Kalaga akinda bansania bakumusomba.
68
1 Ku kalongo kanene. Lwimbo lwa Davidi. Kalaga azanzuke nu beiti bage babalanganibwe,
Babo bakumusomba batine bulazi na meiso mage.
2 Anga bubo bukulenga muuki, ububo balenge nu bo,
Anga bukunyenguka iyula lwabusio lwa keiya,
Ububo bwazimine bantu babi lwabusio lwa Kalaga.
3 Tondo beisanana babogeboge,
Nu babe na kyelele lwabusio lwa Kalaga.
Lebelebe babogeboge nunse.
4 Imbilazi Kalaga, imbazi lutanuno ku izina lyage,
Mwatilazi nzila wozo ukwenda mu bimpa,
Izina lyage lili Yehowa,
Nu mubogeboge lwabusio lwage.
5 Isi wa nkubi nu mulangi wa misigala
Eli Kalaga mu kiziki kyage kyasililila.
6 Kalaga akukasana numba ku babo basigilwe,
Akukandula babo beli bakandwa,
Tondo bantu batakwanza Kalaga beikale mu kisi kyakama.
7 Ee Kalaga, nkungu ziwendile lwabusio lwa bantu bobe
Nkungu ziwatingile mu kalula, Right' Kengela bubo.
8 Kisi kyatengiletengile,
Meigulu malokezye mbula lwabusio lwa Kalaga,
Aba Sayuni atengiletengile kuko lwabusio lwa Kalaga, u Kalaga wa Israeli.
9 Ee Kalaga walokezye mbula ningi,
Nkungu zatambile bwiyani bwobe wabukasile magala.
10 Musanganano wobe ukwikala mumo.
Ee Kalaga, walongekile busoga bwobe ku babo bazambi.
11 Mukota asambede idagi lyage,
Babo basambede lyo babezaga kibombo kinene.
12 Bakota ba mayombo batina, batina;
Nu wozo ukusigala mu numba akubegania ntiko.
13 Aba gamukumunwa mu mikumba za mikoko,
Mwasane anga nkulimba zili na byupi byenga,
Nu nsala zakisimana.
14 Mwiya Mayombo abalanganizie bakota mu kisi
Kwabezaga anga kukoloka kwa lubula kutuka ku Zalmoni.
15 Mwiduko wa Kalaga guli anga mwiduko wa Basani;
Mwiduko wa Basani guli na ntonga ningi.
16 Ee inyuwe muli ku miduko za Basani, kubuni muli na lugi
Ku babo beli ku mwiduko wasombwede Kalaga buno Yehowa eikale gago ku milyalya?
17 Tuyanga twa Kalaga tuli tununu na tununu.
Mukota eli munkatini mwato anga bweli mu Sayuni kiziki kyage kyasililila.
18 Wabakamine kwigulu, wakandwide bakandwa,
Wakasile bantu nkaso;
Aaba nu ku babo batakwanza,
Buno Kalaga Yehowa eikale gamozi nabo.
19 Mukota aganunwe ukweka muzigo weitu busi na busi,
Aba Kalaga wikile lonio lweitu. Right' Kengela bubo.
20 Kalaga weitu eli Kalaga wa konia,
Nu Yehowa, Mwiya Bwangato Bunsania, eli nzila za kutuka ku lukuo.
21 Tondo Kalaga ate itoe lya beiti bage,
Kikoba ky'itoe nu nzwili za wozo ukwitilila mu kukita bwagi.
22 Mukota atendile bunee: “Nalusie bantu bane ku Basani.
Nabalusie kutuka ku biziba bya bitatenge.
23 Buno wine magulu mobe mu mikila,
Nu ndami za mboa zobe zabe na nkindi ku beiti bobe.”
24 Bamonine ku ngendo zobe, ee Kalaga,
Aaba nu ngendo za Kalaga wane, Mwangati wane ku kiziki kyage kyasililila.
25 Beimbi bendaga lwabusio,
Batuti ba bindanda babezaga kumbusa,
Munkatini mwabo mwabezaga bakinga bagombaga tugoma.
26 Ganunazi Kalaga mu misanganano,
Aba Yehowa, inyuwe kikanga kya Israeli.
27 Benjamina muto wabo ukubasondelezia,
Nu bakota ba Yuda na mayombo mabo,
Bakota ba Zebuluni nu bakota ba Nafutali.
28 Kalaga wobe akakizizie magala mobe.
Ee Kalaga, bika magala mawatukitide.
29 Ku kabamba ka numba zobe z'ikumbamino zili ku Yerusalema
Bakota bakuvwile na nkaso.
30 Zugila nyama zili mu nsolu,
Balume beingi ba ngombe gamozi na byana bya ngombe za bantu
Bakunyanta kunsi kwa magulu mabo byindi bya feza.
Nu ubalanganie bantu bakutunda bita.
31 Bakulu batuke ku Misri,
Nu Etiopia alambye maboko mage lubilo ku Kalaga.
32 Imbilazi Kalaga, inyuwe makota ma mu kisi,
Ee, imbazi kuganuna Mukota, Right' Kengela bubo.
33 Ku wozo ukwikalaga mwigulu lya meigulu lya wakalazi,
Lola akutenda n'iyuki lyage, iyuki lya bwangato.
34 Menyazi magala ma Kalaga,
Bwangato bwage buli gantata ga Israeli,
Nu magala mage mu mpelela.
35 Ee Kalaga, ukuganiagania bantu kutinga biziki byobe byasililila.
Kalaga wa baIsraeli eli wozo ukukasa magala nu bwangato ku bantu bage.
Kalaga aganunwe.