Kwangata kwa Ahazia
22
1 Bantu ba ku Yerusalema babikile malibilo mage, Ahazia, mukota mu kiziki kyage, kubuno banyage bavwaga na baArabu, beitile bango bana bage bansania. Ububo Ahazia mwana wa Yoramu, mukota wa Yuda, angatile. 2 Ahazia abezaga na myaka makumi mabili nu ibili gaalingile kwangata nu angatile mwaka umozi mu Yerusalema. Izina lya nina lyabezaga Atalia, mukinga wa Omuri. 3 Nu we lingo akitile makitilo ma Ahabu, kubuno nina abezaga akumwana bubi kankanka. 4 Akitile bubi ku meiso ma Yehowa, anga bwakitile babo ba numba za Ahabu, kubuno babo bamwanaga bubi buno eitwe. 5 Ayangile lwango lwabo, endile na Yoramu, mwana wa Ahabu, mukota wa Israeli, kwitana bita na Hazaeli, mukota wa Aramu, ku Ramoti-Gileadi. Nu bo baAramu basumitile Yoramu. 6 Nu Yoramu asubizie ku Yezereheli, buno asikwe byulu byasumitilwe ku Rama geitanaga na Hazaeli, mukota wa Aramu. Ahazia, mwana wa Yoramu, mukota wa Yuda, akumbile buno amone ku Yoramu, mwana wa Ahabu, mu Yezereheli, kubuno abezaga musambi.
7 Kalaga asombwede kuzikya Ahazia geendaga kutabangila Yoramu. Gaabasile, endile na Yoramu kwitana na Yehu, mwana wa Nimusi, wabongezibwe mwambo na Yehowa buno azikye numba za Ahabu. 8 Mu nkungu zasungagia Yehu numba za Ahabu, akulumenne na mitonge za Yuda nu bana ba mibuto za Ahazia bendaga gamozi na Ahazia, nu abeitile. 9 Yehu alondile Ahazia, nu bamukatile ku Samaria kwabezaga abisama; bavule nage ku Yehu nu bamwitile. Bamuyikile mu nsinda kubuno batendile bunee: “Eli mwana wa Yosafati walondaga Yehowa na mutima unsania.” Ku numba za Ahazia takwabezaga wampa wavwamine kwangata bukota.
10 Mu nkungu zamonine Atalia, nina wa Ahazia, buno mwana wage akua, azanzukile nu azikizye bansania ba kikanga kya bukota bwa Yuda. 11 Tondo Yoseba, mukinga wa mukota, atolile Yoasi, mwana wa Ahazia. Amwibile kumutikya munkatini mwa bana ba mukota babeitaga, nu amubikile na mulezi wage mu busio bwa kwiyombeka. Ububo Yoseba mukinga wa mukota Yoramu, nu mukikulu wa Yehoyada sankoga wabezaga mubitu wa Ahazia, abisile Yoasi buno Atalia ntamwite. 12 Nu abisilwe nabo myaka mutuba mu numba za Kalaga mu bindi bya Atalia kwangata kisi.