Kwangata kwa Yoasi mu Yuda
24
1 Yoasi abezaga na myaka mutuba kamo gaabede mukota, nu angatile myaka makumi manazi mu Yerusalema. Nina abezaga Sibia wa mwino wa Beri-Seba. 2 Yoasi akitile busoga lwabusio lwa Yehowa bindi binsania bya Yehoyada sankoga. 3 Yehoyada amusombolede bakikulu babili, nu Yoasi abutile bana bamulume nu bamukazi. 4 Kumbusa, Yoasi akengede kukulumizia numba za Yehowa. 5 Akundamanizie basankoga nu baLawi nu ababwide bunee: “Endazi ku miino za Yuda, nu kundamaniazi bikulo ku baIsraeli bansania bya kukulumizia numba za Kalaga weinyu; kitazi bubo mwaka na mwaka, nu kokomeziazi kubukita.” Tondo baLawi tabasasizie kubukita.
6 Ububo mukota amanine Yehoyada, sankoga munene, nu amubuzizie bunee: “Kubuni ntwakakizizie baLawi kuvwa na nkaso ku baYuda nu ba ku Yerusalema anga bwakakizizie Musa, mukiti wa Yehowa, ku musanganano wa baIsraeli bansania nu ku kabamba ka numba za bulongeki?” 7 Kubuno bana ba Atalia, wozo mukikulu mubi, basambwide numba za Kalaga nu batikizye binsania byasililila ku numba za Yehowa nu babibikile ku numba za Baali.
8 Ububo mukota abakakizizie kukita sanduku, nu kuzibika kumbuga bwigi na lwibi lwa numba za Yehowa. 9 Nu basambede kunsania mu Yuda nu mu Yerusalema buno bavwe na nkaso za Yehowa, anga mitebe zakakizizie Musa, mukiti wa Kalaga, ku baIsraeli mu kalula. 10 Nu mitonge insania nu bantu bansania babogilebogile nu bavule na nkaso zabo, nu bazibikile mu sanduku aaba nu gabasilile. 11 Gavule baLawi na sanduku ku bemanizi ba mukota bamonine buno muzo mwabezaga bikulo byingi; bavwaga nazo ku balangi ba bikulo bya mukota, nu batikagia bikulo binsania mu sanduku nu kubibika mu maboko ma bemanizi, nu kusubya sanduku ku kiziki kyazo. Bakitile bubo busi na busi, nu bakatile bikulo byingi nunse. 12 Mukota Yoasi nu Yehoyada babikasaga ku bangati ba mulimo wa kukulumizia numba za Yehowa, nu bangati babikasaga ku bobaki nu bakulumizi buno bakulumizie numba za Yehowa, nu ku batumbi ba byuma nu nsubi buno bakulumizie numba za Yehowa.
13 Ububo bakiti bakitile lebelebe na maboko mabo, nu bakulumizizie numba za Kalaga ku lukita lwazo lwa kulinga, nu bazilindizie bubibu. 14 Gabasilile, bavule lwabusio lwa mukota nu lwa Yehoyada na bikulo byasigede, nu bakitile nabyo bintu bya numba za Yehowa, bintu bya mulimo nu bya tuyulo, mpepe za bulago nu bingo bintu bya olo nu bya feza. Nu mu bindi binsania bya Yehoyada, bakasanaga busi na busi, tuyulo twa kugisibwa mu numba za Yehowa.
Yoasi asiga Kalaga
15 Tondo Yehoyada abede mukungu na myaka mingi nu akule gaabezaga na myaka lukama nu makumi masatu. 16 Nu bamuyikile mu mwino wa Davidi kwayikagwa bakota kubuno akitide Israeli nu Kalaga nu numba zage busoga. 17 Kumbusa kwa lukuo lwa Yehoyada, mitonge za Yuda zavule nu zakumbaminne mukota. Nu mukota abongwilide. 18 Nu basigile numba za Yehowa, Kalaga wa beisibo, nu bakitide Ashera nu ingo nkisi. Bongoa bwa Kalaga bwabede ku baYuda nu ba ku Yerusalema ku kabamba ka mibi zabo. 19 Tondo Yehowa asingile balengania kubeli buno babasubye kweli. Babano babasambalide tondo tabazigile kungwilila. 20 Nkungu zezo, Muuza wa Kalaga wavule ku Zekaria, mwana wa sankoga Yehoyada, nu emenne lwabusio lwa bantu nu ababwide bunee: “Bubuno u bwatenda Kalaga bunee: ‘Kubuni mukunana makakizio ma Yehowa buno tamumone busoga? Kubuno mwasigile Yehowa, nu We amusiga.’” 21 Tondo bamukalide lwango, nu ku ikakizio lya mukota bamwisile makozi nu kumwita ga mulungu wa numba za Yehowa. 22 Ububo mukota Yoasi ntakengede mponga zamukitide Yehoyada, isi wa Zekaria, nu eitile mwana wage. Nu we, gaabede bwigi na kulekana, atendile bunee: “Yehowa amone ku bubuno, nu asube.”
23 Ku kuzinda kwa mwaka, iyombo lya baAramu lyavule ku Yoasi. Bavule ku Yuda nu ku Yerusalema nu bazikizye mitonge insania munkatini mwa bantu nu kusinga ntiko zabo insania ku mukota wa Damasiki. 24 Iyombo lya baAramu lyabezaga ikeke, ta bantu beingi tondo Yehowa akasile ku maboko mabo iyombo inene nunse. Kubuno babo basigile Yehowa, Kalaga wa beisibo, ububo basungizie Yoasi. 25 Gabatukile kwage, bamusigile na nsambo nnene nunse; nu bakiti bage bamukalide lwango ku kabamba ka mikila za mwana wa Yehoyada, nu bamwitile ga mugu wage. Ububo akule, nu bamuyikile mu mwino wa Davidi tondo tabamuyikile mu kiziki kya nsinda za bakota. 26 Babo bamukalide lwango lwa kumwita babezaga Zabadi, mwana wa Simeati, muAmoni, nu Yozabadi, mwana wa Simuriti, mukikulu muMoabu. 27 Tuzeni twa bana bage nu twa bitondo byage nu twa kobaka numba za Kalaga twasanzilwe tunsania mu mukanda wa bakota. Amazia mwana wage angatile mu kiziki kyage.