Kwangata kwa Uzia
26
1 BaYuda basombwede Uzia, gaabezaga na myaka ikumi nu mutuba, nu bamubikile ga kiziki ky'isi Amazia. 2 Wono u wobakile Eloti nu agusubizie ku Yuda kumbusa kwa lukuo lw'isi. 3 Uzia abezaga na myaka ikumi nu mutuba gaalingile kwangata, nu angatile myaka makumi matano nu ibili, nu izina lya nina lyabezaga Yekolia wa ku Yerusalema. 4 Akitile busoga lwabusio lwa Yehowa anga bwakitile isi Amazia. 5 Akokomezizie kulonda Yehowa mu bindi bya Zekaria, wabezaga na bumenyinino mu ndozi za Kalaga; bindi binsania byalondile Yehowa, Kalaga amulindizie. 6 Endile nu akitile bita na baFilistini nu agusizie mukolo wa Gati nu wa Yabune nu wa Asidodi; obakile miino bwigi na Asidodi nu munkatini mwa baFilistini. 7 Kalaga amukasizie ku baFilistini nu ku baArabu beikalaga ku Guribali, nu ku baMehunimu. 8 Nu baAmoni bakasile mitulo ku Uzia, nu lukumu lwage lwakukile kunsania mu Misri, kubuno abede na bwangato bunene nunse. 9 Nu Uzia obakile numba za byindo zasakama mu Yerusalema ku lwibi lwa kapindapinda nu lwibi lwa ku mpinga, nu azilindizie. 10 Nu obakile numba za byindo mu kalula, nu ombile tunuabalongo twingi kubuno abezaga na lusumba lwa bituganwa byingi mu kisi kya Sofele
+ \fr 26:10 \ft Sofele u izina lya kyindi kya kisi kya tukililo twa mu kisi kya Yuda. nu mu kibitabita, nu abezaga na balimi nu balangi ba biguma mu miduko nu mu masoa ma biguma kubuno atundile kulima masoa. 11 Uzia abezaga n'iyombo lya bakoloboyo balwanaga bita mu bibombo anga maganzo makitile Yeieli musanzi, nu Maseya mwemanizi, ku maboko ma Hanania umozi wa bangati ba mukota. 12 Maganzo mansania ma bakulu ba numba za beisibo, u bantu beli mapuka babezaga tununu tubili nu nkama mutuba (2.600). 13 Kunsi kwabo kwabezaga iyombo lya bantu tununu nkama isatu nu mutubakamo nu nkama itano (307.500), bantu bavwamine kwitana bita na magala nu kukasia mukota ku beiti bage. 14 Uzia abalongekede ngabo nu masumo nu nkumbu za byuma nu nsulu za byuma, mankanda nu nkumbi za makozi. 15 Mu Yerusalema akitile na beiya menge kintu kya kulekela misungu na makozi manene, buno mabe gantata ga numba za byindo nu ga tupindapinda. Lukumu lwage lwendile bulazi kubuno akasizibwe nunse na Yehowa nu abede na magala. 16 Tondo gaabede na magala, eikotizie, u bubo agide Yehowa, Kalaga wage, nu eingide mu numba za Yehowa buno agisie bulago ga kasenga ka kugisia bulago. 17 Azaria, sankoga, eingide kumbusa kwage gamozi na basankoga ba Yehowa makumi kinana, babo babezaga mapuka; 18 bazugide mukota Uzia nu bamubwide bunee: “Uzia, ntuli na bwangato bwa kugisia bulago ku Yehowa, buli bwangato bwa basankoga, bana ba Haruni u bengezibwe buno bagisie bulago. Tuka mu kikyo kiziki kyasililila kubuno wagile, nu ntuli na lutanuno lukutuka ku Yehowa.”
19 Uzia ongilwe nu abezaga na kikyo kya kugisia bulago mu maboko mage, nu gongelagwa basankoga, bibali byabasile ku malanga mage lwabusio lwa basankoga mu numba za Yehowa bwigi na kasenga ka kugisia bulago. 20 Sankoga munene nu bango basankoga bansania bamulolile nu bamonine buno eli na bibali ku malanga mage, nu bamutikizye ku kiziki kikyo; lebelebe asasizie kubasa kumbuga, kubuno Yehowa amusungizie. 21 Bamubikile mu numba zage wenyene kutabezaga bango bantu, kubuno alekanukizibwe na numba za Yehowa aaba nu ku lukuo lwage. Yotamu mwana wage, abede mwangati mu numba za mukota, nu angatile bantu. 22 Bitondo binsania byakitile Uzia, bitangi nu bizinda, byasanzilwe na mulengania Isaya mwana wa Amozi. 23 Ububo Uzia akule nu bamuyikile ku nsinda za beisi ku kiziki kyayikagwa bakota nu batendile bunee: “Wono eli na bibali.” Nu Yotamu, mwana wage, angatile mu kiziki kyage.