane,
Kubuno nalemaninne nango zobe.
44 Nu nne nayange milembe zobe bindi binsania,
Na milyalya nu milyalya.
45 Nu natabange mu nzila zatanuka,
Kubuno niyigisizie makakizio mobe.
46 Nasambale bulongeki bwobe lwabusio lwa bakota,
Nu nsyabe na nsoni.
47 Nibogiebogie nunse ku makakizio mobe,
Kubuno nkumatunda.
48 Nasakike maboko mane ku makakizio mobe,
Nu nakengele milembe zobe.
49 Kengela idagi liwasambalide mukiti wobe,
Kubuno wambikide kilemanizio.
50 Kikino u kilemanizio kyane mu kabebe,
Kubuno idagi lyobe lyankase kalamo.
51 Beli na lwikotio bansekile nunse,
Tondo nsibilide milembe zobe.
52 Nakengede malagi mobe ma wakalazi.
Ee Yehowa, nu makunkasa magala.
53 Bongoa bwankatile nunse
Ku kabamba ka babo bakusiga milembe zobe.
54 Milembe zobe zili nimbo zane
Kunsania kunkwenda.
55 Ee Yehowa, nkukengela izina lyobe mu kindi,
Nu nkwanza milembe zobe.
56 Bibino byabede byane,
Kubuno nayangile milembe zobe.
57 Yehowa, uli bupieni bwane,
Natendile buno nanze moki mobe.
58 Nasegile lutundo lwobe na mutima wane unsania:
Nkwile kyombo anga buli idagi lyobe.
59 Nakengede nzila zane,
Nu kugalukya magulu mane ku bulongeki bwobe.
60 Nasasizie nu nsizizizie
Kwanza makakizio mobe.
61 Mizigi za bantu babi zankandile,
Tondo nsibilide milembe zobe.
62 Nazanzuke kukuganuna munkatini mwa kindi,
Ku kabamba ka makakizio mobe meisanana.
63 Nili munyabo na bantu bansania bakukukua boba,
Nu babo bakwanza meigisia mobe.
64 Ee Yehowa, kisi kiyala na kyombo kyobe,
Nnigisie milembe zobe.
65 Wakitide mukiti wobe busoga,
Ee Yehowa, anga buli idagi lyobe.
66 Nnigisie bumenyinino nu menge masoga,
Kubuno nakatizia makakizio mobe.
67 Lwabusio nsisungibwa nabezaga nazimina,
Tondo kano kaluma nkwanza idagi lyobe.
68 Uwe uli musoga, nu ukukitaga busoga,
Nnigisie milembe zobe.
69 Babo beli na lwikotio banekede buza,
Tondo nalange meigisia mobe na mutima wane unsania.
70 Mitima zabo ziyala na lwikotio,
Tondo nne nkubogaboga na milembe zobe.
71 Bwabezaga busoga kundi kubabazibwa,
Buno nigisibwe milembe zobe.
72 Mulembe wa kanua kobe guli musoga kundi,
Kutinga tununu twa olo nu feza.
73 Maboko mobe mambumbile nu kunkita,
Nkase menge buno niyigisie makakizio mobe.
74 Babo bakukukua boba babogeboge gabammoneko,
Kubuno nalemaninne idagi lyobe.
75 Ee Yehowa, nizi buno kwatula kwobe kwisanana;
Nu wambabazizie ku kwisanana kwobe.
76 Nkukusega buno kyombo kyobe kimbobelezie,
Anga buli idagano lyobe ku mukiti wobe.
77 Kyombo kyobe kimvwile buno nilame,
Kubuno milembe zobe u mbogimbogi zane.
78 Beiya lwikotio beitibwe na nsoni,
Kubuno bankulungizia na buza,
Tondo nakengele makakizio mobe.
79 Babo bakukukua boba bagalukile kundi,
U babo bamenya malagi mobe.
80 Mutima wane usongoloke mu milembe zobe,
Buno nsikue na nsoni.
81 Mutima wane watamba ku mpusia za lonio lwobe,
Tondo nkulemanina idagi lyobe.
82 Meiso mane matamba ku kulemanina idagi lyobe,
Gankutenda bunee: “Wambobelezie nkungu nkizi?”
83 Kubuno niseli anga katembe mu muuki,
Tondo nsibilide makakizio mobe.
84 Bindi bya mukiti wobe bili binga?
Nkungu nkizi ziwasungie beiti bane?
85 Beiya lwikotio banumbila mizinga;
Bubo tabuli mu makakizio mobe.
86 Makakizio mobe mansania meisanana;
Bantu bakunsuna geteli kabamba; nkasie.
87 Babezaga beseli bwigi na kumbigia mu kisi,
Tondo nsyasigile makakizio mobe.
