Kwangata kubi kwa Manase
33
1 Manase abezaga na myaka ikumi nu ibili gaalingile kwangata nu angatile myaka makumi matano nu itano mu Yerusalema. 2 Akitile bubi lwabusio lwa Yehowa, anga buli lusombo lwa bilongo byapumbizie Yehowa lwabusio lwa baIsraeli. 3 Kubuno obakile lingo biziki byasakama byasambulaga isi Hezekia. Obakile tusenga twa tuyulo twa Baali, nu akitile nkisi za Ashera, nu akumbaminne iyombo lya kwigulu nu alikitide. 4 Nu anzile kasenga ka kayulo mu numba za Yehowa, zatendile Yehowa bunee: “Izina lyane likaba mu Yerusalema ku milyalya.” 5 Nu obakide iyombo linsania lya kwigulu tusenga twa tuyulo mu tubelabela tubili twa numba za Yehowa. 6 Atingizie bana bage ku keiya mu mpinga za mwana wa Hinomu, nu akitile buganga, endede babo babezaga na basumbu nu asungile na baganga. Akitile mibi lwabusio lwa Yehowa, nu ongezie Yehowa. 7 Abikile nkisi zabazwa nnene, u zezo zaakitile, mu numba za Kalaga, zatendile Kalaga ku Davidi, nu mwana wage Solomono bunee: “Nabike izina lyane mu numba zeno, nu mu Yerusalema u nasombwede munkatini mwa bikanga binsania bya Israeli ku milyalya. 8 Ndi bakwidanga ku milembe insania nu makakizio mansania manakakizizie Musa, nti nsyabatikye lingo ku kisi kinasombwede ku beisibo.” 9 Manase alutile baYuda nu ba ku Yerusalema, kukita bubi nunse kutinga ba bilongo byazikizye Yehowa lwabusio lwa baIsraeli.
10 Yehowa atondile Manase nu bantu bage, tondo tabongule. 11 Ububo Yehowa asingile kubeli bakota ba bakoloboyo ba mukota wa baAsuria; bakatile Manase na byuma byasusania magobo, nu bamukandile na bikando bya nsubi nu bamwekile ku Babeli. 12 Nu gaabezaga mu kabebe kako, asegile kyombo ku Yehowa, Kalaga wage, nu eibotezie nunse lwabusio lwa Kalaga wa beisi. 13 Amusegile, nu Yehowa ungule isego lyage, nu amusubizie ku Yerusalema ku bukota bwage. Kumbusa, Manase amenyine buno Yehowa eli Kalaga lebelebe.
14 Kumbusa, obakile mukolo kumbuga kwa mwino wa Davidi, guli ku lulenge lwa kukwendaga kisongo kya busi ku Gihoni, nu agobakile mu mpinga aaba nu ku mwingilo wamanagwa Byena, nu mukolo watimbile Ofeli, nu agusakamizie nunse. Lingo, abikile bakota ba bakoloboyo mu miino insania zabezaga na mikolo mu Yuda. 15 Atikizye nkisi nu tulaga tugeni ku numba za Yehowa, nu atikizye tusenga twa tuyulo twakitile ga mwiduko wa Numba za Yehowa nu mu mwino wa Yerusalema. Atwisile tunsania ku isula lya mwino. 16 Nu akulumanizie lingo kasenga ka Yehowa, nu akasenne gako tuyulo twa bubobelelo nu twa kuganuna. Akakizizie baYuda kukitila Yehowa, Kalaga wa baIsraeli. 17 Tondo bantu bitide kukasana tuyulo ku biziki byasakama, tondo ku Yehowa, Kalaga wabo tugu.
18 Nu mango makitilo ma Manase, nu masego mage ku Kalaga wage, nu moki mamusambalide balaguzi mu izina lya Yehowa, Kalaga wa Israeli, masanzilwe mansania mu makitilo ma bakota ba Israeli. 19 Isego lyage nu buni bongule Kalaga kulyo, nu mibi zage insania nu bubi bwage nu biziki binsania byasakama byobakide baAshera nu ingo nkisi lwabusio nteibotya, bibyo binsania byasanzilwe mu makitilo ma Hozai.
+ \fr 33:19 \ft Basanzi. 20 Ububo Manase akule anga beisi, nu ayikilwe mu numba zage. Kumbusa Amoni mwana wage angatile mu kiziki kyage.
Kwangata kwa Amoni
21 Amoni abezaga na myaka makumi mabili nu ibili gaalingile kwagata mu Yerusalema. 22 Nu akitile bubi ku meiso ma Yehowa anga bwakitile isi Manase. Amoni akasenne tuyulo ku nkisi insania zakitaga isi nu azikambide. 23 Nteibotezie lwabusio lwa Yehowa anga bwakitile isi Manase, tondo Amoni itide na kukita bwagi. 24 Bakiti bage bamukalide lwango nu bamwitile mu numba zage. 25 Nu bantu ba kisi kyage beitile babo bakalide mukota Amoni lwango lwa kumwita, nu basombwede Yosia mwana wage mu kiziki kyage.