Kisagulo ky'Isuluko
30
1 Hezekia asingile migenzi mu Israeli unsania nu Yuda, nu asanzile lingo mikanda ku baEfuraimu nu ku baManase, buno bavwe ku numba za Yehowa ku Yerusalema buno bakite Kisagulo ky'Isuluko ku Yehowa, Kalaga wa Israeli; 2 kubuno mukota nu mitonge zage nu musanganano unsania wabezaga mu Yerusalema bakalile lwango buno Kisagulo ky'Isuluko kibe ku mwezi w'ibili wabo, 3 kubuno tabavwamine kukikita mu nkungu zakyo, ku kabamba ka kuteiyengia ku maganzo makuka, nu bantu tabakundamenne ku Yerusalema. 4 Lwango lwabezaga lusoga ku mukota nu ku musanganano unsania. 5 Ububo basombwede kusambala ku baIsraeli bansania kutukila Beri-Seba aaba nu ku Dani, buno bantu bavwe ku Yerusalema kukita Kisagulo ky'Isuluko ku Yehowa, Kalaga wa Israeli, kubuno tabeingi bakikitile anga bwasanzilwe mu mulembe.
6 Migenzi zendile kunsania mu Israeli nu Yuda nu mikanda za mukota nu mitonge zage, anga bwakakizizie mukota bunee: “Ee, bantu ba Israeli, subyazi ku Yehowa, Kalaga wa Abrahamu, Isaka, nu Israeli, buno asubye lingo kumuli babo bonine mu maboko ma bakota ba Asuria. 7 Tamube anga basoinyuwe nu mibuto zeinyu bagunine Mukota, Kalaga wa beisibo, nu abakasenne ku muziko anga bumukumonako. 8 Tamube n'itoe ibibu anga bwabezaga basoinyuwe, tondo ikasanazi ku Yehowa, nu vwazi ku numba zage zasililila, zengezie ku milyalya, nu kambilazi Yehowa, Kalaga weinyu, buno bongoa bwage bukali busile kumuli. 9 Ndi mwasubya ku Yehowa, nti mibuto zeinyu nu bana beinyu bakwilwe kyombo na babo babakindile, nu bakasubya ku kisi kikino. Kubuno Yehowa, Kalaga weinyu, eli wa kyombo nu wa mponga, nu ntamwide mugongo ndi mwasubya kweli.”
10 Ububo migenzi zendile ku mwino na mwino mu kisi kya Efuraimu nu baManase aaba nu ku baZebuluni. Tondo bantu babasekile nu kubeililika. 11 Tondo bango bantu ba Aseri nu ba Manase nu ba Zebuluni beibotezie nu bavule ku Yerusalema. 12 Nu kuboko kwa Kalaga kwabezaga ku baYuda kubakasa mutima umozi buno bakite bwakakizizie mukota nu mitonge, mu idagi lya Yehowa.
13 Bantu beingi bakundamenne ku Yerusalema kukita Kisagulo kya Tumpampa Tutagaga ku mwezi wabo w'ibili. Kwabezaga musanganano munene nunse. 14 Balingile mulimo kutikya kasenga ka kayulo kabezaga mu Yerusalema nu kasenga kansania ka kugisia bulago. Batutikizye nu kutwisa mu mpinga za luuzi lwa Kiduroni. 15 Nu basesile kyana kya mukoko ky'Isuluko ku kindi ky'ikumi nu binazi kya mwezi w'ibili. Nu basankoga nu baLawi bakule na nsoni. Ububo beiyengezie, nu bavule ku numba za Yehowa na tuyulo twa kugisibwa. 16 Bemenne ku biziki byabo bya bukololo anga bwakakizizie Musa muntu wa Kalaga mu milembe. Basankoga basandide mikila zibakatile ku baLawi ku kasenga ka kayulo. 17 Nu kwabezaga beingi ku musanganano batengibwa, ububo baLawi basesile kyana kya mukoko ky'Isuluko ku kabamba ka babo batengibwa, buno bengibwe ku Yehowa. 18 Nu bantu beingi batukile ku Efuraimu, Manase, Isakari nu Zebuluni, tabeiyengezie, tondo balide Kisagulo Ky'Isuluko, ta anga bwasanzwa mu mulembe. Nu Hezekia abasegede bunee: “Yehowa, musoga, asigilile muntu nu muntu, 19 watunda kukokomezia mutima wage kulonda Kalaga, u Yehowa, Kalaga wa beisi, tondo ntengezibwa anga bwakakizizie milembe za kwengibwa.” 20 Yehowa ungule kusega kwa Hezekia, nu onezie bantu.
21 Nu baIsraeli babezaga ku Yerusalema bakitile Kisagulo kya Tumpampa Tutagaga bindi mutubakamo bya mbogimbogi nu kyelele. BaLawi nu basankoga baganwine Yehowa na moki manene. 22 Nu Hezekia atendile ku baLawi bansania, kukasa magala ku babo balolesizie menge ku mulimo wa Yehowa. Ububo bantu baliaga idia lya kisagulo bindi mutubakamo, bakasenne tuyulo twa bubobelelo nu kuganuna Yehowa, Kalaga wa beisibo.
23 Kumbusa musanganano unsania wakalile lwango kukita kisagulo bingo bindi mutubakamo. Ububo bakitile bingo bindi mutubakamo na mbogimbogi nnene. 24 Kubuno Hezekia mukota wa Yuda akasile bantu ba musanganano balume ba ngombe kanunu (1.000) nu mikoko tununu mutubakamo (7.000) kuba tuyulo, nu mitonge zakasile bantu balume ba ngombe kanunu (1.000) nu mikoko tununu ikumi (10.000). Basankoga beingi beiyengezie. 25 Nu musanganano unsania wa baYuda, nu basankoga nu baLawi, nu bantu bansania batukile ku Israeli nu bageni babavule nabo nu bageni beikalaga ku Yuda, babogilebogile. 26 Ububo kwabezaga mbogimbogi nnene mu Yerusalema, kubuno kutukila bindi bya Solomono, mwana wa Davidi mukota wa Israeli, takwabezaga kyampa anga kikyo mu Yerusalema. 27 Kumbusa, basankoga baLawi bemenne nu bakasile bantu mponga nu Kalaga ungule moki mabo, nu masego mabo meingide mu kiziki kyage kyasililila kya kwigulu.