Kwangata kwa Yotamu
27
1 Yotamu abezaga na myaka makumi mabili nu itano gaalingile kwangata, nu angatile mu Yerusalema myaka ikumi nu mutuba; izina lya nina lyabezaga Yerusa, mukinga wa Zadoki. 2 Akitile bwisanana lwabusio lwa Yehowa anga bwakitaga isi Uzia, tondo nteingide mu numba za Yehowa. Tondo bantu bitide kukita bwagi. 3 Nu obakile lwibi lunene lwa numba za Yehowa, nu alindizie biziki byingi bya kitutu kya Ofeli. 4 Nu obakile lingo miino mu miduko za kisi kya Yuda, nu mu lubanda obakile biziki by'itinino nu numba za byindo, buno beidange na beiti. 5 Eitenne lingo na mukota wa baAmoni, nu abakindile. Mu wozo mwaka, baAmoni bamukasile byindi bya feza lukama, nu nzi za ngano tununu ikumi (10.000), nu nzi za shayiri tununu ikumi (10.000); bibino u byamukasile baAmoni aaba nu mu mwaka w'ibili nu w'isatu. 6 Ububo Yotamu abede na magala, nu alongekile makitilo mage lwabusio lwa Yehowa, Kalaga wage. 7 Binsania byakitile Yotamu, bita byage nu makitilo mage, byasanzilwe mu mukanda wa bakota ba Israeli nu baYuda. 8 Abezaga na myaka makumi mabili nu itano gaalingile kwangata nu angatile myaka ikumi nu mutuba ku Yerusalema. 9 Kumbusa Yotamu akule nu bamuyikile mu mwino wa Davidi, nu Ahazi, mwana wage, angatile mu kiziki kyage.