Yosia akitile Kisagulo ky'Isuluko
35
1 Yosia akitile kisagulo ku Yehowa mu Yerusalema. Asesile mwana wa mukoko w'Isuluko ku kindi ky'ikumi nu binazi ku mwezi wabo mutangi. 2 Abikile basankoga ku biziki byabo, nu alindizie mitima zabo kukita numba za Yehowa. 3 Akakizizie baLawi, beigisagia baIsraeli bansania nu beisanana ku Yehowa, bunee: “Bikazi Sanduku Zasililila mu numba zobakile Solomono, mwana wa Davidi, mukota wa Israeli. Tamwatunganana kuzeka ga bituli byeinu. Kano kaluma kitilazi Yehowa, Kalaga weinyu, nu bantu bage ba Israeli. 4 Mube kayikayika mu numba za basoinyuwe nu mu bibombo byeinyu, kwanza makakizio ma Davidi mukota wa Israeli nu mamo ma Solomono mwana wage. 5 Emanazi mu kiziki kyasililila, mu bibombo bya bikanga bya basoinyuwe kuba bemanizi ba mibuto zeinyu, beteli basankoga nu ku baLawi mu bikanga bya beisibo. 6 Sesazi kyana kya mukoko ky'Isuluko mwiyengie nu kulongekela mibuto zeinyu, buno bakite bulingilingi n'idagi lya Yehowa lyatendaga Musa.” 7 Yosia akasile ku bantu batabezaga basankoga, ku bansania babezaga kuko, byana bya mikoko nu bya mpene tununu makumi masatu, nu balume ba ngombe tununu tusatu buno bibe bisansa by'Isuluko. Abitikizye ku bikulo bya mukota. 8 Lingo, bakota bage bakasenne nkaso ku basankoga nu baLawi na lutundo lwabo. Hilkia, nu Zekaria, nu Yehieli, babezaga bakota ba numba za Yehowa, bakasile basankoga byana bya mikoko nu byana bya mpene tununu tubili nu nkama mutuba, nu balume ba ngombe nkama isatu bibe bisansa by'Isuluko. 9 Konania, Semaya, nu Netaneli mibuto zage, nu Hasabia, nu Yeieli, nu Yozabadi, bangati ba baLawi, bakasile baLawi byana bya mikoko tununu tutano nu ngombe nkama itano kuba bisansa by'Isuluko.
10 Nu binsania byalongekilwe nu basankoga bemanine mu biziki byabo nu baLawi mu bibombo byabo kuyangana n'ikakizio lya mukota. 11 Nu basesile bisansa by'Isuluko, nu basankoga basandide mikila zibatolile ku maboko mabo, nu baLawi babagile nyama. 12 Kumbusa babikile ku lulenge lumozi tuyulo twa kugisibwa, buno batukase ku kibombo na kibombo kya bantu batabezaga basankoga, buno batukasane ku Yehowa anga bwasanzilwe mu mukanda wa Musa; lingo bakitile bubo na balume ba ngombe. 13 Bababile nyama z'isuluko ku keiya anga bwasanzilwe mu milembe, nu bayikile tungo tuyulo twasililila, u tumpampa tutagaga nu bitogo bili lubaba, mu nyungu nkeke nu nnene, nu batwekile lubilo ku bantu bansania batabezaga basankoga. 14 Nu kumbusa beidongekede lyabo idia nu lya basankoga, kubuno basankoga, bana ba Haruni, bakasenne tuyulo twa kugisibwa nu twa manona aaba nu mu kindi. Ububo baLawi beidongekede lyabo idia lya basankoga, bana ba Haruni.
15 Babo beimbi, u bana ba Asafu, bemenne ku biziki byabo anga bwabezaga ikakizio lya Davidi, nu Asafu, nu Hemani, nu Yedutuni mulaguzi wa mukota. Nu balangi ba lwibi na lwibi tabatukile ku mulimo wabo, kubuno mibuto zabo baLawi babalongekede idia.
16 Ububo mulimo unsania wa Yehowa walongekilwe kikyo kindi, buno balange Kisagulo ky'Isuluko nu kukasana tuyulo twa kugisibwa ga kasenga ka Yehowa, anga bwakakizizie mukota Yosia. 17 BaIsraeli babezaga gago balangile Kisagulo ky'Isuluko mu nkungu zezo nu bakitile Kisagulo kya Tumpampa Tutagaga bindi mutubakamo. 18 Kutukila bindi bya mulengania Samweli, tabakitile Kisagulo ky'Isuluko anga kikyo, aba ta mukota umozi wa Israeli wakitile Kisagulo ky'Isuluko anga bwakitile Yosia, nu basankoga nu baLawi, nu baYuda bansania nu baIsraeli babezaga gago, nu babo ba ku Yerusalema. 19 Ku mwaka w'ikumi nu kinana wa kwangata kwa Yosia, kikyo Kisagulo kyakitilwe.
Lukuo lwa Yosia
20 Kumbusa kwa bibino, galongekile Yosia numba za kukumbamina, mukota wa Misri Neko abakamine kukita bita ku Karkemisi bwigi na Luuzi Furati, nu Yosia endile kumonana nage. 21 Tondo Neko amusingide mugenzi kumubula bunee: “Ee mukota wa Yuda, nili nobe kikizi? Nsyavule kusaka nobe tondo na babo banili nabo bita, nu Kalaga ankakizizie tusasie kwenda. Lekela kuzugila Kalaga uli gamozi na nne buno ntakuzikye.” 22 Tondo Yosia ntazigile kugaluka, nu eikungwide nsulu zage, buno beitane. Ntungule moki ma Neko matendile Kalaga, tondo avule kwitana nage mu kibitabita kya Megido.
23 Nu babo ndasa za misungu balasile mukota Yosia; mukota abwide bakiti bage bunee: “Ntikyazi, kubuno nasumitwa bubibu.” 24 Ububo bakiti bage bamutikizye mu kayanga kage nu bamwekile mu kayanga kage ka tubili, nu bavule nage ku Yerusalema. Gago akule nu ayikilwe mu nsinda gamozi na beisi. BaYuda bansania nu ba ku Yerusalema bamulilide.
25 Nkungu zezo Yeremia alilide Yosia, nu bimbi bansania ba bamulume, nu bamukazi balilide Yosia mu nimbo zabo aaba nu lelo. Bakakizizie idilo lilyo kuba mulembe ku baIsraeli nu lyasanzilwe mu nsanza. 26 Mango makitilo ma Yosia, nu misako zage misoga zaakitile, anga bwasanzilwe mu milembe za Yehowa, 27 nu binsania byakitaga, bitangi nu bizinda, byasanzilwe mu mukanda wa bakota ba baYuda nu baIsraeli.