24
1 Nu atendile lingo bunee: “Kubuni Mwiya Mayombo ntakubika busi bwa kusungia, aba kulolesia bubo busi ku babo bakumukitila. 2 Bantu babi bakwigia myaga, nu kunyaga lusumba nu kululisia gamozi na lwabo. 3 Bakwiba mpunda za nkubi, nu kukata ngombe za musigala kuba kyango. 4 Bakupumbia beiyanizi mu nzila zabo, nu bazambi bakutina nu kubisama. 5 Ububo anga mpunda za mu lubanda mu kalula, bakuzanzuka nu kulonda na komanizia byabo byakulia, bakumona idia lyakulisia bana babo mu kalula. 6 Bakutubula idia mu masoa, nu kukala biguma ku miti za bantu babi. 7 Mu kindi bakwiyombeka geteli nsulu, nu tabeli na byakwikukila mu mpego. 8 Bakulokagwa na mbula ku miduko, nu bakutina mbula kunsi kwa nanda. 9 Bantu babi bakunyaga nkubi ku mabele, nu kunyaga bana ba bazambi kuba kyango. 10 Bakwenda mundulu ku mulimo, bakwenda na nzala mu kutubula ngano. 11 Bakukamata makiti nu mazi ma biguma, tondo bobenyene bakukua na mpusia. 12 Babo bakwampa mu mwino bakukua, nu mitima za babo basumitilwe zikulila; tondo Kalaga ntakungwilila kulila kwabo.
13 Bantu babi bakusomba kyengi, nu tabakukisongolola, nu tabakwenda mu kyo. 14 Mwiti akuyuka ku mukelo buno eite muzambi nu mwiyanizi, nu mu kindi akwiba. 15 Kitazi akulindila busi kwida, akutenda bunee: ‘Takuli wammoneko.’ Nu nti agalukya kilungi kyage. 16 Mu kindi beibi bakutumuna kitutu nu kwingila mu numba, tondo mu musi bakubisama, tabakutunda kyengi. 17 Ku beli nindunindu zikubabela anga kilimelime kya lukuo, ndi bamonekako na muntu bakukua lukuo boba.
18 We eli musasia gantata ga mazi, kibombo kyage kyaswililwe mu kisi, buno ta wampa ukwenda mu isoa lyage lya biguma. 19 Musi mukali gukukamia mbula mu kisi, ububo bukubisama bagi mu nsinda. 20 Nina amwibilile, mikuso zamulile, bantu babi tabakukengelwa lingo; beli anga muti wagoa nu kubunguka. 21 Bantu babo bakitila bagumba bubi, aba tabakukitila misigala busoga. 22 Magala ma Kalaga makutikya beiya magala; aba azanzulwa ntaneikokomezia mu kalamo kage.
23 Kalaga akubakasa kalamo nu bubobelelo, tondo akubalola bindi binsania. 24 Nkungu nkeke mwiya bwagi akulama busoga, nu kusila lingo nteli kena, tondo kumbusa akua anga bango bansania, nu atikibwa anga bisesa bya ngano.
25 Ndi kuli muntu unalolesia buno nili muza, aba kulolesia moki mane buno tameli kena?”