Masego meli magala meitu.
86
1 Isego lya Davidi. Ee Yehowa, tega kutuzi kwobe, unakule,
Kubuno nili muzambi nu muntu ukwiyanina.
2 Langa kalamo kane kubuno nili mukatizia;
Ee Kalaga wane, onia mukiti wobe ukukulemanina.
3 Ee Mukota, nkue kyombo;
Kubuno nkulila kuguli musi unsania.
4 Bogiabogia kalamo ka mukiti wobe;
Kubuno nazanzula kalamo kane kuguli, ee Mukota.
5 Kubuno uwe Mukota, uli musoga nu musasia kusigilila,
Uli na kyombo ku bansania bakukusega.
6 Ee Yehowa, ungwilila masego mane;
Nu iyuki lya masego mane.
7 Ku busi bwa kabebe kane nasege kuguli,
Kubuno wanakule.
8 Ee Mukota, takuli ungo anga Uwe munkatini na tulaga,
Aba takuli milimo anga milimo zobe.
9 Ee Mukota, bilongo binsania biwakitile
Bavwe lwabusio lwobe kukukumbamina,
Nu baganune izina lyobe.
10 Kubuno uli munene, nu ukukita miganogano;
Uwenyene uli Kalaga.
11 Ee Yehowa, nnane nzila zobe,
Buno nitabange mu bulili bwobe;
Longeka mutima wane buno nanze izina lyobe.
12 Ee Mukota, Kalaga wane, nakusime na mutima wane unsania,
Nu naganune izina lyobe bindi binsania.
13 Kubuno kyombo kyobe kundi kili kinene,
Nu watikizye kalamo kane mu mizinga za lukuo.
14 Ee Kalaga, beiya lwikotio bamvwila,
Nu tumanwa twankundamanina buno tunnite,
Aba tabakukubika lwabusio lwa meiso mabo.
15 Tondo uwe Mukota, uli Kalaga wiyala kyombo nu mponga,
Ukwikalila, nu uli na kyombo nu bulili nunse.
16 Lolela kundi nu nkwile kyombo;
Kasa mukiti wobe magala mobe,
Nu onia mwana wa mukiti wobe.
17 Ndolesie migeleko za busoga;
Aba nu babo bakunsomba bamone kuzo nu kukua na nsoni,
Kubuno uwe Yehowa, wankasizie nu kumbobelezia.