Kwangata kwa Ahazi
28
1 Ahazi abezaga na myaka makumi mabili gaalingile kwangata, nu angatile myaka ikumi nu mutuba mu Yerusalema. Ntakitile kimozi kisanana ku meiso ma Yehowa anga bwakitaga isi Davidi. 2 Tondo ayangile makitilo ma bakota ba Israeli. Akitizie nkisi za byuma byanyengulwa za Baali. 3 Agisizie bulago mu mpinga za bana ba Hinomu, nu azikizye bana bage mu keiya, anga bwabezaga lusombo lwa baBilongo bapumbizibwe na Yehowa lwabusio lwa baIsraeli. 4 Akasenne tuyulo nu agisizie bulago gantata ga miduko zasakama nu ga nkangamo nu gansina ga miti mibisi. 5 Ububo Yehowa, Kalaga wage, amukasenne ku mukota wa Aramu, bamukindile nu bakatile bantu bage beingi ku bukobe nu bendile nabo ku mwino wa Damasiki. Lingo amukasenne ku mukota wa Israeli wamukindile nu kwita baYuda beingi. 6 Peka, mwana wa Remalia, eitile bantu tununu lukama nu makumi mabili (120.000) mu Yuda mu busi bumozi; bansania babezaga mapuka. Abeitile kubuno basigile Yehowa, Kalaga wa beisibo. 7 Nu Sikiri, ipuka lya baEfuraimu, eitile Maseya, mwana wa mukota, nu mulangi munene wa numba za mukota Azirikamu nu Elkana wabezaga kunsi kwa mukota. 8 BaIsraeli bekile baYuda tununu nkama ibili (200.000) gamozi na bakikulu, bana bamulume nu bamukazi ku bukobe. Lingo, bekile ntiko ningi nu bendile nazo ku mwino wa Samaria.
9 Tondo kuko kwabezaga mulengania wa Yehowa, izina lyage lyabezaga Obedi, nu atukile mu mwino kwenda kukulumania iyombo lyavwaga kutuka ku Samaria, nu ababwide bunee: “Tamukumona, Yehowa, Kalaga wa basoinyuwe, ongelwa baYuda nunse. 10 Nu kano kaluma mukukengela kwangata baYuda nu ba ku Yerusalema, bamulume nu bakikulu, buno babe bakobe beinyu? Ndi tamuli na mibi zimwakitide Yehowa, Kalaga weinyu? 11 Nnungwililazi kano kaluma, nu subyazi babo bakobe bamwekile mu mibuto zeinyu, kubuno bongoa bukali bwa Yehowa buli kumuli.”
12 Lingo, bamozi ku bakota ba Efuraimu, Azaria mwana wa Yehohanani, Berekia mwana wa Mesilemoti, Yehizikia mwana wa Salumu, nu Amasa mwana wa Hadilai, bemenne ku babo batukaga ku bita. 13 Nu bababwide bunee: “Tamwingile gano na babo bakandwa, kubuno mukukengela kutulutila katati kanene ka Yehowa gantata ga mibi nu katati keitu. Kubuno katati keitu keli kanene kalazi, nu Yehowa akongelwa baIsraeli nunse.”
14 Ububo bakoloboyo basigile bakandwa nu ntiko lwabusio lwa mitonge nu lwa musanganano unsania wa bantu. 15 Nu bantu babo batekwidwe mu meina bazanzukile nu batolile bakandwa nu bavwalikizie babo babezaga mundulu nsulu za ntiko, nu babakasile bisalapata nu idia nu mazi, nu bababongezie mwambo. Bendile nabo ku mibuto zabo ku Yeriko, mwino wa bibila byingi, nu bekile babo batamba gantata ga mpunda. Kumbusa basubizie ku Samaria.
16 Ku nkungu zezo, mukota Ahazi asingile migenzi ku mukota wa Asuria buno amukasie, 17 kubuno ku limbizi lya mabili baEdomu beitanizie Yuda nu bakindile baYuda, nu bekile bamozi ku bukobe. 18 Nu baFilistini banyagile miino zabezaga ku biziki bya ntulungu nu Negevi za Yuda nu bakindile Beti-Semesi, nu Ayaloni, nu Gederoti, nu Soko gamozi na miino zage mikeke, Timuna nu Gimuzo nu miino zazo, nu beikede muzo nunsania. 19 Yehowa abezizie Yuda ku kabamba ka Ahazi mukota wa Yuda, kubuno akitile bubi mu Yuda, nu agide Yehowa. 20 Ububo Tigilati-Pileseri mukota wa Asuria avule ku Ahazi, nu amwitizie na kabebe nu ntamukasizie aba kakeke, 21 kubuno Ahazi atikizye bikulo mu numba za Yehowa nu mu numba zage za bukota nu mu numba za mitonge, nu abikasile ku mukota wa Asuria tondo ntamukasizie.
22 Wozo mukota Ahazi, mu nkungu za kabebe kage, itide kunana Yehowa, 23 kubuno akasile tulaga twa Damasiki tuyulo tondo twamukindile, nu atendile bunee: “Kubuno tulaga twa bakota ba Aramu twabakasizie; natukase tuyulo buno tunkasie.” Tondo bubo bwamwitile, we nu baIsraeli bansania.
24 Mu nkungu zezo, Ahazi akundamanizie bya numba za Kalaga nu abisesile byindi byindi nu akandile nibi za numba za Yehowa. Lingo akitile tusenga twa tuyulo ku makano mansania ma nzila za Yerusalema. 25 Mu miino insania za Yuda akitile biziki byasakama bya kugisia bulago ku tungo tulaga, nu anga bubo ongezie Yehowa, Kalaga wa beisi. 26 Nu mango makitilo mage nu misako zage insania, kutukila matangi aaba nu ku mazinda, masanzilwe mu mukanda wa bakota ba Yuda nu ba Israeli. 27 Ahazi akule, nu bamuyikile mu Yerusalema, tondo tabamuyikile mu nsinda za bakota ba Israeli. Nu Hezekia, mwana wage, angatile mu kiziki kyage.