Kwangata kwa Amazia
25
1 Amazia abezaga na myaka makumi mabili nu itano gaalingile kwangata nu angatile myaka makumi mabili nu mubula mu Yerusalema. 2 Akitile busoga ku meiso ma Yehowa tondo ta na mutima wa komanizia. 3 Gakokomenne bukota bwage nu kugugumana, eitile babo bakiti beitile isi, mukota Yoasi. 4 Tondo nteitile bana babo anga bwasanzilwe ku milembe mu mukanda wa Musa, gakakizizie Yehowa bunee: “Babuti tabeitwe ku kabamba ka bwagi bwa bana babo, nu bana ku kabamba ka bwagi bwa babuti babo. Tondo muntu na muntu eitwe ku kabamba ka bwagi bwage wenyene.” 5 Amazia akundamanizie bamulume ba Yuda nu ababikile mu bibombo anga buli numba za beisibo, bakota ba kanunu nu bakota ba lukama ku baYuda bansania nu ku baBenjamina. Amanine babo babezaga na myaka makumi mabili nu kutinga, amonine mapuka tununu nkama isatu (300.000) beizi kwitana bita na masumo nu ngabo. 6 Lingo akatile mapuka tununu lukama (100.000) ku talanta lukama za feza, batukile ku Israeli.
7 Tondo muntu wa Kalaga avule kweli nu amutendile bunee: “Ee, mukota, ntuzige iyombo lya baIsraeli lyenda gamozi nobe, kubuno Yehowa nteli gamozi na baIsraeli aba babo baEfuraimu bansania. 8 Tondo ndi ukukengela buno mwabe na magala mu nzila zeno, nti Kalaga akugusie lwabusio lwa beiti bobe; kubuno Kalaga eli na bwangato bwa kukasia nu kugusia.”
9 Amazia abuzizie wozo muntu wa Kalaga bunee: “Buni bunakite na lulo lukama lwa talanta lunakasile ku iyombo lya baIsraeli?”
Muntu wa Kalaga amwakwide bunee: “Yehowa anavwama kukukasa bikulo byingi kutinga bibyo.”
10 Kumbusa Amazia alekanukizye iyombo lyatukile ku Efuraimu na lyage, nu alisubizie kwabo. Babo bongedwe nunse baYuda, nu basubizie na bongoa bukali. 11 Tondo Amazia akokomezizie mutima wage nu asondelezizie bantu bage ku Mpinga za Munkange nu gago, eitile bantu baSeiri tununu ikumi (10.000). 12 Nu baYuda bakatile tungo tununu tutano (5.000) twa bantu beikili na kalamo, nu babasondelezizie ku ntonga za kilimbi nu babalekede kunsi kwa kilimbi, nu bazikile bansania. 13 Tondo iyombo lya bantu batazigile Amazia kwenda nabo ku bita, basubizie kwabo nu banyagile mu miino za baYuda kutukila Samaria aaba nu ku Beti-Horoni, nu beitile bantu tununu tusatu muzo nu bendile na ntiko ningi.
Amazia asiga Kalaga
14 Kumbusa kwa kusubya kwa Amazia kwitana na baEdomu, avule na tulaga twa Seiri nu atubikile kuba tulaga twage, nu kutukumbamina nu kutukasa tuyulo. 15 Ububo Yehowa ongedwe Amazia nu amusingide mulengania wamusambalide bunee: “Kubuni witabizizie tulaga twa bantu tutavwamine konia beiya to mu kuboko kwobe?” 16 Gaabezaga es'atenda ku mukota, mukota amubwide bunee: “Ndi twakubikile mukazi wa lwango lwa mukota? Lekela kutenda; ndi ukutunda kulibulwa?” Nu mulengania atendile bunee: “Nizi buno Kalaga asombwede kukuzikya kubuno wakitile bubo nu ntwazigile kungwa lwango lwane.”
17 Kumbusa Amazia, mukota wa Yuda, akalile lwango nu asingile mugenzi ku Yoasi, mwana wa Yoahazi, mwana wa Yehu, mukota wa Israeli kutenda bunee: “Vwa tumonane meiso ku meiso.” 18 Nu Yoasi, mukota wa Israeli, asingile mugenzi kutenda ku Amazia mukota wa Yuda bunee: “Mukele, ku mwiduko wa Lebanoni, watendile ku mwerezi wa Lebanoni bunee: ‘Kasana mukinga wobe buno asongwe na musikila wane!’ Nu nyama za mu lubanda lwa Lebanoni zatingile nu zanyantile mukele. 19 Ukutenda bunee: ‘Ntukumona, nakindile baEdomu, nu mutima wobe ukwisakika nu kwiganuna.’ Sigala lino kwobe. Kubuni kuukutunda kwingila mu mulondo uteli wobe nu kulusia kabebe kuguli nu ku baYuda?”
20 Tondo Amazia ntazigile kungwilila. Bubo bwatukile ku Kalaga buno abakasane ku maboko ma beiti babo, kubuno balondaga tulaga twa baEdomu.
21 Ububo Yoasi, mukota wa baIsraeli, abakamine, we nu Amazia, mukota wa Yuda, bamonenneko meiso ku meiso mu bita ku Beti-Semesi, mwino umozi wa baYuda. 22 BaYuda bakindilwe na baIsraeli, nu muntu na muntu atinine ku numba zage. 23 Yoasi, mukota wa baIsraeli, akatile Amazia, mwana wa Yoasi, mwana wa Ahazia, mukota wa Yuda, ku Beti-Semesi nu avule nage ku Yerusalema. Agusizie mukolo wa Yerusalema, mabusu nkama inazi, kutukila ku lwibi lwa Efuraimu aaba nu ku lwibi lwa kapindapinda. 24 Akatile olo nu feza nu binsania bya numba za Kalaga byalangaga Obedi-Edomu, gamozi na ntiko za numba za mukota, nu bakatile bantu ku magala, nu basubizie ku Samaria.
25 Nu Amazia mwana wa Yoasi, mukota wa Yuda, alamine kumbusa kwa lukuo lwa Yoasi mwana wa Yoahazi, mukota wa Israeli, myaka ikumi nu itano. 26 Binsania byakitile Amazia, bitangi nu bizinda, ndi tabyasanzilwe mu mukanda wa bakota ba Yuda nu Israeli? 27 Kutukila nkungu zezo, Amazia ntayangile Yehowa; bamukalide lwango mu Yerusalema, nu atinine ku Lakisi tondo bamuyangile ku Lakisi, nu bamwitile ko. 28 Bavule na kitumba kyage gantata farasi, nu bamuyikile mu nsinda gamozi na beisi mu mwino wa Yuda.