88 Nkase kalamo ku kyombo kyobe,
Buno nilange bulongeki bwa kanua kobe.
89 Ee Yehowa, idagi lyobe limikilwe mwigulu
Ku milyalya nu milyalya;
90 Kwisanana kwobe kuli ku kibuti na kibuti.
Wabumbile kisi, nu kyo kili ku milyalya.
91 Ku kabamba ka makakizio mobe binsania bimikilwe aaba nu lelo,
Kubuno binsania bikukukitila.
92 Songo makakizio mobe tamabezaga mbogimbogi zane,
Songo ninaziminne mu tubebe twane.
93 Nsibilile milembe zobe,
Kubuno wankasile kalamo nazo.
94 Nne nili wobe, nnonie,
Kubuno nayangile meigisia mobe.
95 Bantu babi bakunkobela buno banite,
Tondo nakengele bulongeki bwobe.
96 Namonine busoga bunsania buli na kuzinda,
Tondo ikakizio lyobe lyatanuka nunse.
97 Lebelebe nkutunda makakizio mobe,
Nkumakengela musi unsania.
98 Makakizio mobe mankasile menge kutinga beiti bane,
Kubuno meli gamozi na nne bindi binsania.
99 Nili na bumenyinino kutinga basozi bane bansania,
Kubuno nalangile makakizio mobe.
100 Nili na bumenyinino kutinga bakungu ba wakalazi,
Kubuno nanzile milembe zobe.
101 Nabembukizie magulu mane mu nzila insania zili mbi,
Buno nianze idagi lyobe.
102 Nsibembukizie na nango zobe,
Kubuno nigisizizibwe na uwe.
103 Moki mobe meli nse kundi,
Kutinga nse za buuki mu kanua kane.
104 Ku kabamba ka moki mobe nili na bumenyinino,
Ububo nkusomba nzila insania zitaswaga.
105 Idagi lyobe lili kasuku ku masindi mane,
Nu kyengi mu nzila zane.
106 Nalumbide nu nazindilizizie
Kulanga makakizio mobe meisanana.
107 Nababazibwa nunse,
Ee Yehowa, nkase magala lingo anga buli idagi lyobe.
108 Ee Yehowa, itabizia nganuno za kanua kane,
Nu kunigisia makakizio mobe.
109 Kalamo kane keli mu boba bindi binsania,
Tondo nsibilide milembe zobe.
110 Bantu babi bantegede itega,
Tondo nsikwibilila milembe zobe.
111 Nakatile bulongeki bwobe bube ntiko zane bindi binsania,
Kubuno buli mbogimbogi za mutima wane.
112 Nasindikile mutima wane kuyanga milembe zobe
Bindi binsania aaba nu ku milyalya.
113 Nkusomba bantu beli na mitima ibili,
Tondo nkutunda milembe zobe.
114 Uwe uli itinino lyane nu ngabo zane,
Nkulemanina idagi lyobe.
115 Beinyuwe bakukita bubi, ntukilazi,
Kubuno nalange makakizio ma Kalaga wane.
116 Ndange anga buli idagi lyobe, ee Yehowa, buno nilame,
Aba ntunsige buno nakue na nsoni mu kilemanizio kyane.
117 Ndange, nu nabe na bubobelelo,
Nu nanze milembe zobe kankanka.
118 Ukubenga bansania bakusiga milembe zobe,
Kubuno menge mabo meli buza.
119 Ukutikya bantu babi mu kisi anga busasa;
Ku bubo nkutunda bulongeki bwobe.
120 Mubili wane ukugilimina kubuno nkukukua boba,
Nu nkukua makakizio mobe boba.
121 Nakitile bulili nu kwisanana,
Ntunsige mu maboko ma babo basungia.
122 Ube kalingilo ka mukiti wobe nu abe na mponga,
Buno beiya lwikotio tabambabazie.
123 Meiso mane makulonda lonio lwobe,
Nu idagi lyobe lisanana.
124 Kitila mukiti wobe bulingilingi na mponga zobe,
Nu kunigisia milembe zobe.
125 Nili mukiti wobe; nkase bumenyinino,
Buno nimenye bulongeki bwobe.
126 Nkungu zakuka buno Yehowa asungie,
Kubuno bakengede milembe zobe bulia.
127 Ububo nkutunda makakizio mobe
Kutinga olo, aba olo zengibwa nunse.
128 Ku bubo nkukengela makakizio mobe mansania meli meisanana,
Nu nkusomba nkita insania za buza.
129 Malagi mobe meli ma miganogano,
Ububo mutima wane wamalangile.
130 Kwigisibwa kwa moki mobe kukulusia kyengi,
Kukukasa kikongolo bumenyinino.
131 Nabika kanua kane bwasi nu kwiza lubilo,
Kubuno natundile makakizio mobe.
