Kusega bukasia mu nkungu za bita.
83
1 Lwimbo lwa Asafu. Ee Kalaga, ntwikale kibibi!
Ee Kalaga, ntubibe aba ntubobelele!
2 Kubuno beiti bobe bakukita kazege;
Nu babo bakukusomba basakika matoe mabo.
3 Bakukala lwango lwa bwengelezi ku kabamba ka bantu bobe,
Nu bakutendana ku kabamba ka babo bawalangile.
4 Bakutenda bunee: “Vwazi tubazikyazi
Buno tababe lingo kilongo,
Buno izina lya Israeli talikengelwe lingo.”
5 Ububo bakalile lwango na mutima umozi,
Bakitile idagano lya kwitana nobe.
6 Beli numba za Edomu nu baIsimaeli,
BaMoabu nu baHagari,
7 Nu baGebali, nu baAmunoni nu baAmaleki,
Nu baFilistini gamozi na ba ku Tiro;
8 BaAsuria bagomezie nabo;
Bakasizie bana baLoti. Right' Kengela bubo.
9 Ubakitile anga baMidiani,
Anga Sisera, anga Yabini ku luuzi lukumanwa Kisoni,
10 Babo beitilwe ku Endori,
Babezaga anga tubi mu kisi.
11 Kitila bakulu babo anga Orebu nu Zebu,
Nu mitonge zabo insania anga Zeba nu Zalmuna;
12 Batendile bunee:
“Tunyage kiziki kya kulisizia ga mikoko kya Kalaga buno kibe kyeitu.”
13 Ee Kalaga wane, bakite anga mukungu ukutimba,
Anga mintula zikulengibwa na lumpumpu,
14 Anga keiya kakugisia lubanda,
Anga ndembelela za keiya zikugisia mwiduko!
15 Ububo buwabayange na kisoa kyobe,
Beitie boba na kisoa kyobe.
16 Babise meiso mabo gabakukua na nsoni
Buno balonde izina lyobe, ee Yehowa.
17 Bakue na nsoni nu kuzangazanga,
Bakindwe nu kuzimina.
18 Bamenye buno uwe ukumanagwa Yehowa,
Uwenyene uli Wasakama Nunse, nu uli gantata ga kisi kinsania.