32
1 Kumbusa kwa bibyo binsania nu zezo misako za bukatizio, Saniharibu, mukota wa Asuria, avule nu anyagile Yuda nu abikile ido lyage bwigi na miino za mikolo zaakengede kwibikila. 2 Gamonine Hezekia buno Saniharibu avule nu akengede kwitana na Yerusalema, 3 akalile lwango na bakota bage ba bakoloboyo nu ba bakulu bage kukanda tunuabalongo twabezaga kumbuga kwa mwino, nu bo bamukasizie. 4 Bantu beingi bakundamenne nu bakandile tunuabalongo tunsania nu luuzi lwagelile mu kisi. Batendile bunee: “Kubuno bakota baAsuria banavwa nu kusanga mazi meingi?” 5 Eikokomezizie ku mulimo, nu obakile mukolo wagusizibwe nu obakile numba za byindo kugo, nu obakile ungo mukolo kumbuga kwago, nu alindizie Milo mu mwino wa Davidi, nu akitile bya bita nu ngabo ningi. 6 Nu abikile bakota ba bakoloboyo gantata ga bantu, nu abakundamanizie ga mulungu wabezaga bwigi na lwibi lwa mwino, nu abakasile magala gaabatendile bunee: 7 “Mube mapuka nu mube na magala. Tamukutwe nu tamukue mukota wa baAsuria boba aba bansania beli gamozi nage, kubuno tuli beingi kubatinga. 8 Kubuno beli tugu bantu, nu iswe tuli na Yehowa, Kalaga weitu, wakutukasia nu kutwemanina.” Bantu balemaninne moki ma Hezekia, mukota wa Yuda.
9 Kumbusa, Saniharibu, mukota wa baAsuria, gaabezaga atimbile Lakisi na bakoloboyo bage bansania, asingile bakiti ku Yerusalema ku mukota wa Yuda, u Hezekia, nu ku bantu bansania babezaga mu Yerusalema. Ababwide bunee: 10 “Saniharibu mukota wa Asuria akumubuzia bunee: ‘Mukulemanina kikizi buno mwikale mu Yerusalema? 11 Ndi Hezekia ntamusondelezia bubi buno mukue na nzala nu mpusia gaakumutenda bunee: “Yehowa, Kalaga weitu, akutonia ku mukota wa Asuria?” 12 Ee, ndi wozo Hezekia ntatikizye biziki byasakama byage, nu tusenga twage twa tuyulo, nu abwide baYuda nu baYerusalema bunee: “Mukakumbamina lwabusio lwa kasenga kamozi ka kayulo nu mukagisia bulago gantata gako?” 13 Nu inyuwe, ndi tamwizi buni bwakitile batatane nu nne ku bantu bansania ba bilongo? Ndi tulaga twa bilongo tatwavwamine konia bantu ku maboko mane? 14 Munkatini mwa tulaga twa bisi bibyo bitwazikizye, kalaga kakizi konezie bantu bage ku maboko mane, buno kalaga keinyu kanavwama kumwonia ku maboko mane? 15 Umpanga tamwengelelwe na Hezekia, aba tamusondelezibwe bubi nage, aba tamumukatizie, kubuno takuli kalaga kampa ka kilongo aba ka bukota kavwamine konia bantu bage ku maboko mane aba ku maboko ma batatane. Embe kalaga keinyu u kamwonie ku maboko mane?’”
16 Basingwa ba Saniharibu batendile bingo byingi ku Kalaga Yehowa nu mukiti wage Hezekia. 17 Lingo asanzile mikanda kubenga Yehowa, Kalaga wa baIsraeli, nu kutenda kweli bunee: “Anga tulaga twa bantu ba bilongo tatwonezie bantu babo ku maboko mane, bubo Kalaga wa Hezekia ntakonia bantu bage ku maboko mane.” 18 Nu balalukile na lubuzio lulo mu mutendezi wa baYuda, ku bantu ba ku Yerusalema babezaga ga mukolo, kubeitia na boba nu kubagilimizia na buno bakinde mwino. 19 Batekwide Kalaga wa Yerusalema anga bubatekwide tulaga twa bisi, tuli mulimo wa maboko ma bantu.
20 Mu nkungu zezo mukota Hezekia nu mulengania Isaya, basegile nu balilile ku Yehowa, Kalaga wa kwigulu. 21 Nu Yehowa asingile mwanzelo, witile mapuka mansania nu mitonge nu bakota ba bakoloboyo mu ido lya mukota wa Asuria. Nu we asubizie ku kisi kyage na nsoni nu geingide mu numba za kalaga kage, bana bage bamozi bamwitile na mwene wa nganda. 22 Ububo Yehowa onezie Hezekia nu bantu ba ku Yerusalema ku maboko ma Saniharibu, mukota wa Asuria, nu ku maboko ma bango bansania, nu abasondelezizie mu nzila insania. 23 Nu bantu beingi bavule ku Yerusalema na nkaso ku Yehowa, nu bintu bya bukunza bukali ku Hezekia mukota wa Yuda, nu kutukila zezo nkungu, asakikilwe ku bilongo binsania.
Lusambo lwa Hezekia
24 Mu bindi bibyo, Hezekia abede musambi bwigi na kukua. Asegile ku Yehowa, nu Yehowa atendile nage nu amukasile kalolesio. 25 Tondo Hezekia ntaganwine Yehowa ku kyombo kyamukitide, kubuno mu mutima wage mwabezaga lwikotio. Ububo bongoa bwabede kweli, nu ku Yuda nu ku Yerusalema. 26 Tondo Hezekia eibotezie ku kabamba ka lwikotio lwa mutima wage, we nu bansania beikalaga mu Yerusalema; ububo bongoa bwa Yehowa tabwavule kubeli mu bindi bya Hezekia.
27 Hezekia abezaga na bikulo byingi nu lutanuno. Akitile masuku ma feza nu olo nu makozi ma bukunza bunene nu miti za kuswagia idia, nu ngabo nu na lukita na lukita lwa binsania bya bukunza bunene. 28 Lingo akitile bigenge bya mbuto nu maku m'ituba nu makiti, nu mikolo za nkita insania za ngombe nu mikumba za mikoko. 29 Nu eiyobakide miino, nu abezaga na ngombe ningi, kubuno Kalaga amukasile bikulo byingi nunse. 30 Hezekia akandile kanuabalongo ka Gihoni nu akagezizie kunsi kwa mwino wa Davidi. Hezekia amonine busoga mu binsania byakitile. 31 Nu mu bitondo bya basingwa ba bakota ba Babeli basingilwe kweli kumubuzia kitondo kya kalolesio kakitilwe mu kisi, Kalaga amusigile wenyene buno amulindike, nu kumenya binsania byabezaga mu mutima wage.
32 Makitilo mansania ma Hezekia, nu misako zage misoga, zasanzilwe mu kalolesio ka mulengania Isaya mwana wa Amozi, nu mu mukanda wa bakota ba Yuda nu ba Israeli. 33 Hezekia akule, nu bamuyikile munkatini mwa nsinda za bana ba Davidi; baYuda bansania nu ba ku Yerusalema bamukutizie mu lukuo lwage. Manase, mwana wage, angatile mu kiziki kyage.