132 Ndole nu kunkwila kyombo,
Anga buwakitide babo bakutunda izina lyobe.
133 Sondelezia masomoneno mane ku idagi lyobe,
Aba bubi bunsania tabunangate.
134 Nnonie na babo bakunitia kabebe,
Buno nilange milembe zobe.
135 Sanizia mukiti wobe malanga mobe,
Nu kunigisia milembe zobe.
136 Bisozi byingi bikugela ku meiso mane,
Kubuno tabakwanza milembe zobe.
137 Ee Yehowa, Uwe wisanana,
Nu nsungio zobe zisanana.
138 Bulongeki buwakakizizie bwisanana,
Nu buli bulili.
139 Lugi lwankatile,
Kubuno beiti bane beibilide moki mobe.
140 Idagi lyobe lyasongoloka nunse,
Ububo mukiti wobe akulitunda.
141 Nili mukeke nu muntu ukubengwa,
Tondo nsibilide makakizio mobe.
142 Kwisanana kwobe kuli ku milyalya,
Nu milembe zobe zili bulili.
143 Nsungio nu kabebe byambasile,
Tondo makakizio mobe meli mbogimbogi zane.
144 Malagi mobe meli meisanana ku milyalya,
Nkase bumenyinino nu nalame.
145 Nalilile na mutima wane unsania,
Ee Yehowa, nnakule!
Nalange milembe zobe.
146 Nakulilile bunee: “Nnonie!”
Nu nanze malagi mobe.
147 Nayukile mu mukelo kukusega bukasia bwobe,
Nu nalemaninne moki mobe.
148 Nakesizie ntende,
Buno nikengele idagi lyobe.
149 Ungwilila iyuki lyane bulingilingi na kyombo kyobe,
Ee Yehowa, nkase kalamo bulingilingi na lusungio lwobe.
150 Bakiti ba bubi bankunda,
Nu bo beli bulazi na milembe zobe.
151 Ee Yehowa, uwe uli bwigi na nne,
Nu makakizio mobe mansania meli bulili.
152 Kutukila wakalazi namenyine malagi mobe,
Buno wamabikile ku milyalya.
153 Kengela kabebe kane nu nnonie,
Kubuno nsibilide milembe zobe.
154 Ndongekele nu kunkulula,
Nkase magala lingo bulingilingi n'idagi lyobe.
155 Lonio luli bulazi na bantu bateisanana,
Kubuno tabakulonda milembe zobe.
156 Ee Yehowa, mponga zobe zili ningi,
Nkase magala lingo bulingilingi na milembe zobe.
157 Babo bakunyanga nu beiti bane beli beingi,
Tondo nsyagalukile ku bulongeki bwobe.
158 Namonine ku bengelezi nu nabasombile,
Kubuno tabanzile idagi lyobe.
159 Ee Yehowa, lola bunkutunda idagi lyobe,
Nkase magala lingo bulingilingi na kyombo kyobe.
160 Idagi lyobe linsania lili bulili,
Nu nsungio zobe insania zili za milyalya.
161 Mitonge zikunsungia geteli kabamba,
Tondo mutima wane ukukua idagi lyobe boba.
162 Nkubogaboga n'idagi lyobe,
Anga muntu ukumona ku bikulo byingi.
163 Nkusomba, ee, lebelebe nkusomba nunse buza,
Tondo nkutunda milembe zobe.
164 Nkukusima mambizi mutubakamo busi na busi,
Ku kabamba ka malagi mobe meisanana.
165 Babo bakutunda milembe zobe beli na bubobelelo bunene,
Nu tabanakikitanwa.
166 Ee Yehowa, nkulemanina lonio lwobe,
Nu nkukita makakizio mobe.
167 Mutima wane wanzile bulongeki bwobe,
Nu nkubutunda nunse.
168 Nanzile makakizio mobe nu malagi mobe,
Kubuno nzila zane insania zili lwabusio lwobe.
169 Ee Yehowa, idilo lyane likubasile,
Nkase bumenyinino bulingilingi n'idagi lyobe.
170 Isego lyane libase lwabusio lwobe,
Nnonie bulingilingi n'idagi lyobe.
171 Milomo zane zikuganune,
Kubuno ukunigisia milembe zobe.
172 Lulami lwane lutende idagi lyobe,
Kubuno makakizio mobe mansania meisanana.
173 Kuboko kwobe kube kayikayika kunkasia,
Kubuno nasombwede malagi mobe.
174 Ee Yehowa, natunda nunsania lonio lwobe,
Nu milembe zobe zili mbogimbogi zane.
175 Mutima wane ulame, buno nakuganune,
Nu makakizio mobe mankasie.
176 Natimbiletimbile anga mukoko wazimina;
Londa mukiti wobe, kubuno nsibilide makakizio mobe.