Mbogimbogi za bonibwa.
118
1 Ganunazi Yehowa kubuno eli musoga! Kubuno kyombo kyage kili kya milyalya.
2 BaIsraeli batende bunee:
“Kyombo kyage kili kya milyalya.”
3 Kikanga kya Haruni kitende bunee:
“Kyombo kyage kili kya milyalya.”
4 Babo bakukua Yehowa boba batende bunee:
“Kyombo kyage kili kya milyalya.”
5 Mu kabebe kane namanine Yehowa.
Yehowa anakwide nu kumbika ga kiziki kinene.
6 Yehowa eli ku lulenge lwane, nsyakue boba;
Muntu ankite kikizi?
7 Yehowa eli ku lulenge lwane; eli mukasia wane,
Ku bubo namone kukindwa kwa basombi bane.
8 Kulemanina Yehowa kuli kusoga kutinga kukatizia muntu.
9 Kulemanina Yehowa kuli kusoga kutinga kukatizia mitonge.
10 BaBilongo bansania bantimbile,
Ku izina lya Yehowa nabazikye.
11 Bantimbile ku ndenge insania.
Ku izina lya Yehowa nabazikye.
12 Bantimbile anga minzunzu,
Baziminne anga keiya ka mikele;
Ku izina lya Yehowa nabazikizye.
13 Wansindikile na magala buno nigoe gansi,
Tondo Yehowa ankasizie.
14 Yehowa eli magala mane nu lwimbo lwane,
We eli lonio lwane.
15 Iyuki lya kyelele nu lya lonio
Meli mu numba za bantu beisanana;
Kuboko kwa seidume kwa Yehowa kukukita na magala.
16 Kuboko kwa seidume kwa Yehowa kwasakikwa,
Kuboko kwa seidume kwa Yehowa kukukita na magala.
17 Nsyakue, tondo nalame,
Nu kusambala milimo za Yehowa.
18 Yehowa ansuswide nunse,
Tondo ntansigile nikue.
19 Nkandulile nibi za kwisanana,
Ningile muzo nu kuganuna Yehowa.
20 Luluno u lwibi lwa Yehowa,
Bantu beisanana beingile mulo.
21 Nakuganune kubuno wanakula,
Nu uli lonio lwane.
22 Ikozi lyasombilwe na bobaki
Lyabede ikozi inene lya kapindapinda.
23 Kitondo kikino kyatukile ku Yehowa,
Nu bubo bukutuganiagania.
24 Busi bubuno u bwakitile Yehowa,
Twabe na kyelele nu kubogaboga mubo.
25 Ee Yehowa, nkukusega utonie;
Ee Yehowa, nkukusega utonie nu kutukasa mponga.
26 Mbogimbogi ku wozo ukuvwa mu izina lya Yehowa;
Twamukasile mponga kutuka ku numba za Yehowa.
27 Yehowa eli Kalaga,
Nu We atusanizizie kyengi.
Kandazi kisansa na mizigi ku mega ma kasenga ka kayulo.
28 Uwe uli Kalaga wane, nakuganune,
Uwe uli Kalaga wane, nakutanune.
29 Ganunazi Yehowa kubuno We eli musoga,
Kubuno kyombo kyage kili kya milyalya.