Kwangata kwa Yosia
34
1 Nu Yosia abezaga na myaka kinana gaalingile kwangata, nu angatile myaka makumi masatu nu umozi mu Yerusalema. 2 Akitile bwisanana lwabusio lwa Yehowa, nu atabangile mu nzila z'isi Davidi, nu ntagalukile ku seidume aba ku seikazi. 3 Ku mwaka wa kinana wa kwangata kwage, gaabezaga eikili musikila, alingile kulonda Kalaga w'isi Davidi; nu mu mwaka w'ikumi nu ibili wa kwangata kwage, alingile kwengia Yuda nu Yerusalema ku biziki byasakama, nu maAshera, nu nkisi za kubazwa nu za kunyengulwa. 4 Bagusizie kasenga ka kayulo ka Baali lwabusio lwage. Bagusizie kasenga ka bulago kabezaga bwigi nako. Asesile maAshera byindi byindi nu nkisi za kubazwa nu za kunyengulwa, nu azibungwide kuba anga mukungu, nu agubalanganizie gantata ga nsinda za babo bakitaga bisansa nu tuyulo. 5 Lingo agisizie makwa ma basankoga ga tusenga twabo twa tuyulo, nu engezie Yuda nu Yerusalema. 6 Mu miino za Manase, nu za Efuraimu, nu za Simeoni, aaba nu ku Nafutali, abigizie kasenga ka kayulo, 7 abungwide maAshera kuba mukungu nu agisizie tusenga tunsania twa bulago twa kisi kinsania kya baIsraeli. Kumbusa asubizie ku Yerusalema. 8 Ku mwaka wage wa kwangata w'ikumi nu kinana gaasilile kwengia kisi nu numba za Yehowa, asingile Safanu, mwana wa Azalia, nu Maseya mukota wa mwino, nu Yoa, mwana wa Yoahazi musanzi, kukulumizia numba za Yehowa, Kalaga wage. 9 Bavule ku Hilkia, sankoga munene, nu bamukasile bikulo byakasilwe ku numba za Yehowa byatikizye baLawi, balangi ba nibi, ku baManase, nu ku baEfuraimu, nu ku bansania basigede baIsraeli, nu ku baYuda bansania nu ku baBenjamina nu ku babo ba ku Yerusalema. 10 Babikasenne ku basondelezia ba mulimo mu numba za Yehowa, buno bakulumizie numba za Yehowa. 11 Basondelezia baligile bakulumizi ba mbavu nu bobaki buno bakunze makozi masesilwe nu mbavu za mpagu nu za bibuga bya numba, kobaka lingo numba zitile bakota ba Yuda. 12 Nu bakiti bakitile mulimo busoga, Yahati nu Obadia, baLawi ba kikanga kya Merari, nu Zekaria, nu Mesulamu, ba kikanga kya Kohati, babezaga basondelezia babo. BaLawi bansania babezaga na menge ma kututa bindanda. 13 Nu babede basondelezia ba babo bakweka mizigo nu babede basondelezia ba bansania bakitile mulimo unsania. BaLawi bamozi babezaga basanzi nu bemanizi nu balangi ba nibi.
Mukanda wa milembe wamoneka
14 Gabatikagia bikulo byakasanagwa ku numba za Yehowa, Hilkia sankoga amonine ku Mukanda wa Milembe za Yehowa zakasilwe ku maboko ma Musa. 15 Nu Hilkia abwide musanzi Safanu bunee: “Namonine ku Mukanda wa Milembe mu numba za Yehowa.” Nu Hilkia akasile Safanu mukanda wozo. 16 Safanu endile ku mukota na mukanda nu abwide mukota bunee: “Bakiti bobe bakukitaga binsania bibakakizizibwe. 17 Batikizye bikulo byamonekile mu numba za Yehowa nu babikasile ku basondelezia nu bakiti.” 18 Kumbusa Safanu musanzi atendile mukota bunee: “Hilkia sankoga ankasile mukanda.” Safanu agusomine lwabusio lwa mukota.
19 Gongule mukota ku moki ma mulembe, atile nsulu zage. 20 Mukota akakizizie Hilkia wa Ahikamu, mwana wa Safanu, Abudoni mwana wa Mika, nu Safanu musanzi nu Asaya mukiti wa mukota bunee: 21 “Endazi munsegele ku Yehowa, nne nu babo basigala ku Israeli nu ku Yuda ku kitondo kya moki ma mukanda wamonekile. Kubuno bongoa bwa Yehowa buli bunene kutuli, ku kabamba ka batateiswe tabanzile mukanda wono, kukita binsania byasanzilwe mugo.”
22 Ububo Hilkia nu babo basingilwe na mukota bendile ku mulengania wa mukikulu Hulda, wabezaga mukikulu wa Salumu, mwana wa Tokati, mwana wa Hasira mulangi wa nsulu. Eikalaga mu mukubalungu umozi wa Yerusalema, nu bamusambalide binsania byatendile mukota.
23 Nu ababwide bunee: “Yehowa, Kalaga wa Israeli, akutenda bunee: ‘Tenda ku muntu wamusingile kundi, 24 Yehowa akutenda bunee: “Lolazi, nkulusia bubi ku kiziki kikino nu ku bantu bakyo, u kiswililo kinsania kyasanzilwe mu mukanda wasominwe lwabusio lwa mukota wa Yuda. 25 Kubuno bansigile nu kugisia bulago ku tungo tulaga, buno banongie na makitilo mabo mansania; ububo bongoa bwane bwabede ku kiziki kikyo, nu tabukasila. 26 Tondo tendazi ku mukota wa Yuda wamusingile kusega Yehowa, bunee: ‘Bubuno u bwatenda Yehowa, Kalaga wa Israeli, ku bitondo biwungule ko. 27 Kubuno mutima wobe wiyanizie, nu wibotezie lwabusio lwa Yehowa gagungule ku moki mage ku kabamba ka kikyo kiziki nu bantu bakyo, nu wibotezie lwabusio lwane mu kwata nsulu zobe nu walilile lwabusio lwane, nu nne nakungwilide, u bwatenda Yehowa. 28 Lola, wabe na bubobelelo aaba nu ku lukuo lwobe nu, ntukamona bubi bunsania bunkalusia ku kiziki kikyo nu bantu bakyo.’”’” Nu basubizie na musagu ku mukota.
29 Ububo mukota asingile migenzi nu akundamanizie bakulu bansania ba Yuda nu ba ku Yerusalema. 30 Nu mukota abakamine ku numba za Yehowa gamozi na basankoga bansania nu baLawi, bantu bansania banene nu bakeke. Nu abasomenne moki mansania m'idagano lyamonekile mu numba za Yehowa. 31 Nu mukota emenne ku kiziki kyage nu akitile idagano na Yehowa, buno ayange Yehowa, nu kulanga makakizio mage mansania, nu bulongeki bwage nu milembe zage, na mutima wage unsania nu makengelo mage mansania, nu kwanza moki m'idagano masanzilwe mu mukanda wono. 32 Alindizie bansania babezaga mu Yerusalema nu ku Benjamina, buno beitabizie idagano lilyo. Nu babo ba ku Yerusalema bakitile idagano na Yehowa, Kalaga wa beisibo. 33 Yosia atikizye binsania byasombagwa mu kisi kya Israeli nu asindikile baIsraeli kukitila Yehowa, Kalaga wabo. Mu bindi byage binsania tabagalukile aba kusiga Yehowa, Kalaga wa beisibo.