Mukota eizi bitondo binsania.
94
1 Ee Yehowa, uwe Kalaga wa kusuba,
Sana lingo, uwe Kalaga wa kusuba.
2 Uwe Ngatu za kisi, zanzula
Nu liga beiya lwikotio anga bubatunganana.
3 Yehowa, aaba ku nkungu nkizi bateisanana,
Aaba ku nkungu nkizi batesanana bakinde?
4 Beli na moki mengi, bakutenda na lwikotio.
Bantu babi bansania bakwiganuna.
5 Ee Yehowa, bakeka bantu bobe byindibyindi,
Nu bakwitia kilongo kyobe na kabebe.
6 Bakwita musigala nu mugeni,
Nu kwita nkubi.
7 Nu bakutenda bunee: “Yehowa ntamone,
Aba Kalaga wa Yakobo ntasongolole kampa.”
8 Kengelazi, inyuwe bikongolo munkatini mwa bantu,
Beinyuwe bagazanga, nkungu nkizi zimwabe na menge?
9 Wozo wabikile kutuzi ga kiziki kyage, ndi ntongwe?
Wozo wabumbile liso, ndi ntamone?
10 Wozo ukwigisia baBilongo, u wozo ukwigisia muntu menge,
Ndi ntazuge?
11 Yehowa eizi makengelo ma muntu,
Buno meli buliabulia.
12 Ee Yehowa, mbogimbogi ku muntu ukususulwa nobe,
Nu kwigisibwa ku milembe zobe.
13 Buno umumuzie ku bindi bya bubi,
Aaba nu ku nkungu zikumbwa muzinga ku babi.
14 Kubuno Yehowa ntateze bantu bage,
Aba ntasige bwiyani bwage.
15 Kubuno lusungio lwa Yehowa lwabe ku kwisanana,
Nu bansania beli na mutima wisanana baluyange.
16 Nazi wemane ku lulenge lwane ku kabamba ka bantu babi?
Nazi wankasie ku babo bakukita bwagi?
17 Songo Yehowa ntabezage mukasia wane,
Kalamo kane kanasasizie kwikala mu kibibi kya lukuo.
18 Nkungu zinatendile bunee: “Kugulu kwane kwaselemuka,”
Ee Yehowa, kyombo kyobe kyanimikile.
19 Nkungu za makengelo mane mengi,
Kubobelezia kwobe kukubogiabogia mutima wane.
20 Ndi bukota bwa bwengelezi bunagomia na Kalaga,
Bukulongekela bubi ku mulembe?
21 Bakukundamana nu kukala lwango ku kwita wisanana,
Nu kusungia muntu uteli na kabamba.
22 Tondo Yehowa eli itinino lyane,
Nu Kalaga wane eli lwanda lwakutinina.
23 Nu Kalaga abasubizie bubi bwabo,
Abazikye mu bubi bwabo;
Yehowa, Kalaga weitu abazikye.