Kwangata kwa Yoasi
23
1 Tondo mu mwaka wa mutuba kamo, Yehoyada abede na magala nu akitile idagano na bakota ba nkama: u Azaria mwana wa Yoramu, nu Isimaeli mwana wa Yehohanani, nu Azaria mwana wa Obedi, nu Maseya mwana wa Adaya, nu Elisafati mwana wa Zikiri. 2 Nu bendile kunsania mu Yuda, bakundamanizie baLawi kutuka mu miino insania za Yuda nu bakota ba bikanga bya baIsraeli, nu bavule ku Yerusalema. 3 Nu musanganano unsania wakitile lwango na mukota mu numba za Kalaga, nu Yehoyada ababwide bunee: “Lolazi mwana wa mukota angata anga bwakakizizie Yehowa ku bana ba Davidi. 4 Mwatunganana kukita kikino; inyuwe basankoga nu baLawi, gamwalinge mulimo ku busi bwa Sabato, nti kyindi kimozi kya bisatu kyabe balangi ba nibi, 5 nu kyindi kimozi kya bisatu kyabe ku numba za mukota, nu kyindi kya bisatu kyabe ku lwibi lwa mulungu, nu bantu bansania babe mu tubelabela twa numba za Yehowa. 6 Tamwingile muntu umozi mu numba za Yehowa, tugu basankoga nu baLawi bakukita mulimo, kubuno babo u basililila, beingile mu numba; tondo bantu bansania balange ikakizio lya Yehowa. 7 BaLawi batimbe mukota nawe nawe na bya bita mu maboko mage, unsania ukwingila mu numba, nti eitwe. Mube gamozi na mukota mu kwingila nu mu kubasa.”
8 BaLawi nu baYuda bansania bakitile anga bwakakizizie Yehoyada sankoga, nawe nawe nawavule na bantu bage, babo batunganana kulinga milimo nu babo bakulekela mulimo wabo Busi bwa Kumunwa, u Sabato, kubuno Yehoyada sankoga ntabakasile bwangato bwa kwenda. 9 Yehoyada sankoga akasile bakota ba nkama masumo nu ngabo, nnene nu nkeke, zabezaga za mukota Davidi nu zabezaga mu numba za Kalaga. 10 Nu abikile bantu bansania buno balange mukota, nawe nawe na bya bita mu kuboko kwage, ku ndenge insania za numba nu kutimba kasenga ka kayulo nu numba.
11 Kumbusa, babasile na mwana wa mukota nu bamubikile nkumbu za bukota ku itoe lyage nu bamukasile bulongeki. Bamukitile kuba mukota, nu Yehoyada sankoga nu bana bage bamubongezie mwambo nu batendile bunee: “Mukota alame.” 12 Gongule Atalia ku kazege ka bantu bakundamana nu kuganuna mukota, eingide mu numba za Kalaga gamozi na bantu. 13 Gaalolile, amonine mukota es'emana ga kiziki kyage, g'iyango lyage bwigi na mwingilo, nu bakota ba nkama nu bidi ba myonze babezaga bwigi na mukota; nu bantu bansania ba kisi babogilebogile na kyelele, nu kwida myonze, nu beimbi gamozi ba bindanda byabo basondelezizie nimbo za lutanuno. Nu Atalia atile nsulu zage nu alalukile bunee: “Musona! Musona!”
14 Yehoyada sankoga akakizizie bakota b'iyombo bunee: “Mubasiazi kumbuga nu unsania wamuyanga, nti eitwe na mwene wa nganda.” Ku bubo sankoga atendile lingo bunee: “Tamumwite mu numba za Yehowa.” 15 Ububo bamukatile na maboko mabo nu eingide ku mwingilo wa farasi za numba za mukota nu bamwitile gago.
16 Nu Yehoyada akitile idagano gasamba bantu bansania nu mukota, buno babe bantu ba Yehowa. 17 Kumbusa bantu bansania bendile ku numba za Baali nu kuzizikya gamozi na kasenga ka kayulo nu nkisi za Baali. Nu beitile Matani sankoga wa Baali lwabusio lwa kasenga ka kayulo. 18 Yehoyada akakizizie balangi ba numba za Yehowa basondelezibagwa na basankoga ba baLawi balongekile Davidi, buno balange numba za Yehowa nu buno bakase tuyulo twa kugisibwa ku Yehowa na mbogimbogi nu nimbo, anga bwasanzilwe mu milembe za Musa nu anga bwabezaga makakizio ma Davidi. 19 Abikile balangi ba nibi za numba za Yehowa buno unsania utaswaga nteingile. 20 Nu atolile bakota ba bakoloboyo lukama, nu mitonge, nu bakota ba bantu, nu bantu bansania ba kisi, nu bakumbizie mukota kutuka ku numba za Yehowa, kwenda na magulu nu kwingila ku numba za mukota ku mwingilo munene. Ububo bamwikazizie mukota ga kisumbi kyage kya bukota. 21 Bantu bansania ba kisi babogilebogile nu mu mwino mwabezaga bubobelelo. Beitile Atalia na mwene wa nganda.