Kwangata kwa Hezekia
29
1 Hezekia abezaga na myaka makumi mabili nu itano gaalingile kwangata. Angatile mu Yerusalema myaka makumi mabili nu mubula. Nu izina lya nina lyabezaga Abiya mukinga wa Zekaria. 2 Akitile bwisanana lwabusio lwa Yehowa anga bunsania bwakitaga isi Davidi. 3 Mu mwezi mutangi wa mwaka wage mutangi wa kwangata kwage, akandwide nibi za numba za Yehowa, nu azilongekile. 4 Eingizizie basankoga nu baLawi, abakundamanizie ku kabelabela ka numba ku lulenge lwa kukutukaga kisongo kya busi. 5 Ababwide bunee: “Inyuwe baLawi, nnungwililazi; kano kaluma iyengiazi, nu engiazi numba za Yehowa, Kalaga wa basoinyuwe, nu mubike kikyo kyasililila mu kiziki kyasililila. 6 Kubuno batateiswe bagile nu kukita mibi lwabusio lwa Yehowa, Kalaga weitu, bagalukile nu basigile Yehowa. 7 Beigede nibi za numba za kukumbamina nu kuzimia tusuku nu tabagisizie bulago aba kukasa bisansa bya kugisibwa ku Kalaga wa baIsraeli mu kiziki kyasililila, 8 ku bubo bongoa bwa Yehowa bwabede ku Yuda nu Yerusalema, nu abakitile kukubwa masisi, nu bwakuganiagania nu kwililikwa, anga bumukumonako ku meiso meinyu. 9 Kubuno batateiswe bazikizibwe na mwene wa nganda, nu basikila nu bakinga nu bakikulu beitu bakandwa ku kabamba ka bitondo bibino. 10 Kano kaluma mutima wane ukutunda kukita idagano na Yehowa, Kalaga wa baIsraeli, buno bongoa bwage bukali bututukile. 11 Ububo bana bane, kano kaluma tamutambe, kubuno mwasombwedwe na Yehowa mwemane lwabusio lwage nu kumukitila nu kugisia bulago.”
12 BaLawi bazanzukile: Mahati mwana wa Amasai nu Yoeli mwana wa Azaria wa bana ba Kohati, nu ku baMerari, Kisi mwana wa Abudi nu Azaria mwana wa Yehaleleli, nu ku baGersoni Yoa, mwana wa Sima, nu Edeni mwana wa Yoa; 13 nu bana ba Elisafani, Simuri, nu Yeieli, nu bana ba Asafu, Zekaria nu Matania, 14 nu Yehieli, nu Simei, bana ba Hemani, nu Semaya, nu Uzieli, bana ba Yedutuni. 15 Bakundamanizie mibuto zabo nu beikasenne ku mulimo nu beingide mu numba za Yehowa anga bwakakizizie mukota bulingilingi n'idagi lya Yehowa buno beingie numba za Yehowa. 16 Basankoga beingide mu busio bwa munda na numba za Yehowa kwengia, nu batikizye nsese insania mu numba za Yehowa, nu bazibasizie ku mulungu wa numba za Yehowa. BaLawi bazitolile nu bazekile ku luuzi Kiduroni. 17 Balingile kwikasana ku busi butangi bwa mwezi mutangi, nu ku busi bwa kinana ku mwezi wozo bavule ku kabelabela ka numba za Yehowa nu bakitile bindi kinana kwengia numba za Yehowa. Basilile ku kindi ky'ikumi nu mutuba kya mwezi mutangi. 18 Kumbusa bendile ku mukota Hezekia nu bamubwide bunee: “Twengezie numba insania za Yehowa gamozi na kasenga ka kayulo ka kugisibwa na binsania byako, nu meza ma tumpampa twasililila nu binsania byamo. 19 Binsania byasombile mukota Ahazi mu kwangata kwage gaabezaga akwagila Yehowa, twabilongekile nu kubyengia. Lola, bili lwabusio lwa kasenga ka kayulo ka Yehowa.”
