Masego ma wozo ukusungibwa.
69
1 Ku kalongo kanene. Lwimbo lwa Davidi. Ee Kalaga, nnonie,
Kubuno mazi manzindila mu ikosi.
2 Nakoka mu bisogo byingi ga kiziki kitanakulungana kwemana;
Nabasa mu iziba izindu nu bimpumi bya mazi bikuntumpula.
3 Nakutwa na kulila, mwego wane wakama;
Meiso mane makunguka mu kulemanina Kalaga wane.
4 Bakutunda kunita beli na magala, beli beiti bane ku bwengelezi.
Ndi natunganana kusubya kinsyibile?
5 Ee Kalaga, wizi bukongolo bwane,
Bwagi bwane tabunabisama kuguli.
6 Ee Yehowa Mwiya Mayombo, Mwiya Bwangato Bunsania,
Ntwite bakukulindila na nsoni ku kabamba kane;
Ee Kalaga wa Israeli, ntusige babo bakukulonda kubengwa ku kabamba kane.
7 Kubuno ku kabamba kobe nikalide bilingano,
Nu nakule na nsoni.
8 Niseli mugeni lwabusio lwa mibuto zane,
Nu nsili na mugomio na bana ba mmane.
9 Kubuno lugi lwa ku numba zobe lwankatile,
Nu bilingano bya babo bakulingaga byanegamina.
10 Nkungu zinalilile nu nikandile idia,
Ku kukita bubo bandingile.
11 Nkungu zinavwalile ikunino,
Nabede nsumo kubeli.
12 Babo bakwikala ga mwingilo bakuntekula,
Niseli lwimbo lwa banuzi ba maku.
13 Ee Yehowa, tondo masego mane meli kuguli nkungu zikukutananizia;
Ee Kalaga, ku kyombo kyobe kyingi nnakule ku bulili bwa lonio lwobe.
14 Nnonie nu kuntikya mu bisogo, buno nsikoke mubyo.
Nnonie na basombi bane nu mu biziba bizindu bya mazi.
15 Ntusige mazi kuntumpula,
Aba kukoka mu iziba,
Aba muzinga kunkukila.
16 Ee Yehowa, nnungwilile, kubuno mponga zobe zili nsoga.
Nu ndole ku kyombo kyobe kyingi.
17 Aba ntubise mukiti wobe malanga mobe,
Sasia kunnungwilila kubuno nili na kabebe.
18 Sigelela kundi nu kunonia,
Nkulule ku kabamba ka beiti bane.
19 Uwe wizi kulingwa nu nsoni nu kubengwa kwane;
Beiti bane bansania bakumoneka lwabusio lwobe.
20 Bilingano byabela mutima wane, nu niseli musambi,
Nalondile unankwila kyombo, takwabezaga wampa,
Nu wakumbobelezia, nsyamumonine.
21 Bankasile nsangu buno zibe idia lyane;
Ganabezaga na mpusia bankasile maku meli na ngigi nkali.
22 Meza mabo mabe itega lwabusio lwabo,
Nu busoga bwabo bube itega lyabo.
23 Meiso mabo mazibe geteli kumona.
Nu bibunda byabo bikumbame kankanka.
24 Kubula lusungio lwobe kubeli.
Nu bukali bwa bongoa bwobe bubakate.
25 Kiziki kyabo kibe bukindu,
Tagabe muntu wa kwikala mu numba zabo.
26 Kubuno bakusungia muntu u wasuswide
Nu bakwililika wozo u wasumitile.
27 Talikila bubi gantata ga bubi bwabo,
Aba tabeitabizibwe ku kwisanana kwobe.
28 Zimia meina mabo mu mukanda wa kalamo,
Aba tabasanzwe gamozi na bantu beisanana.
29 Tondo nili muzambi nu muntu wa kabebe,
Ee Kalaga, lonio lwobe lunzanzule.
30 Nasime izina lya Kalaga mu lwimbo,
Namuganune nu kumutananizia.
31 Nu bwatananizie Yehowa kutinga mulume wa ngombe,
Aba kyana kya ngombe kili na mega nu byondo.
32 Ku kumona bubo, bazambi babogeboge,
Beinyuwe bakulonda Kalaga, mitima zeinyu zilame.
33 Kubuno Yehowa akungwa meiyanino ma bazambi,
Aba ntakubenga bakandwa bage.
34 Meigulu nu kisi bisime Yehowa,
Bitatenge nu binsania bikulama mubyo.
35 Kubuno Kalaga onie Sayuni nu kobaka miino za Yuda;
Nu bantu beikale muzo nu kwiyanazo.
36 Ibuta lya bakambi bage baziyane;
Nu bansania bakutunda izina lyage beikale muzo.