Kusega Monia mu mbambazio.
22
1 Ku kalongo kanene ka bikuzuma, bikumanwa Aijeleth Shahar, bwisulilwa buno “mubale w'ibuti.” Lwimbo lwa Davidi. Kalaga wane, Kalaga wane, kubuni kuwandekelela?
Kubuni uli bulazi kunkasia, nu kungwa ku kutonga kwane?
2 Ee Kalaga wane, nkulila mu musi, tondo ntukunakula,
Nu mu kindi nsikwikala kibibi nu nsikubobelela.
3 Tondo uwe wasililila,
Ukuganunwa na baIsraeli.
4 Batateiswe bakubikide kilemanizio kyabo,
Nu bakulemaninne, nu wabonezie.
5 Balilile kuguli, nu bonezibwe,
Bakubikide kilemanizio kyabo, nu tabalibilelibile.
6 Tondo nili munsobobo aba nsili muntu,
Nsoni za bantu, nu ukubengwa na bantu.
7 Bansania gabakummonako bakunseka nunse,
Bakusongola milomo, nu kutengia matoe mabo. Bakutenda bunee:
8 “Akulemanina Yehowa; We amwonie lingo,
Amwonie kubuno atananizibwa nage.”
9 Tondo Uwe uli wozo wantikizye munda.
Wandutile kukukatizia kutukila ganabezaga ku mabele ma mmane.
10 Nakasenwe kwobe kutukila kubutwa,
Kutukila kubutwa kwane Uwe uli Kalaga wane.
11 Ntwikale bulazi na nne kubuno kabebe keli bwigi,
Aba takuli umozi wankasie.
12 Balume ba ngombe beingi bantimba,
Ngombe nnene za balume za magala za ku Basani zantimba.
13 Banasulila tunua twabo,
Anga bukuzugaga kimbwe kili na nzala.
14 Nabede anga mazi makubuka,
Nu makwa mane mansania mabelekile.
Mutima wane wabede anga iyula.
Nu kunyenguka munda mwane.
15 Magala mane makamine anga kyindi ky'idega.
Nu lulami lwane lwalandenne na kanua kane.
Wambikile munkatini mwa mukungu wa lukuo.
16 Kubuno mboa zantimba.
Musanganano wa bantu babi wantimba.
Babotola makasa nu masindi mane.
17 Ninavwama kuganza makwa mane.
Bakummona na meiso mabo nu kundola.
18 Babegania nsulu zane gabasamba.
Nu nsulu zane bakuzesela mbale.
19 Tondo Yehowa, ntube bulazi na nne,
Uli Magala mane, nkasie lubilo.
20 Onia kalamo kane buno nsitwe na mwene wa nganda,
Aba na magala ma mboa, ee mutundwa wane.
21 Nnonie kutuka mu kanua ka kimbwe,
Nu na mega ma mbogo.
22 Nasambale izina lyobe ku mibuto zane,
Munkatini mwa musanganano nakuganune.
23 Beinyuwe bakukua Yehowa boba, mumuganune.
Beinyuwe beli kikanga kya Yakobo, mulolesie lwanzo!
Nu kuazi boba nunse, beinyuwe ba kikanga kya Israeli!
24 Kubuno ntabengile aba kusomba mbabazio za wababazibwa,
Aba ntamubisile malanga mage.
Tondo nkungu zalilile kwage, ungule.
25 Nakuganune mu musanganano munene,
Nazindilizie bilumbilo byane lwabusio lwa babo bakwanza.
26 Bantu bola mu mutima balie nu kwikuta,
Bakuyanga Yehowa bamuganune.
Wabe na kalamo ka mbogimbogi nu ka milyalya.
27 Kisi kinsania kikengele nu kugaluka ku Yehowa,
Nu baBilongo bansania bakumbame lwabusio lwage.
28 Kubuno bukota buli bwa Yehowa,
Wozo ukwangata baBilongo.
29 Bagumi bansania ba kisi balie nu kuganuna,
Bansania bakwenda ku mukungu bakumbame lwabusio lwage,
Aba wozo utakumenya kulanga kalamo kage wenyene.
30 Bikanga binsania byamukitile.
Misagu za Mukota zasambalwe ku kibuti kikavwa.
31 Bavwe nu kusambala kwisanana kwage
Ku bantu babutwe, buno We u wabukitile.