Hezekia akumbamina lingo mu Numba za Kalaga
20 Ububo Hezekia azanzukile lukesikesi nu akundamanizie bakota ba miino nu endile ku numba za Yehowa. 21 Nu bavule na balume ba ngombe mutubakamo, nu bilimba bya mikoko mutubakamo, byana bya mikoko mutubakamo, nu bilimba bya mpene mutubakamo, bibe kisansa kya bwagi bya bukota nu bya numba za Yehowa nu bya Yuda. Akakizizie basankoga, bana ba Haruni, kuzikasana ga kasenga ka kayulo ka Yehowa. 22 Ububo basesile balume ba ngombe nu bilimba bya mikoko nu byana bya mikoko, nu basankoga bakatile mikila zazo nu bazisandide ku kasenga ka kayulo. 23 Kumbusa, bavule ku mukota ku musanganano wa bantu na bilimba bya mpene buno bibe kisansa kya bwagi; mukota nu bantu babikile maboko mabo kubyo, 24 nu basankoga babitile nu babikasenne kisansa kya bwagi gamozi na mikila zabyo ga kasenga ka kisansa, buno bakite malonga ku baIsraeli bansania, kubuno mukota akakizizie kayulo ka kugisibwa nu kisansa kya bwagi ku kabamba ka baIsraeli bansania.
25 Nu abikile baLawi mu numba za Yehowa na bindanda nu nzenze nu bapili anga bwabezaga makakizio ma Davidi nu ma Gadi, mulaguzi wage, nu ma Natana, mulengania wage; kubuno makakizio matukile ku Yehowa mu moki ma balengania bage. 26 BaLawi bemenne na bindanda bya Davidi nu basankoga na myonze.
27 Kumbusa Hezekia akakizizie buno bakasane kayulo ka kugisibwa ga kasenga ka kayulo. Gabalingile kukakasana, lwimbo lwa kuganuna Yehowa lwalingile gamozi na myonze nu bindanda bya Davidi mukota wa baIsraeli. 28 Musanganano unsania wakumbaminne, nu bimbi nu beiya myonze bidile. Bakitile bubo aaba nu kusila kwa kayulo ka kugisibwa. 29 Nkungu zasililile kukasana kayulo, mukota nu bansania babezaga gamozi nage bakumbamizie matoe nu kukumbamina. 30 Nu mukota Hezekia nu mitonge insania bakakizizie baLawi kuganuna Yehowa na moki ma Davidi nu ma Asafu mulaguzi. Beimbide Yehowa nimbo za kumuganuna na mbogimbogi, nu bakumbamizie matoe nu kukumbamina.
31 Kumbusa Hezekia atendile bunee: “Kano kaluma bumwikasana ku Yehowa, kundazi, muvwe na bisansa nu mukasanazi tuyulo twa bubobelelo ku numba za Yehowa.” Nu musanganano unsania walusizie bisansa, nu babo bansania babezaga na mutima musoga bavule na tuyulo twa kugisibwa. 32 Maganzo ma tuyulo twa kugisibwa twavule na musanganano, mabezaga balume ba ngombe makumi mutubakamo nu bilimba bya mikoko lukama, nu byana bya mikoko nkama ibili. Zezo insania zakasenwe tuyulo twa kugisibwa ku Yehowa. 33 Nu zezo zakasenwe zabezaga balume ba ngombe nkama mutuba nu mikoko tununu tusatu. 34 Nu basankoga tabakukile kubaga nyama insania za tuyulo twa kugisibwa; ububo mibuto zabo baLawi babakasizie aaba nu kusila kwa mulimo, nu basankoga beiyengezie, kubuno baLawi babezaga na komanizia mu kwiyengia kutinga basankoga. 35 Maganzo ma tuyulo twa kugisibwa mabezaga manene, gamozi na manona ma tuyulo twa bubobelelo nu na tuyulo twa kunubwa twa kayulo na kayulo ka kugisibwa. Bubo u bwalingile lingo mulimo wa numba za Yehowa. 36 Hezekia nu bantu bansania babogilebogile ku kabamba ka binsania byakitide Kalaga bantu bage, kubuno bakitile kikyo kitangalabesi.