Hezekia alongeka mulimo wa Numba za Kalaga
31
1 Kumbusa kwa kukitwa kwa bibyo binsania, baIsraeli bansania babezaga gago bendile ku miino za baYuda, nu babungwide mango nu basesile maAshera, nu basambwide biziki byasakama nu kasenga ka kayulo mu Yuda nu Benjamina unsania nu mu Efuraimu nu Manase, aaba nu gabazikizye binsania. Kumbusa bantu bansania ba Israeli basubizie ku miino zabo, muntu na muntu ku bwiyani bwage. 2 Nu Hezekia abikile basankoga mu bibombo, muntu na muntu mu kibombo kyage, nu ku mulimo wage wa tuyulo twa kugisibwa nu wa tuyulo twa bubobelelo, kukumbamina, kwimba, nu kuganuna Yehowa ku miingilo za Numba za Yehowa. 3 Nu nkaso za mukota zaatikizye ku byage zabezaga ku tuyulo twa kugisibwa; tuto twa nindunindu nu igolo, tuto twa busi bwabo bwa kumunwa, nu twa mbalo za mwezi, nu bindi binene anga bwasanzilwe mu mulembe wa Yehowa. 4 Nu akakizizie bantu beikalaga mu Yerusalema kukasana nkaso zakuka ku basankoga nu baLawi, buno balange milembe za Yehowa. 5 Nkungu zasambedwe lilyo ikakizio, bantu ba Israeli bakasenne byingi by'idia litangi lya mbuto, bya maku m'ituba, bya makiti, nu bya buuki nu binsania bikutuka mu masoa. Bavule na kyindi ky'ikumi kya binsania. 6 Nu baIsraeli nu baYuda beikalaga mu miino za Yuda bavule nubo na kyindi ky'ikumi kya bituganwa bikeke nu binene, nu kya bintu byasililila byakasenwe ku Yehowa, Kalaga wabo, nu babibikile mu bibombo bibombo. 7 Mu mwezi wabo w'isatu, balingile kubibika bibombo bibombo, nu babizindilizizie ku mwezi wa mutubakamo. 8 Nu gamonine Hezekia nu mitonge ku bibyo bibombo, baganwine Yehowa nu bantu bage ba Israeli.
9 Nu Hezekia abuzizie basankoga nu baLawi musagu wa bibombo na bibombo. 10 Azaria sankoga munene wabezaga wa kikanga kya Zadoki amwakwide bunee: “Kutukila busi butangi butwavule na nkaso ku numba za Yehowa, twalide nu twembukile nu twasigile milanga. Kubuno Yehowa akasile bantu bage mponga, ububo tuli na milanga mingi.”
11 Kumbusa, Hezekia abakakizizie buno bobake masio ma bigenge mu numba za Yehowa. Nu bamobakile. 12 Nu bantu bavule na nkaso zabo nu byindi by'ikumi nu bintu bisoga bibakasile ku Yehowa. Mulangi munene wabyo abezaga Konania muLawi, nu Simei, mubuto wage abezaga wa babili. 13 Yehieli, nu Azaria, nu Nahati, nu Asaheli, nu Yerimoti, nu Yozabadi, nu Elieli, nu Isimakia, nu Mahati, nu Benaya, babezaga bemanizi kunsi kwa Konania nu Simei, mubuto wage, nu basombwedwe na mukota Hezekia, nu Azaria mulangi munene wa numba za Kalaga.
14 Nu Kore mwana wa Imuna, muLawi mulangi wa lwibi lwa kukutukaga kisongo kya busi, abezaga mulangi wa nkaso zakasenne bantu na mutima umozi ku Kalaga, kubegania nkaso za Yehowa nu tuyulo twasililila nunse. 15 Edeni nu Miniamini, nu Yesua, nu Semaya, nu Amaria, nu Sekania, bamukasizie busoga mu miino za basankoga kubeganizia mibuto zabo bibombo ku bakulu nu bato bulingilingi.
16 Kutinga ku babo basanzilwe mu bibuti byabo, ku bamulume babezaga na myaka isatu nu kutinga, babeganizie ku babo bansania bavwaga ku numba za Yehowa anga bwabezaga mulimo wa busi na busi, ku mukambo wabo anga biziki byabo nu bibombo byabo, 17 nu ku basankoga basanzwa mu bikanga bya beisibo, nu ku BaLawi basanzilwe, kulinga na babo babezaga na myaka makumi mabili nu kutinga nu anga bwabezaga milimo zabo nu bibombo byabo, 18 nu ku bansania baganzilwe na bakikulu babo nu basikila babo nu bakinga babo nu bana babo bansania. Kubuno beidangile mu bwisanana. 19 Mu miino za bango bantu mwabezaga bantu basomnbwedwe kubeganizia bana ba Haruni basankoga babezaga na masoa gamozi na bango bantu ba miino, nu ku basankoga nu baLawi bansania baganzilwe. 20 Hezekia akitile bubo kunsania mu Yuda. Akitile busoga nu bwisanana nu abezaga mukatizia lwabusio lwa Yehowa, Kalaga wage. 21 Nu akitile na mutima wage unsania milimo insania zaakitile mu kukitila numba za Kalaga, nu alondile Kalaga wage bulingilingi na milembe nu makakizio nu amonine busoga.