Kusega bukasia
10
1 Ee Yehowa, kubuni wemana bulazi? Kubuni ukwibisa ku nkungu za kabebe?
2 Ku lwikotio lwa babi bakuyanga batamba na bukali;
Bakatwe mu bwengelezi bubakengelaga.
3 Kubuno muntu mubi akwiganuna ku lutundo lwa mutima wage,
Nu mwiya nduma akutuna Yehowa nu kumubenga.
4 Muntu mubi ku lwikotio lwage ntakulonda Kalaga.
Makengelo mage mansania meli buno takuli Kalaga.
5 Nzila zage zili nsoga nkungu insania.
Eli na lwikotio nu Makakizio mobe meli bulazi na makengelo mage
Akubenga beiti bage bansania.
6 Akutenda mu mutima wage bunee: “Nsyatengetenge
Aaba ku kibuti na kibuti nsyabe mu mbabazio.”
7 Kanua kage keiyala na bilingano nu bwengelezi nu kabenga;
Kunsi kwa lulami lwage kuli bwiti nu bubi.
8 Mu miino mikeke akukobela mu kiziki kya kwibisa.
Mu lumbisombiso akwita muntu uteli na kabamba.
Nu meiso mage makukobela muntu uteli na magala.
9 Akwibisa anga kimbwe buno akate watamba.
Akulindila kumukata.
Akumukata nu kumubuluta ku bukila bwage.
10 Akwikundasa nu kukumbama nu babo batamba bakugoa ku magala mage.
11 Akutenda mu mutima wage bunee: “Kalaga eibilila.
Akubika malanga mage kungo, ntamone kampa.”
12 Ee Yehowa, zanzuka nu sakika kuboko kwobe.
Ntwibilile bazambi.
13 Kubuni muntu mubi akubenga Kalaga?
Akutenda mu mutima wage bunee: “Ntasungie lingo.”
14 Tondo wamona kabebe nu mbabazio, nu kulola mibi; uzizikye na kuboko kwobe.
Nu muntu musosu akwibika kuguli,
Kubuno uli mukasia wa nkubi.
15 Ukuketula kuboko kwa muntu mubi.
Ukusungia muntu ku bubi bwage aaba ntwabumone ko lingo.
16 Yehowa eli mwangati ku milyalya na milyalya,
Bantu ba bilongo bazimine mu kisi kyage.
17 Yehowa, wungule ku mpusia za bantu basosu,
Wakulumizie mitima zabo, wabongwilile na kutuzi kwobe.
18 Buno ukite bwisanana ku nkubi nu wozo ukubabalwa,
Buno muntu wa kisi kikino nteitie boba lingo.